ISAIAH 46 - Edisana ñwed Abasi Ibom

Mme Abasi Ubɔk Owo Idighe Abasi

¹ BEL ɔnuhɔ, Nebo ɔtuhɔ, eda mbiet mmɔ enɔ unam ye ufene: emenere mbiomo mbufo edori; mmɔ edi se mfum-mfum unam obiomde.

² Mmɔ enuhɔ, esɔrɔ ɔtɔ kiet; ikemeke ndida mbiomo mmɔ mbɔhɔ: ndien idem mmɔ eka nte mbuot ekɔŋ.

³ Ufɔk Jacob, ye ofuri nsuhɔ ufɔk Israel, emi emenerede toto ke idibi, enyuŋ ebiomde toto ke itie-eyen, mbufo ekop uyo mi;

⁴ ndien tutu osim usɔŋ ami ndi enye; ami nyenyuŋ mbiom enye tutu osim iwat: edi ami ŋkanam, onyuŋ edi ami ndimenere, ndinyuŋ mbiom, nnyuŋ nnam mbufo ebɔhɔ.

⁵ Mbufo edidɔhɔ, ete ke ami mbiet, nnyuŋ ŋkem ye anie? Edida anie edomo mi, man kiet ebiet kiet?

⁶ Mme ɔduɔŋɔ-ŋkpɔ eyesio gold ye silver ke ekpat, edomo ke balance, eyekpe owo-usɔ inyene: ndien enye ada enye anam abasi: mmɔ enuhɔ, enyuŋ etuak ibuot.

⁷ Eyebiom enye ke afara, eyenim enye ke itie esie, ndien enye eyeda; idisehekede ke ebiet esiemɔ: owo eyeseme ɔnɔ enye ŋko, edi enye idiyereke, idinyaŋake enye isio ke ukut esie.

⁸ Mbufo eti ŋkpɔ emi, enyuŋ enam ido nte owo: mbufo mme ɔsɔŋ ibuot enim enye ke esit.

⁹ Mbufo eti akpa ŋkpɔ ke eset; koro ami ndide Abasi, efen minyuŋ iduhe; ndi Abasi, ndien baba kiet eke ebietde mi iduhe.

¹⁰ Emi nsiakde akpatre ke akpa, ndien ke eset nsiak se minamke kaŋa, nte ke uduak mi eyeda, ndien nyenam kpukpru se mmade.

¹¹ Ŋkot ntrukpom, nte oto ke edem usiaha-utin edi; ŋkot owo uduak esie, nte oto ke anyan idut edi: ŋkɔm mma ndɔhɔ, nyenyuŋ nnam enye edi ŋko; mma mbot, nyenyuŋ nnam enye.

¹² Mbufo mme ɔsɔŋ-esit, emi ekpɔŋde edisana ido anyan usuŋ, ekop uyo mi:

¹³ mmada eti ido nsaŋa ŋkpere; enye idiyomke usuŋ, erinyaŋa mi idinyuŋ ibigike nyenyuŋ nnim erinyaŋa mi ke Zion, nnɔ Israel ubɔŋ mi.