ISAIAH 43 - Edisana ñwed Abasi Ibom

Abasi Ɔŋwɔŋɔ Ndifak Ikɔt Esie

¹ NDIEN ntem ke Jehovah, emi akanamde fi, Jacob, okonyuŋ obotde fi, Israel, ɔdɔhɔ ete, Kufehe; koro ami mfakde fi, ŋkosio fi enyiŋ; afo edi okimmɔ.

² Ke ini afo edisaŋade ke mmɔŋ ebe, ami nyedu ye afo; ye ke mme akpa mmɔŋ, mmɔ idifukke fi: ke ini afo edisaŋade ke ikaŋ udufɔbɔke; edemikaŋ idinyuŋ itaha fi.

³ Koro ami Jehovah ndide Abasi fo; ami Edisana Abasi Israel, ndi Andinyaŋa fi: nda Egypt nnɔ ke ŋkpɔ-ufak fo, nnɔ Kush ye Sheba ke ibuot fo.

⁴ Koro ŋkesede fi ke ŋkpɔ uto, afo emenyene ukpono, ami nnyuŋ mma fi: ndien nyenɔ owo ke ibuot fo, nyenɔ mme idut ke ibuot uwem fo.

⁵ Kufehe, koro ami ndude ye afo: nyeda ubon fo ke edem usiaha-utin ndi, nyetaŋ fi ke edem usop-utin mbon:

⁶ nyedɔhɔ edem edere, nte, Yak nɔ: nyedɔhɔ usuk, nte, Kubaha: da nditɔ-iren mi ke anyan idut di, ye nditɔ-iban mi ke utit ererimbot;

⁷ kpa kpukpru mmɔ eke ekerede enyiŋ mi: ndien mmanam enye mbaŋa ubɔŋ mi, mbot enye, ŋkɔm mmanam enye.

⁸ Sio mbon nnan, ndien mmɔ enyene enyin; sio mbon-inan, ndien mmɔ enyene utɔŋ.

⁹ Kpukpru mme idut emebono ɔtɔ kiet, mme obio emenyuŋ esop idem: anie ke otu mmɔ editiŋ emi, onyuŋ anam nnyin ikop mbemiso ŋkpɔ? Yak mmɔ enɔ ntiense mmɔ, enyuŋ ekaŋ idem mmɔ: ndien yak mmɔ ekop, enyuŋ edɔhɔ, ete, Akpanikɔ.

¹⁰ Jehovah ɔdɔhɔ, ete, Mbufo edi ntiense mi, ye owo emi ŋkemekde: man mbufo efiɔk enyuŋ enim uyo mi ke akpanikɔ, enyuŋ ekut ete ke ami ndi enye: ikebemke mi iso ibot Abasi, baba kiet idinyuŋ itieneke mi edem.

¹¹ Ami, ami ndi Jehovah; ndien baba andinyaŋa kiet iduhe ke mibɔhɔke ami.

¹² Ami ŋketiŋ nnyuŋ nnyaŋa, nnyuŋ nnam mbufo ekop, ndien baba esen abasi kiet iduhe ke otu mbufo: Jehovah onyuŋ ɔdɔhɔ ete, Mbufo edi ntiense mi, ndien ami ndi Abasi.

¹³ Ndien ŋko toto ke usen oro ami ndi enye; ndien baba owo kiet eke ekemede ndisio ke ubɔk mi iduhe; nyenam ŋkpɔ, ndien anie owo edikabare enye?

¹⁴ Ntem ke Jehovah, andifak mbufo, Edisana Abasi Israel, ɔdɔhɔ ete, Ŋkɔdɔŋ utom ke Babylon mbaŋa mbufo, nnyuŋ nsuhɔre mbon itɔk kpukpru mmɔ; ye mme Chaldean, mkpo mmɔ odu ke ubom mmɔ.

¹⁵ Ami ndi Jehovah, Edisana Abasi mbufo, andibot Israel, edidem mbufo.

¹⁶ Emi edi uyo Jehovah emi ɔnɔde usuŋ ke inyaŋ, ye ɔkpɔ-usuŋ ke mkpɔsɔŋ mmɔŋ.

¹⁷ Emi osiode chariot ye horse, mbon-ekɔŋ ye odudu; mmɔ eyesuhɔre ena ɔtɔ kiet, ididahake ke enyɔŋ: mmɔ enime nte ɔfɔŋ utuenikaŋ, emenime.

¹⁸ Mbufo ekuti mbemiso ŋkpɔ, ekunyuŋ ekere ŋkpɔ eset.

¹⁹ Sese, ami mmɔŋ nnam obufa ŋkpɔ, ke emi ke editibe: nte mbufo idifiɔkke enye? Ŋkɔm nyenim usuŋ ke wilderness, ye akpa mmɔŋ ke desert.

²⁰ Unam ikɔt eyetoro mi, mme jackal ye mme ostrich: koro mmɔnɔ mmɔŋ ke wilderness, ye akpa mmɔŋ ke desert, nte ndinɔ; ndimek ikɔt mi se eŋwɔŋde.

²¹ Mma mbot mbio emi nnɔ idem mi; mmɔ eyebuk itoro mi.

²² Ndien afo, O Jacob, usemeke ukot mi: koro ami mfekde fi, O Israel.

²³ Afo ukadaha ŋkpri ufene ufɔp uwa fo usɔk mi, ukonyuŋ ukponoke mi ke mme uwa emem fo. Ŋkesinke fi anam ŋkpɔ mi ke uwa, nnyuŋ nsinke incense efek fi.

²⁴ Afo ukedepke mbɔkɔk ke okuk unɔ mi, ukonyuŋ uyuhɔke mi ke ikpɔŋ mme uwa fo; afo emesin mi nnam ŋkpɔ ke mme idiɔk ido fo ikpɔŋ-ikpɔŋ, omonyuŋ ada mme ukwaŋ-ŋkpɔ fo efek mi.

²⁵ Ami, ami ndi andisɔhi mme idiɔk ido fo mfep mbaŋa idem mi, ndinyuŋ ntihi mme ukwaŋ-ŋkpɔ fo.

²⁶ Nam mi nti: yak nnyin ikpe ikɔ ɔtɔ kiet: afo tiŋ man akaŋ idem fo.

²⁷ Akpa usɔ akanam idiɔk, mme mmɔ emi esiande fi enyuŋ esɔŋ ibuot ye ami.

²⁸ Ndien nyesabare ndisana mbɔŋ, nnyuŋ nda Jacob nnɔ nsobo, nda Israel nnɔ nduari.