ISAIAH 38 - Edisana ñwed Abasi Ibom

Edidem Hezekiah Ɔdɔŋɔ Udɔŋɔ Ndien Abasi Ɔkɔk Enye

¹ KE ini oro Hezekiah ɔdɔŋɔ oyom ndikpa. Ndien Isaiah prophet eyen Amoz edi ke ɔtɔ esie, edidɔhɔ enye, ete, Ntem ke Jehovah ɔdɔhɔ ete, Nɔ item baŋa ufɔk fo: koro afo ɔmɔŋ akpa, udunyuŋ uduhe uwem.

² Ndien Hezekiah akabare iso esie ese ibibene, onyuŋ ekpe Jehovah ubɔk.

³ Ndien enye ɔdɔhɔ ete, Mbɔk, mbɔk, Jehovah, mbɔk, ti nte nsaŋade ke iso fo ke akpanikɔ ye ke ofuri esit, nyuŋ nam se ifɔnde fi ke enyin; ndien Hezekiah atua eyet eti-eti.

⁴ Ndien uyo Jehovah osim Isaiah, ete,

⁵ Ka kɔdɔhɔ Hezekiah, ete, Ntem ke Jehovah, Abasi David usɔ ɔdɔhɔ, ete, Mmokop mkpe-ubɔk fo, mmokut mmɔŋeyet fo: sese, nyekɔt isua efut ke mme usen fo.

⁶ Nyenyuŋ nnyaŋa fi ye obio emi nsio ke ubɔk edidem Assyria; nnyuŋ ŋkpeme obio emi.

⁷ Ndien emi edi idiɔŋɔ fo emi otode Jehovah, ete ke Jehovah eyenam ŋkpɔ emi enye ɔdɔhɔde:

⁸ Sese, ami nyenam mfut mme ikpat emi esaŋade ye utin esuhɔre ke dial Ahaz, afiak edem ikpat duop. Ntre ke utin afiak edem ikpat duop, ekem ye ikpat oro enye ɔkɔsuhɔrede.

⁹ Ŋwed Hezekiah edidem Judah, ke ini enye ɔkɔdɔŋɔde, ndien okop ŋsɔŋidem udɔŋɔ esie:

¹⁰ Ami ŋkɔdɔhɔ ke ufɔt eyo uwem mi, ete, Nyeka ŋkoduk ke usuŋ obio ekpo: emebɔ mi isua mi emi esuhɔde.

¹¹ Ŋkɔdɔhɔ nte, Ŋdikwe aba Jah, Jah, ke isɔŋ mme odu-uwem; ndisehe aba owo ye mme andiduŋ obio ekpo.

¹² Ewuhɔre enyuŋ efuhɔre iduŋ mi ebɔ mi, nte efe ekpemerɔŋ. Mfut uwem mi nte ɔdɔk-ɔfɔŋ: enye osibe mi ke etak ndidi efep; toto ke uwemeyo tutu osim ke okoneyo ke Enye ama ye ami.

¹³ Ntie suŋ mbet tutu osim ke usenubɔk, nte lion, ntem ke enye edibuŋ mi kpukpru ɔkpɔ: toto ke uwemeyo tutu osim ke okoneyo ke enye ama ye ami.

¹⁴ Kpa nte akaraŋ Abasi ye akpantana, kpa ntre ke nsioro uyo; nseme nte ibiom: enyin okim mi ke erise enyɔŋ: O Jehovah, ntie ke nnanenyin, tie ubiɔŋ nɔ mi.

¹⁵ Ndidɔhɔ didie? enye ɔkɔdɔhɔ mi, Enye onyuŋ anam: nyesaŋa suŋ kpukpru isua mi, mbaŋa idot ukpɔŋ mi.

¹⁶ O Ɔbɔŋ, owo eda mme mmɔ emi edu uwem, ndien ofuri uwem spirit mi odu mmɔ ke esit: afo eyenyuŋ edemere mi, onyuŋ onim mi ke uwem.

¹⁷ Sese, ata idot amakabare edi emem ye ami: ndien afo amama ukpɔŋ mi osio ke obube nditaha; koro afo ɔmɔduɔk kpukpru mme idiɔk ido mi ke edem fo.

¹⁸ Koro obio ekpo midikɔmke fi, mkpa midinyuŋ itoroke fi; mmɔ eke esuhɔrede ke obube ididorike enyin mmɔ ke akpanikɔ fo.

¹⁹ Odu-uwem, idem odu-uwem eyekɔm fi, kpa nte ami nnamde mfin: Ete eyesian akpanikɔ fo ɔnɔ nditɔ.

²⁰ Jehovah mmɔŋ edinyaŋa mi: ndien nnyin iyekwɔ ikwɔ mi ke ofuri usen uwem nnyin ke ufɔk Jehovah.

²¹ Ndien Isaiah ɔkɔdɔhɔ, ete emen ebok edisat fig enam emem, edian ke oyo oro, ndien enye eyekop idem.

²² Hezekiah onyuŋ ɔdɔhɔ, ete, Nsidi idiɔŋɔ ete ke ami ndidɔk ke ufɔk Jehovah?