ISAIAH 35 - Edisana ñwed Abasi Ibom

Abasi Eyedɔŋ Ikɔt Esie Esit

¹ WILDERNESS ye nsat-isɔŋ eyedara; desert eyenyuŋ ebre, onyuŋ asiaha ikɔŋ nte rose.

² Eyediɔŋ asiaha ikɔŋ, onyuŋ ebre mbre, onyuŋ ɔkwɔ: eyenɔ enye ubɔŋ Lebanon, ye uyai Carmel ye Sharon; mmɔ eyekut ubɔŋ Jehovah, uyai Abasi nnyin.

³ Mbufo esɔŋ mmeme ubɔk, enyuŋ esin odudu ke edɔŋ eke efumde.

⁴ Mbufo edɔhɔ mbon nnyekesit, ete, Mbufo esɔŋ esit, ekudikhe: sese Abasi mbufo: ufen ke edi, usiene Abasi; enye eyedi edinyaŋa mbufo.

⁵ Ndien enyin eyeŋwaŋa mme nnan, utɔŋ eyenyuŋ esirere mbon inan.

⁶ Ndien mbuŋɔ eyenek nte edop, edeme imum eyenyuŋ ɔkwɔ: koro mmɔŋ asiahade ke wilderness, idim ŋko ke desert.

⁷ Ndien mirage eyekabare edi mkpɔdiɔhɔ-mmɔŋ, nsat-isɔŋ eyekabare edi ebiet eke mmɔŋ otopde ɔwɔrɔ: ke iduŋ jackal, emi enye anade ke esit, mbiet eyetibe ye nnyanyaŋa isantim, ye mkpɔŋ-isɔŋ.

⁸ Ndien ɔkpɔ-usuŋ eyedu do, ye usuŋ, ndien enye eyekere usuŋ edinen owo; baba edidehe ŋkpɔ kiet idinyuŋ isaŋake ke esit ibe; ndien eyedi eke mmɔ; mbon isaŋ, idem mme anana ibuot, ididuehe.

⁹ Lion ididuhe do, idiɔk unam idinyuŋ idɔkke ke esit, idikwe enye do; edi mmɔ eke efakde mmɔ eyesaŋa do:

¹⁰ ndien mmɔ eke Jehovah akafakde eyefiak edi ke Zion ekwɔ ikwɔ, nsinsi idaresit onyuŋ ayara mmɔ ke ibuot: mbre ye idaresit eyesim mmɔ, mfuhɔ ye eseme eyefeŋe.