ISAIAH 34 - Edisana ñwed Abasi Ibom

Abasi Eyeŋwaŋa Ifutesit Esie Ɔduɔk Mme Idut

¹ MBUFO mme idut edi edikop; mbufo mme obio enyuŋ ekpaŋ utɔŋ: yak ererimbot ye se iyɔhɔde ke esit ekop; ye isɔŋ ye se itibede ke esit.

² Koro Jehovah ayatde esit ye kpukpru mme idut, onyuŋ ofutde esit ye kpukpru mme udim ekɔŋ mmɔ: enye omonim mmɔ ɔnɔ nsobo; ɔnɔ mmɔ, ete eda ekewot.

³ Ndien eyemen mmɔ eke ekpaŋade afai, eduɔŋɔ, ndien utebe mme okpo mmɔ eyedɔk, iyip mmɔ eyenyuŋ anam ikpɔ obot etara.

⁴ Ndien ofuri udim enyɔŋ eyeyemere, ikpa-enyɔŋ eyenyuŋ eŋwine nte ikpa-ŋwed: ndien ofuri udim mmɔ eyekeŋe kpa nte ikɔŋ ekeŋede ke vine, ye nte nyemere ikɔŋ ekeŋede ke eto fig.

⁵ Koro ofut mi ɔŋwɔŋde ŋkpɔ ɔyuhɔ ke enyɔŋ: sese, enye eyesuhɔre Edom ke idem, ndikpe ikpe idut emi nnimde nnɔ nsobo.

⁶ Jehovah emenyene ofut, enye ɔmɔyuhɔ iyip, emeyere aran ikpɔŋ-unam, ke iyip nditɔ-erɔŋ ye eke okpo ebot, ke aran ekput okukim: koro Jehovah enyenede uwa ke Bozarah, ye akamba eriwot ke isɔŋ Edom.

⁷ Mme editim eyesuhɔre ye mmɔ ŋko, ye mme abak enaŋ ye nyara enaŋ; ndien isɔŋ mmɔ eyeŋwɔŋ iyip ɔyuhɔ, ikpɔŋ unam eyenyuŋ anam ntan-isɔŋ mmɔ esehe.

⁸ Koro Jehovah onimde usen usiene, onim isua utip abaŋa ikɔ Zion.

⁹ Ndien mme idim mmɔŋ esie eyekabare edi itai, ntan esie onyuŋ akabare edi brimstone, isɔŋ esie onyuŋ akabare edi itai eke asakde.

¹⁰ Idinimeke ke uwemeyo ye ke okoneyo; nsuŋikaŋ esie eyedɔk ke nsinsi: eyena ke nsobo ke ofuri emana; baba owo kiet idisaŋake ke esit ibe tutu amama.

¹¹ Ndien ikpaŋ ye ebiɔŋ eyeda enye enyene; akpantana ye raven eyeduŋ ke esit: ndien enye eyeda uruk nsobo, ye mme itiat unana-ŋkpɔ anyan ke esit.

¹² Mme aba-itiat esie eke owo baba kiet miduhe ke esit, eyedi se idikerede obio edidem; ndien baba owo mbɔŋ esie kiet ididuhe aba.

¹³ Ndien ŋkukim eyekɔri ke ikpɔ ufɔk esiemɔ, mbarekpe ye akpap, ke mkpɔsɔŋ ebiet esie. Enye eyenyuŋ edi iduŋ mme wolf, ye okure mme jackal.

¹⁴ Ndien mme unam ikɔt eyesobo ye mme unam ntuaŋa, idet-idet unam eyefiori okot nsaŋa esie; unam okoneyo ŋko onyuŋ ana do, onyuŋ okut nduɔk-odudu ke idem esie.

¹⁵ Do ke ɔkpɔtɔ-itiat edinam efɔk esiemɔ, onyuŋ esin nsen, onyuŋ obot, onyuŋ ofuk nditɔ ke mfut esie; mme utere ŋko-ŋko eyebono do, kiet ye nsaŋa esie, kiet ye nsaŋa esie.

¹⁶ Mbufo eduŋɔre ke ŋwed Jehovah, enyuŋ ekot: baba kiet ke otu mmɔ isopke, baba kiet inanake nsaŋa esie: koro edi inua mi owuk, onyuŋ edi spirit esie obon mmɔ.

¹⁷ Ndien enye emesin afia ɔnɔ mmɔ, ubɔk esie omonyuŋ ada uruk abahare enye ɔnɔ mmɔ: ndien mmɔ eyeda enye enyene ke nsinsi, enyuŋ eduŋ ke esit ke ofuri emana.