ISAIAH 6 - Edisana ñwed Abasi Ibom

Ŋkukut ye Ikot Emi Abasi Okotde Isaiah

¹ KE isua oro edidem Uzziah akpade, ami nnyuŋ ŋkut Ɔbɔŋ etiede ke edikoŋ ye edimenere ebekpo, ndien akwa ekura esie ɔyɔhɔ ke temple.

² Mme seraphim eda enye ke enyɔŋ: kiet-kiet enyene mba itiokiet-itiokiet; ada iba ofuk iso esie, ada iba ofuk ukot esie, onyuŋ ada iba efe.

³ Ndien kiet ofiori okot kiet, onyuŋ ɔdɔhɔ ete, Edisana, edisana, edisana, Jehovah mme udim: ubɔŋ esie ke ɔyɔhɔ ke ofuri ererimbot.

⁴ Ndien uyo oro okotde enyeŋe udori-asaŋa-udɔk, nsuŋikaŋ edinyuŋ ɔyɔhɔ ke ufɔk.

⁵ Ndien ami ndɔhɔ, nte, Mbɔm mi! koro mmakpa: koro ami ndide owo edidehe mkpɔk-inua, nnyuŋ nduŋ ke otu mbon edidehe mkpɔk-inua: koro enyin mi okutde edidem, Jehovah mme udim.

⁶ Ndien owo mme seraphim kiet efe etiene mi, ye mbubek ikaŋ eke enye akadade ufat-ikaŋ osio ke itie-uwa, ke ubɔk esie:

⁷ ndien enye ada enye otuk mi ke mkpɔk-inua, onyuŋ ɔdɔhɔ ete, Sese, emi omutuk fi ke mkpɔk-inua: omonyuŋ osio isop idiɔk ido fo.

⁸ Ndien ŋkop uyo Ɔbɔŋ ɔdɔhɔde, ete, Anie ke ndidɔŋ utom? Anie edinyuŋ aka ŋkpɔ ɔnɔ nnyin? Ndien ndɔhɔ nte, Se mi, dɔŋ mi utom.

⁹ Ndien enye ɔdɔhɔ, ete, Ka kɔdɔhɔ mbio emi, ete, Mbufo esuk ekop, edi ekunyene ibuot; esuk ese ŋko, edi ekufiɔk.

¹⁰ Nam esit mbio emi odobi, nyuŋ nam utɔŋ odobi mmɔ, nyuŋ tibi mmɔ enyin: mbak mmɔ edikut ke enyin mmɔ, edinyuŋ ekop ke utɔŋ mmɔ, enyuŋ etim efiɔk ŋkpɔ ke esit mmɔ, enyuŋ ekabare, ndien ekɔk mmɔ. Ndien ndɔhɔ nte, Ɔbɔŋ adaŋa didie?

¹¹ Ndien enye ɔbɔrɔ, ete, Tutu mme obio ewure enana mme andiduŋ, mme ufɔk enyuŋ ebiara enana owo, isɔŋ onyuŋ abiara fap,

¹² Jehovah onyuŋ emen owo efep onim anyan ebiet, enyuŋ ekpɔŋ akamba ubak ke ufɔt isɔŋ.

¹³ Edi ɔyɔhɔ ubak duop eyesuk odu enye (isɔŋ) ke esit, ndien emi eyetɔŋɔ ntak edi se editade, kpa nte terebinth, ye nte ofriyo, eke etak odude ke esit, ke ekpide mmɔ eduɔk: etak esie (oro) eyedi edisana mkpasip.