ISAIAH 58 - Edisana ñwed Abasi Ibom

Utɔ Uturudia Emi Enemde Abasi Esit

¹ SIORO uyo ke itɔŋ fiori, kumum idem, menere uyo fo nte ukorowo, nyuŋ tiŋ idiɔk ido ikɔt mi nɔ mmɔ, tiŋ mme oburobut ido ufɔk Jacob nɔ mmɔ.

² Ndien mmɔ eyeyom mi kpukpru usen, ifiɔk usuŋ mi eyenyuŋ enem mmɔ esit, nte idut eke anamde edinen ido, minyuŋ ikpɔŋke ikpe Abasi mmɔ. Mmɔ eyebeŋe mi mme ikpe eke enende: eritiene Abasi eyenem mmɔ esit.

³ “Nnyin inam didie itre udia, ndien afo mukwe? ituk ukpɔŋ nnyin, ndien afo mufiɔkke?” Sese, mbufo ekut inemesit ke usen utre-udia mbufo, enyuŋ ekpak ofuri utom mbufo.

⁴ Sese, mbufo etre udia ke utɔk ye eŋwan, man enyuŋ etop ita idiɔk-ŋkpɔ: mbufo ekutre udia kpa nte ke mfin emi, ke enam ekop uyo mbufo ke enyɔŋ.

⁵ Nte utre-udia eke ndimekde edibiet emi? kpa usen eke owo otukde ukpɔŋ esiemɔ? Mme edi nte enye otopde ibuot esie nte nnyanyaŋa, onyuŋ ebride ɔfɔŋ-ikpo ye ntan ana ke esit? Nte afo edikot emi utre-udia, usen eke enemde Jehovah esit?

⁶ Nte idige emi edi utre-udia eke ndimekde enye: eritat uruk idiɔk ido, erikpɔhɔre ubɔp-ŋkpɔ ɔkpɔnɔ, nnyuŋ nsana mmɔ eke owo efikde nnyak, nnyuŋ mbuŋ kpukpru ɔkpɔnɔ?

⁷ Nte idige ndibuŋ uyo fo nnɔ owo biɔŋ, afo eyenyuŋ ada mme ubuene eke ediyode edi ke ufɔk, ke afo okutde owo iferi, ndien ofuk enye, ndien mudibeke obukidem fo.

⁸ Ndien uŋwana fo eyesiaha nte usiere, nsɔŋidem fo eyenyuŋ awara nditibe: ndien edinen ido fo eyebem fi iso; ubɔŋ Jehovah eyenyuŋ asaŋa fi ke edem.

⁹ Ndien afo eyekot, ndien Jehovah eyeyere; afo eyeseme, ndien enye eyedɔhɔ ete, Se mi. Ke afo ama osio ɔkpɔnɔ, ye erinyanare nnuen-ubɔk, ye oburobut nneme ke otu mbufo efep;

¹⁰ afo ama onyuŋ osio ukpɔŋ fo ɔnɔ owo biɔŋ, onyuŋ ɔyuhɔ ukpɔŋ eke ɔtuhɔde; ndien uŋwana fo eyesiaha ke edim, mbubreyo fo eyebiet ufɔt uwem-eyo:

¹¹ ndien Jehovah eyeda fi usuŋ kpukpru ini, onyuŋ ɔyuhɔ ukpɔŋ fo ke nda-eyo, onyuŋ anam mme ɔkpɔ fo esɔŋɔ: ndien afo eyebiet iŋwaŋ eke ebitde, ebiet idim mmɔŋ eke mmɔŋ esie mibiaŋake.

¹² Ndien eyewɔrɔ ke ɔtɔ fo ebɔp ŋkani ndon: afo eyediɔŋ ŋwure, ediwak emana; ndien eyekot fi, ete, Andidiɔŋ ŋwure, Anditɔŋɔ ntak nnam ɔkpɔ-usuŋ man eduŋ.

¹³ Afo ama akabare ukot fo osio ke sabbath efep, ke erinam utom fo ke edisana usen mi: ama onyuŋ okot sabbath, ete, inemesit, okot edisana usen Jehovah, ete, ŋkpɔ ukpono; ama onyuŋ okpono enye ke eritre ndinam ido fo, ndinyuŋ ntiene utom fo, nnyuŋ ndɔhɔ ikɔ:

¹⁴ ndien Jehovah eyedat fi esit; ami nyenyuŋ nnam fi odoro ke edikoŋ ebiet isɔŋ, nnyuŋ nnɔ fi akpa Jacob usɔ adia: koro inua Jehovah ɔdɔhɔde.