ISAIAH 44 - Edisana ñwed Abasi Ibom

Jehovah Ikpɔŋ Ikpɔŋ Edi Abasi

¹ EDI kop ndien, O Jacob, owo mi, ye Israel emi mmekde:

² Jehovah emi akanamde fi, okonyuŋ obotde fi ke idibi, emi ediŋwamde fi, ɔdɔhɔ ntem, ete, Owo mi Jacob, kufehe ndik, Jerusalem emi mmekde kunyuŋ ufehe.

³ Koro nyeŋwaŋa mmɔŋ nnɔ owo nsat-itɔŋ, nyewaŋa idim ke edisat isɔŋ; nyeŋwaŋa spirit mi nduɔk nditɔ fo ke idem, nyeŋwaŋa nti ŋkpɔ mi nnɔ ubon fo.

⁴ Ndien mmɔ eyefiari nte ke mbiet, ye nte willow ke mben idim mmɔŋ.

⁵ Emi eyedɔhɔ, ete, Ami mmenyene Jehovah; emi ŋko eyeseme okot enyiŋ Jacob, ndien emi eyeda ubɔk esiemɔ ewet, ete, Eke Jehovah, onyuŋ ada enyiŋ Israel adian idem.

⁶ Ntem ke edidem Israel, ye andifak enye, Jehovah mme udim, ɔdɔhɔ, ete, Ami ndi mbemiso, ami nnyuŋ ndi akpatre; ndien baba owo kiet iduhe ke mibɔhɔke ami.

⁷ Ndien anie edikwɔrɔ enye nte ami, onyuŋ etiŋ enye, onyuŋ emenere enye ɔnɔ mi, toto nte ŋkonim mbon eset? Mme anie edinyuŋ emen ŋkpɔ ini iso ye ŋkpɔ eke edidide, etiŋ enɔ mmɔ?

⁸ Mbufo ekudige, ekunyuŋ enyek idem: nte ŋkobukke nnɔ fi, nnyuŋ ntiŋ nnɔ fi ini oko? Nte mbufo inyuŋ idige ntiense mi? Nte Abasi odu ke mibɔhɔke ami? Ŋkɔm akwa itiat iduhe du; mfiɔkke baba kiet.

⁹ Kpukpru mmɔ eke esɔide mbiet edi ikpikpu; ŋkpɔ inemesit mmɔ idinyuŋ idoroke udori; ndien ntiense mmɔ kpa idem mmɔ idikwe, idinyuŋ ifiɔkke, man but anam mmɔ.

¹⁰ Anie owo okobot abasi kiet, onyuŋ anam editara mbiet eke midoroke udori?

¹¹ Sese, but eyenam kpukpru mme nsaŋa esie, mbon-usɔ ke idem mmɔ enyuŋ eto ke owo: kpukpru mmɔ eyesop idem, etuak eda, edikhe, but eyenam mmɔ akpaimɔ.

¹² Odom-utim anam ŋkpɔ-usɔ: onyuŋ anam enye ke ukaŋ; onyuŋ obot enye ke hammer, onyuŋ anam enye ke ubɔk odudu esie. Biɔŋ onyuŋ ɔdɔŋ enye, ndien enye isɔŋɔke idem: iŋwɔŋke mmɔŋ, ndien akpa mba.

¹³ Carpenter anyan uruk, okpok enye ke utibi ŋkpɔ, anam enye ke abaŋa, onyuŋ okpok enye ke compass, onyuŋ anam enye esin ke mbiet owo esin ke uyai owo, man oduŋ ke ufɔk.

¹⁴ Enye ekpi cedar ɔduɔk ke idem esie, onyuŋ ada cypress ye ofriyo, onyuŋ anam enye ɔsɔŋɔ ɔnɔ idem esie ke otu mme eto akai: enye ɔtɔ pine, ndien edim anam enye ɔkɔri.

¹⁵ Ndien enye akabare edi se owo adade abara ikaŋ; enye onyuŋ ada usuk mmɔ ewebe ikaŋ, ŋkɔm enye abara ikaŋ, ndien asaŋ uyo; ŋkɔm enye anam abasi ŋko, ndien owuk ubɔk; enye ada enye ɔsɔi mbiet, ndien ɔnuhɔ ɔnɔ mmɔ.

¹⁶ Ɔfɔp ubak ke ikaŋ; eyeda ubak ata unam ke esit; eyefɔp ɔfɔp, onyuŋ ɔyuhɔ: eyewebe ikaŋ ŋko, ndien ɔdɔhɔ, ete Aha, mmewebe ikaŋ, mmokut ikaŋ.

¹⁷ Ndien enye ada ubak eke ɔsuhɔde anam abasi, edisɔi mbiet esie; eyenuhɔ ɔnɔ enye, onyuŋ owuk ubɔk, onyuŋ ɔbɔŋ akam ɔnɔ enye, onyuŋ ɔdɔhɔ, ete, Nyaŋa mi: koro afo edide abasi mi.

¹⁸ Mmɔ ifiɔkke, inyuŋ inimke ibuot: koro enye emesiri mmɔ enyin, man ekukut; esiri esit mmɔ, man ekudi ɔniɔŋ.

¹⁹ Ndien enye inyimeke ndikabare ŋkere ke esit esie, ifiɔk ye eti ibuot inyuŋ iduhe du, eke enye ɔkpɔdɔhɔde, ete, Mma mfɔp ubak ke ikaŋ; mma nsaŋ uyo ŋko ke ebok ikaŋ esie; mma mfɔp unam nnyuŋ nta: ndien nte ndida se isuhɔde nnam ŋkpɔ mbubiam? nte ndinuhɔ nnɔ ekpat eto?

²⁰ Enye adia ntɔŋ: esit abiaŋa anam enye awaha, ndien enye ikemeke ndinyaŋa ukpɔŋ esiemɔ, idinyuŋ idɔhɔke, ite, Nte nsu iduhe mi ke ubɔk nnasia?

²¹ Ti ŋkpɔ emi, O Jacob, ye Israel; koro afo edide owo mi: mma mbot fi; afo edi owo mi: O Israel, ndifreke fi.

²² Mma nsɔhi mme ukwaŋ-ŋkpɔ fo nte idiɔk enyɔŋ mfep, nsɔhi mme idiɔk ido fo nte obubit enyɔŋ: fiak tiene mi: koro mfakde fi.

²³ O enyɔŋ, mbufo ekwɔ: koro Jehovah amanam: isɔŋ ke idak, sio mkpo: ikpɔ obot, mbufo ebumere ekwɔ; mbufo, akai ye kpukpru eto emi edude ke esit: koro Jehovah afakde Jacob, eyenyuŋ ada ubɔŋ ke Israel.

²⁴ Emi edi uyo Jehovah emi afakde fi, emi okonyuŋ obotde fi osio ke idibi: Ami Jehovah nnam kpukpru ŋkpɔ: ami ikpɔŋ nneŋere ikpa-enyɔŋ; mbri isɔŋ ke idem mi.

²⁵ Enye abiat mme idiɔŋɔ mbon nsu, onyuŋ anam mbia-idiɔŋ edama idat; anam mme ɔfiɔk ŋkpɔ owo efiak edem, onyuŋ onim ifiɔk mmɔ ke ndisime:

²⁶ edi enye ɔsɔŋɔ owuk ikɔ owo esie, onyuŋ anam item mme isuŋutom esie ɔwɔrɔ; emi ɔdɔhɔde Jerusalem, ete, Eyeduŋ enye ke esit; ɔdɔhɔ mme obio Judah, ete, Eyebɔp mmɔ, ami nyenyuŋ ndiɔŋ ŋwure esie:

²⁷ emi ɔdɔhɔde inyaŋ ibom, ete, Sat, nyenyuŋ nnam mme akpa mmɔŋ fo asat:

²⁸ emi ɔdɔhɔde abaŋa Cyrus, ete, Ekpemerɔŋ mi, ndien enye eyenam kpukpru se mmade ama: eyenyuŋ ɔdɔhɔ Jerusalem, ete, Eyediɔŋ fi; ɔdɔhɔ temple, ete, Eyetɔŋɔ ndibɔp fi.