ISAIAH 60 - Edisana ñwed Abasi Ibom

Ubɔŋ Emi Zion Edinyenede

¹ DAHA ke enyɔŋ! yama! koro uŋwana fo emedi, ubɔŋ Jehovah omonyuŋ asiaha ɔnɔ fi,

² Koro, sese, ekim eyefuk ererimbot, ɔkpɔsɔŋ ekim eyenyuŋ ofuk mme idut: edi Jehovah eyesiaha ɔnɔ fi, eyenyuŋ ekut ubɔŋ esie eke odorode fi.

³ Ndien mme idut eyesaŋa ke uŋwana fo, ndidem eyenyuŋ esaŋa ke usiere fo.

⁴ Menere enyin fo kabare kuk, nyuŋ se; kpukpru mmɔ ebono edi ke ɔtɔ fo: nditɔ-iren fo eyeto ke anyan ebiet edi, eyenyuŋ ebiom nditɔ fo iban ke ŋkaŋ.

⁵ Ndien afo eyekut, onyuŋ atara idem, esit eyenyuŋ ebre, onyuŋ aŋwaŋa fi: koro inyene inyaŋ eyekabare etiene fi, odudu mme idut eyedi ke ɔtɔ fo.

⁶ Akwa udim camel eyefuk fi, mme dromedary Midian ye eke Ephah; kpukpru mmɔ eyeto ke Sheba, ebiom gold ye frankincense edi, eyenyuŋ ekwɔrɔ itoro Jehovah.

⁷ Kpukpru otu ufene Kedar eyebono ke ɔtɔ fo, okukim Nebaioth eyenam ŋkpɔ enɔ fi: eyedɔk ke itie-uwa mi nte ŋkpɔ inem; nyenyuŋ mbana ediye ufɔk mi.

⁸ Mme anie edi mme mmɔ emi efede (edi) nte obubit enyɔŋ, ye nte ibiom eka ke mme window mmɔ?

⁹ Koro mme isuo ke ebet mi, mme ubom mbakara Tarshish ebet ke mbemiso, man eda nditɔ mi ke anyan idut edi, silver mmɔ ye gold mmɔ ŋko, esɔk enyiŋ Jehovah Abasi fo, ye Edisana Abasi Israel; koro enye abanade fi.

¹⁰ Ndien nditɔ isen owo eyebɔp ibibene fo, ndidem mmɔ eyenyuŋ enam ŋkpɔ enɔ fi: koro ke iyaresit mi ke ŋkamiŋa fi, ndien ke mfɔnido mi ke ŋkatua fi mbɔm.

¹¹ Ndien mme usuŋ fo eyena iŋwaŋ kpukpru ini; idinyuŋ isinke mmɔ ke uwemeyo ye ke okoneyo; man eda inyene mme idut esɔk fi, enyuŋ eda ndidem mmɔ edi.

¹² Koro eyesobo idut ye obio eke midinamke ŋkpɔ fo; mme idut oro eyenyuŋ ebiara fap.

¹³ Ubɔŋ Lebanon eyedi ke ɔtɔ fo, cypress, ye plane, ye box, eyedi ini kiet, man eda mmɔ ebana edisana ebiet mi: ndien nyekpono ebiet ukot mi.

¹⁴ Ndien nditɔ mmɔ emi ekefikde fi, eyedi edinuhɔ enɔ fi; kpukpru mmɔ emi ekesinde fi ke ndek eyenyuŋ enuhɔ ke ikpat ukot fo; ndien mmɔ eyekot fi, ete, “Obio Jehovah, Zion Edisana Abasi Israel.”

¹⁵ Utu ke ekpɔŋ fi enyuŋ esua fi, owo minyuŋ isaŋake ibe fi, nyenim fi ke nsinsi ubɔŋ, idara ediwak emana.

¹⁶ Ndien afo eyewap mmɔŋ eba mme idut, onyuŋ awap eba ndidem: ndien eyefiɔk ete ke ami Jehovah ndi andinyaŋa fi, ye andifak fi, Ɔkpɔsɔŋ Abasi Jacob.

¹⁷ Nyeda gold ndinim ke itie okpoho, nyeda silver ndinim ke itie ukwak, ye okpoho ke itie eto, ye ukwak ke itie itiat: ndien nyenam mbɔŋ fo edi emem, nyenyuŋ nnam mme andikara fi edi edinen ido.

¹⁸ Idikopke aba afai ke isɔŋ fo, idikopke ŋwure ye nsobo ke esit adaŋa fo; edi afo eyekot ibibene fo ete, Erinyaŋa, okot inua-otop fo, ete, Itoro.

¹⁹ Utin ididige aba uŋwana fo ke uwemeyo; ɔfiɔŋ idinyuŋ idaha uŋwana iŋwaŋa fi: ndien Jehovah eyedi nsinsi uŋwana fo, Abasi fo eyenyuŋ edi uyai fo.

²⁰ Utin fo idisopke aba; ɔfiɔŋ fo idinyuŋ itahake aba: koro Jehovah eyedi nsinsi uŋwana fo, ndien mme usen ntuaŋa fo eyekure.

²¹ Ndien ikɔt fo kpukpru eyedi edinen; mmɔ eyenyene isɔŋ ke nsinsi, ŋkpɔ emi ntɔde, utom ubɔk mi, man nda ubɔŋ.

²² Ekpri eyekabare edi tɔsin, esisit eyenyuŋ akabare edi ɔkpɔsɔŋ idut: ami Jehovah nyenam enye awara ke ekem ini esie.