ISAIAH 50 - Edisana ñwed Abasi IbomAbasi Anyaŋa Mmo Oro Ebuɔtde Idem ye Enye 1 NTEM ke Jehovah ɔdɔhɔ, ete, enye ŋwed usio-ndɔ eka mbufo emi ŋkebinde mfep? Mme anie ke otu mmɔ emi ŋkamade mmɔ isɔn ke ŋkanyam mbufo nnɔ? Sese, ekenyam mbufo ebaŋa mme idiɔk ido mbufo, ekenyuŋ ebin eka mbufo efep ebaŋa mme oburobut ido mbufo. 2 Nsinam baba owo kiet miduhe ke ini ŋkedide? Nsinam ŋkotde, ndien baba owo kiet miyereke? Nte ubɔk mi amakabare ɔmuhɔ akan nte ŋkemede ndifak? Nte baba odudu iduhe mi ke idem, eke mmeŋkemeke ndinyaŋa? Sese, nyenam inyaŋ asat ke nduari mi, nnyuŋ ŋkabare mme akpa mmɔŋ edi wilderness: iyak mmɔ eyetebe, koro mmɔŋ miduhe, enyuŋ ekpaŋa ke nsat-itɔŋ. 3 Nyefuk ikpa-enyɔŋ obubit, nnyuŋ nsine mmɔ ɔfɔŋ-ikpo ke ufuhɔ-ŋkpɔ. 4 Ɔbɔŋ Jehovah ɔmɔnɔ mi edeme mmɔ eke ekpepde ŋkpɔ, man mfiɔk ndida ikɔ ŋŋwam mmɔ eke ekpade mba: enye eyedemere, eyedemere mi utɔŋ kpukpru usen-ubɔk, man ŋkop kpa nte mmɔ eke ekpepde ŋkpɔ. 5 Ɔbɔŋ Jehovah aŋwaŋade mi utɔŋ, ndien ami nsɔŋke ibuot: mfiakke edem. 6 Ŋkayak edem mi nnɔ mmɔ eke eyibide, nyak mfuk mi nnɔ mmɔ eke ediberede idet: ndipke iso mi mfehe but ye etap. 7 Ndien Ɔbɔŋ Jehovah eyenyaŋa mi; mmɔdo nsia miyomoke mi: mmɔdo ŋkonimde iso mi nte itiat a fransi, ndien mmɔfiɔk nte ke but idinamke mi. 8 Enye eke akaŋde mi emekpere; anie editɔhɔ ye ami? Yak nnyin ida ɔtɔ kiet: anie edi owo utɔk mi? 9 Yak enye asaŋa ekpere mi. Sese, Ɔbɔŋ Jehovah eyenyaŋa mi; anie edinam ikpe otip mi? Sese, kpukpru mmɔ eyetaha nte ɔfɔŋidem: ŋkpri unam eyeta mmɔ. 10 Anie ke otu mbufo abak Jehovah, okop uyo owo esie? Yak owo eke asaŋade ke ekim, ndien minyeneke uŋwana, ɔbuɔt idem esie ke enyiŋ Jehovah, onyuŋ ebere edem ye Abasi esie. 11 Sese, kpukpru mbufo eke ebarade ikaŋ, eke ebɔbɔde ndisak idaŋ ke idem: mbufo esaŋa eduk ke edemikaŋ mbufo, ye ke idaŋ ikaŋ eke mbufo ebuberede! Mbufo eyebɔ mi ŋkpɔ emi ke ubɔk; eyesuhɔre ena ke ndutuhɔ. |
Efik Old Bible With Sectional Headings © Bible Society of Nigeria, 2013, 2019.
Bible Society of Nigeria