ISAIAH 39 - Edisana ñwed Abasi Ibom

Mme Isuŋ Utom Eto ke Babylon Ebine Edidem Hezekiah

¹ KE ini oro Merodach-baladan eyen Baladan, edidem Babylon, ɔnɔ ŋwed ye enɔ esɔk Hezekiah; enye onyuŋ okop ete ke enye ɔkɔdɔŋɔ, ndien okop idem.

² Ndien Hezekiah adat esit abaŋa mmɔ, onyuŋ owut mmɔ ufɔk unim-ŋkpɔ-uto esie, ye silver, ye gold, ye ufuɔŋkpɔ, ye eti aran, ye ofuri ufɔk ŋkpɔ-ekɔŋ esie, ye kpukpru se idude ke ebiet unim-ŋkpɔ-uto esie: baba ŋkpɔ kiet eke Hezekiah miwutke mmɔ iduhe ke ufɔk esie, ye ke ofuri edem emi enye akarade.

³ Ndien Isaiah prophet aka ke ɔtɔ edidem Hezekiah, okobup enye, ete, Mbon emi ekedɔhɔ fi didie? Mmɔ enyuŋ eto mmɔŋ etiene fi? Ndien Hezekiah ɔdɔhɔ, ete, Mmɔ eketo ke anyan idut, kpa ke Babylon, edi ke ebiet mi.

⁴ Ndien enye obup ete, Mmɔ ekekut nso ŋkpɔ ke ufɔk fo? ndien Hezekiah ɔbɔrɔ, ete, Mmɔ ekekut kpukpru se idude ke ufɔk mi: baba ŋkpɔ kiet eke mmeŋkowutke mmɔ iduhe ke otu ŋkpɔ-uto mi.

⁵ Ndien Isaiah ɔdɔhɔ Hezekiah, ete, Kop uyo Jehovah mme udim: Sese, mme usen ke edi,

⁶ eke mmɔ edimende kpukpru se idude ke ufɔk fo, ye eke mme usɔ ekekɔde enim tutu osim mfin emi, eka ke Babylon. Jehovah ɔdɔhɔ, ete,

⁷ Baba ŋkpɔ kiet idisuhɔke. Ndien mmɔ eyeda ndusuk nditɔ fo, eke editode fi ke idem, eke afo edibonde, efep; ndien mmɔ eyedi eunuch ke ufɔk edidem Babylon.

⁸ Ndien Hezekiah ɔdɔhɔ Isaiah, ete, Ikɔ Jehovah emi afo ɔdɔhɔde ɔfɔn. Enye onyuŋ ɔdɔhɔ ete, Koro emem ye akpanikɔ eyedu ke eyo mi.