ISAIAH 37 - Edisana ñwed Abasi Ibom

Abasi Anyaŋa Judah Osio ke Ubɔk Edidem Sennacherib

¹ EDIKEM, adaŋemi, edidem Hezekiah okopde, enye onyuŋ awai edisine-nkpɔ esiemɔ, onyuŋ ofuk idem ke ɔfɔŋ ikpo, ndien oduk ke ufɔk Jehovah.

² Ndien enye ada Eliakim, eyen Hilkiah emi akarade ufɔk, ye Shebna ewet-ŋwed, ye mbiowo mme oku, emi efukde ɔfɔŋ ikpo ke idem, ɔdɔŋ mmɔ utom ke ebiet Isaiah prophet, eyen Amoz.

³ Ndien mmɔ edidɔhɔ enye, ete, Ntem ke Hezekiah ɔdɔhɔ, ete, Usen ukut, ye eke nduari, ye eke esuene edi emi: koro nditɔ emekpere uman ndien odudu uman iduhe.

⁴ Mme Jehovah Abasi fo eyekop ikɔ Rabshakeh emi ete esie edidem Assyria ɔkɔdɔŋde ndisuene Abasi uwem; onyuŋ asua ɔnɔ ikɔ emi Jehovah Abasi fo okopde: menere ndien mkpeubɔk baŋa nsuhɔ emi edude mi.

⁵ Ntem ke ikɔt edidem Hezekiah eka ke ɔtɔ Isaiah. Ndien Isaiah ɔdɔhɔ mmɔ, ete,

⁶ Ntem ke mbufo edidɔhɔ ete mbufo, ete, Ntem ke Jehovah ɔdɔhɔ, ete, Kufehe ubaŋa ikɔ oro afo okokopde, emi ikɔt edidem Assyria edade esuene mi.

⁷ Sese, ami mmɔŋ nyom ndisin enye spirit ke idem, ndien enye eyekop etop, ndien ɔnyɔŋ ke edem mmɔ; ndien nyenam enye ɔduɔ ke ofut ke edem mmɔ.

⁸ Ndien Rabshakeh afiak okosim edidem Assyria nte enye aŋwanade ekɔŋ ye Libnah: koro enye okokopde, ete ke enye akadaha ke Lachish.

⁹ Ekem, enye okop ebaŋa Tirhakah edidem Ethiopia, ete, Enye ɔmɔwɔrɔ edi ekɔŋ ye afo. Ndien ke adaŋemi enye okopde, enye ɔdɔŋ mme isuŋutom ke ɔtɔ Hezekiah, ete,

¹⁰ Ntem ke mbufo edidɔhɔ Hezekiah edidem Judah, ete, Kuyak Abasi fo emi afo eberede idem ke esit, abiaŋa fi, ete Ididaha Jerusalem isin ke ubɔk edidem Assyria.

¹¹ Sese, afo omokop se ndidem Assyria ekenamde ye kpukpru mme idut ke erisobo mmɔ. Ndien nte afo edibɔhɔ?

¹² Nte mme abasi mme idut ekenyaŋade mmɔ emi mme ete mi ekesobode, kpa Gozan, ye Haran, ye Rezeph, ye nditɔ Eden emi ekedude ke Telassar?

¹³ Enye edidem Hamath, ye edidem Ar-pad, ye edidem obio Sepharvaim, ye Hena, ye eke Ivvah?

¹⁴ Ndien Hezekiah ɔbɔ mme isuŋ-utom ŋwed oro ke ubɔk, onyuŋ okot enye. Ndien Hezekiah ɔdɔk aka ke ufɔk Jehovah, akatat enye ke iso Jehovah.

¹⁵ Ndien Hezekiah ekpe Jehovah ubɔk, ete,

¹⁶ O Jehovah mme udim, Abasi Israel, emi oduŋde ke otu mme cherubim, edi afo ke idem fo ikpɔŋ-ikpɔŋ edi Abasi kpukpru mme idut ererimbot: edi afo akanam enyɔŋ ye isɔŋ.

¹⁷ O Jehovah, kpaŋ utɔŋ fo nyuŋ kop: O Jehovah, tat enyin fo nyuŋ se: nyuŋ kop kpukpru ikɔ Sennacherib emi ɔdɔŋde edisuene Abasi uwem.

¹⁸ Ke akpanikɔ, O Jehovah, ndidem Assyria ema esuan kpukpru mme obio ye isɔŋ mmɔ;

¹⁹ ema enyuŋ esin mme abasi mmɔ ke ikaŋ: koro mmɔ mikedige Abasi, edi se ubɔk owo akanamde, kpa eto ye itiat: ndien esobo mmɔ.

²⁰ Mbɔk, ndien, O Jehovah Abasi nnyin, nyaŋa nnyin sio ke ubɔk esie, ndien kpukpru mme idut ererimbot eyefiɔk ete ke afo ikpɔŋ-ikpɔŋ edi Jehovah.

²¹ Ndien Isaiah eyen Amoz ɔdɔŋ ekedɔhɔ Hezekiah, ete, Ntem ke Jehovah Abasi Israel ɔdɔhɔ, ete Emi afo ekekpede mi ubɔk abaŋa Sennacnherib edidem Assyria:

²² ikɔ emi ke Jehovah ɔdɔhɔ abaŋa enye ete, Adiaha Zion eyenɔwɔŋ esin fi ke ndek, onyuŋ asak fi nsahi; adiaha Jerusalem enyeŋe ibuot ke edem fo.

²³ Afo okosuŋi onyuŋ esuene anie? okonyuŋ emenere uyo fo ke enyɔŋ, onyuŋ emenere enyin fo ke enyɔŋ abaŋa anie? Ke abaŋa Edisana Abasi Israel.

²⁴ Afo amada ubɔk ikɔt fo osuŋi Ɔbɔŋ, onyuŋ ɔdɔhɔ, ete, “Ami nda ediwak chariot mi ndɔk ke enyɔŋ ikpɔ obot, ye ke ŋkaŋ Lebanon; ndien nyekpeŋe ŋko-koŋo cedar esie, ye ndimek fir esie: nyenyuŋ nsin ata akpatre nsom esie, kpa eti iŋwaŋ akai esie.

²⁵ Ami mma ntibi isɔŋ nnyuŋ ŋŋwɔŋ, nyenyuŋ nda ikpat ukot mi nnam kpukpru mme akpa mmɔŋ Egypt esat.”

²⁶ Nte afo ukokopke? Ŋkanam enye ke eyo oko, ke ini eset, ŋkonyuŋ mbot enye. Ke emi ke nnam enye osu, ndien afo eyedi se idiwuride obio ibibene inam mmɔ edi ndon.

²⁷ Ndien mme andiduŋ mmɔ isɔŋke ubɔk, mmɔ edikhe, but onyuŋ anam mmɔ: mmɔ edi ikɔŋ ikɔt, kpa awawa ikɔŋ, mbiet ɔkɔm ufɔk, ye ibokpot eke akpade ke mika-ikɔrike.

²⁸ Edi mmɔfiɔk itie fo, ye eriwɔrɔ fo, ye eriduk fo, ye nte afo ayatde esit ye ami.

²⁹ Koro iyaresit fo ye ami, ye usɔŋ-enyin fo edɔkde ediduk mi ke utɔŋ, mmɔdo ndisinde fi mkpanuen mi ke ibuo, ye uruk mi ke mkpɔk-inua, ndien nyenam fi afiak ke usuŋ emi afo akasaŋade ke esit edi.

³⁰ Ndien emi edi idiɔŋɔ fo: mbufo edia se iditibede ke idem esie mbun; enyuŋ edia se oro editibede ke idem esie ebem; ndien ke ɔyɔhɔ isua ita, mbufo etɔ enyuŋ ekpeŋe, enyuŋ etɔ iŋwaŋ-vine, enyuŋ edia mfri mmɔ.

³¹ Ndien ubak ufɔk Judah emi ɔbɔhɔde onyuŋ ɔsuhɔde eyetɔŋɔ ntak omum oruŋ esie ke isɔŋ, onyuŋ oŋwum idem ke enyɔŋ:

³² koro mmɔ eke esuhɔde eyeto ke Jerusalem, ubak eke ɔbɔhɔde eyenyuŋ oto ke obot Zion: ufup Jehovah mme udim edinam emi.

³³ Mmɔdo ntem ke Jehovah ɔdɔhɔ abaŋa edidem Assyria, ete, Enye ididukke ke obio emi, idinyuŋ itopke idaŋ do, idinyuŋ idaha otu-ekɔŋ idi enye ke iso, idinyuŋ ikubike ibombom inɔ enye.

³⁴ Ke usuŋ emi enye akasaŋade ke esit edi ke enye edisaŋa ɔnyɔŋ, edi enye ididukke ke obio emi.

³⁵ Emi edi uyo Jehovah. Ndien ami nyekpeme obio emi nnyuŋ nnyaŋa enye, mbaŋa idem mi, nnyuŋ mbaŋa David owo mi.

³⁶ Ndien angel Jehovah ɔwɔrɔ okowot tɔsin owo itie ikie ye anaŋ, ye tɔsin owo ition, ke nna-ekɔŋ Assyria; ndien ke mmɔ ebakde edemere ke usenubɔk, sese, kpukpru mmɔ edi okpo-okpo.

³⁷ Ndien Sennacherib edidem Assyria adaha, ɔnyɔŋ aka okoduŋ ke Nineveh.

³⁸ Edikem ke ini enye ɔbɔbɔŋ akam ke ufɔk Nisroch abasi esie, Adrammelech ye Sharezer, nditɔ esie, ewot enye ke ofut; ndien mmɔ ebɔhɔ eka ke edem Ararat; ndien Esarhaddon eyen esie ada ubɔŋ ke itie esie.