ISAIAH 47 - Edisana ñwed Abasi Ibom

Abasi Obiom Idut Babylon Ikpe

¹ SUHƆRE, nyuŋ tie ke ntan, adiaha Babylon eyenɔwɔŋ, tie ke isɔŋ; ebekpo iduhe, adiaha mme Chaldean: koro mmɔ midikotke aba fi, ite, Mmem-mmem, ye edinem.

² Da mme itiat ukɔk, nyuŋ kɔk ndom-uyo: fuhɔre ɔfɔŋ iso fo, sio ewura, fuhɔre ukot, saŋa ke akpa mmɔŋ be.

³ Eyefuhɔre iferi fo, eyenyuŋ ekut but fo ŋko: nyesio usiene, ndinyuŋ nsoboke ye owo baba kiet.

⁴ Ama edi andifak nnyin, Jehovah mme udim edi enyiŋ esie, Edisana Abasi Israel.

⁵ O Adiaha mme Chaldean, tie ke ndobo, nyuŋ duk ke ekim: koro mmɔ midikotke aba fi, ite, Ɔbɔŋ aŋwan ekondo.

⁶ Ŋkayat esit ye ikɔt mi; nsabare udeme mi, nda mmɔ nsin fi ke ubɔk: afo utuaha mmɔ mbɔm; odori mbiowo ata edidobi ɔkpɔnɔ fo.

⁷ Afo okonyuŋ ɔdɔhɔ, ete iyedi ɔbɔŋ aŋwan ke nsinsi: tutu afo etre ndinim ŋkpɔ emi ke esit fo, utihi akpatre esie.

⁸ Kop emi ndien, O aŋwan usɔrɔ, emi etiede edue idem, emi ɔdɔhɔde ke esit esie, ete, Ami ndu, ndien efen iduhe, ibɔhɔke ami; nditiehe nte ebe-akpa, ndifiɔkke unana-nditɔ.

⁹ Edi ŋkpɔ mbiba emi eyesim fi ke idaha, ke usen kiet, unana nditɔ, ye unana ebe: kpukpru mmɔ emesim fi, ebaŋa ediwak idiɔŋ fo, ye uwak uŋwaŋ fo.

¹⁰ Ndien afo ɔbuɔt idem fo ke idiɔk ido fo; ɔdɔhɔ ete, Baba kiet ikwe mi. Ikike fo ye ifiɔk fo ekwaŋa fi; afo onyuŋ ɔdɔhɔ ke esit fo, ete, Ami ndu, ndien efen iduhe.

¹¹ Ndien idiɔk ŋkpɔ mmɔŋ edisim fi; ndien afo udufiɔkke usiere esie: nsobo eyenyuŋ ɔduɔ fi ke idem; ndien afo udukwe nte ofimerede enye efep: nditaha eyenyuŋ edi edibuat fi; ndien afo udufiɔkke.

¹² Kɔbɔ ndien ke uŋwaŋ fo, ye ke uwak idiɔŋ fo, emi afo anamde ɔkpɔsɔŋ utom ke esit toto ke uyen fo; mme afo eyekeme ndikut udori, mme afo eyekan.

¹³ Uwak uduak fo esin fi akpa mba. Yak mmɔ eke ebaharede ikpa-enyɔŋ, ye mmɔ eke esede ntantafiɔŋ, ye mmɔ eke edade mbufa ɔfiɔŋ esiak ŋkpɔ, edaha eda, enyuŋ enyaŋa fi esio ke ŋkpɔ eke edisimde fi.

¹⁴ Sese, mmɔ ebiet etak nnyanyaŋa; ikaŋ amata mmɔ, mmɔ idikemeke ndisio idem mmɔ ke ubɔk edemikaŋ: ebok ikaŋ eke owo ewebede iduhe, ikaŋ eke owo etiede enye ke iso iduhe.

¹⁵ Ntem ke mmɔ emi afo akanamde utom abaŋa, etie ye afo, mmɔ eke edide mbon-urua fo toto ke uyen fo: kiet kiet eyediyo eka edem mmɔ: baba owo kiet idinyaŋake fi.