ISAIAH 31 - Edisana ñwed Abasi Ibom

Abasi Eyekpeme Jerusalem Ikɔt Esie

¹ IFƆNKE fɔn inɔ mmɔ eke esuhɔrede ke Egypt eyom owo eke aŋwamde mmɔ; enyuŋ eberede idem ke horse, enyuŋ ebuɔtde idem mmɔ ke chariot, koro ewakde; ye ke mbio horse, koro mmɔ esɔŋɔde eti-eti; edi mmɔ isehe Edisana Abasi Israel, inyuŋ iyomke Jehovah!

² Edi enye ŋko ɔfiɔk ŋkpɔ, onyuŋ ada idiɔk-ŋkpɔ edi, enye ikabakede uyo esie; edi adaha ke enyɔŋ ɔtɔhɔ ye ufɔk mme oburobut owo, ye mmɔ emi eŋwamde mme anam-idiɔk.

³ Edi Egypt edi owo, idige Abasi; ndien mme horse mmɔ edi obukidem, idige spirit. Ndien Jehovah eyemenere ubɔk esiemɔ, ndien owo eke aŋwamde eyetuak ukot, ndien owo eke enye aŋwamde eyenyuŋ ɔduɔ, ndien eyesobo kpukpru mmɔ ɔtɔ kiet.

⁴ Koro ntem ke Jehovah ɔdɔhɔ mi, ete, Kpa nte lion ye abak lion ekunide ebaŋa unam mmɔ, emi mmɔ ekotde otu mme ekpeme-ufene ete ediwot enye, edi uyom mmɔ inamke enye ndik, iwok mmɔ inyuŋ inamke esit akpa enye; kpasuk ntre ke Jehovah mme udim edisuhɔre aŋwana ekɔŋ ke akamba obot Zion, ye ke ekpri obot esie.

⁵ Kpa nte inuen efede, kpasuk ntre ke Jehovah mme udim edifuk Jerusalem, ofuk onyuŋ anyaŋa; ebe, onyuŋ anam ɔbɔhɔ.

⁶ Mbufo nditɔ Israel, ekabare etiene Enye emi emiomde eti-eti.

⁷ Koro ke usen oro kpukpru owo eyesua ibɔk silver mmɔ, ye ibɔk gold mmɔ, emi mme idiɔk ubɔk mbufo ekenamde enɔ mbufo.

⁸ Ndien Assyria eyeduɔ ke ofut, idige eke owo; ofut Enye mi midige owo eyenyuŋ adia enye; ndien enye eyefehe mbak ofut, mbon-ekɔŋ esie eyenyuŋ ekabare etomo utomo.

⁹ Ndien ndik eyenam akwa itiat esie ebe, ɔfɔŋ-etak-ubom eyenyuŋ anam mme etubom esie edikhe: emi edi uyo Jehovah emi enyenede ikaŋ ke Zion, ye otuŋ ikaŋ ke Jerusalem.