ISAIAH 27 - Edisana ñwed Abasi Ibom

Edinyaŋa ye Editaŋ Mbok Nditɔ Israel

¹ KE usen oro Jehovah eyeda ofut esie emi ɔsɔŋde onyuŋ okponde, onyuŋ odobide, anam Leviathan, ɔsɔp-ukot uruk-ikɔt oro; anam Leviathan uruk-ikɔt emi awaŋade; onyuŋ owot kukubarakpa emi odude ke inyaŋ.

² Ke usen oro, mbufo ekwɔ ebaŋa vine ntem:

³ Ami Jehovah ŋkpeme enye, mbebit enye kpukpru ini: ŋkpekpeme enye ke okoneyo ye uwemeyo, mbak owo edinam enye ŋkpɔ.

⁴ Ifuresit iduhe mi ke idem: akpap ye ŋkukim ekpekam eyi ke ekɔŋ ye ami, ŋkpobumere nduk ke esit, mfɔp mmɔ ini kiet.

⁵ Midige ntre, yak enye omum odudu mi, onyuŋ anam emem ye ami: yak enye anam emem ye ami.

⁶ Ke eyo emi edide, Jacob eyemum oruŋ ke isɔŋ: Israel eyesehe onyuŋ asiaha ikɔŋ, onyuŋ ada mbuŋwum ɔyɔhɔ ke iso ererimbot.

⁷ Nte enye ɔkɔtɔ enye, nte ɔtɔde anditɔ enye? Nte ekewot enye, nte mmɔ emi andiwot enye okowotde?

⁸ Afo ɔtɔhɔ ye enye ke ufat, osio enye efep: emen enye efep ke ɔkpɔsɔŋ ofum esie, ke usen ofum ikɔrabak.

⁹ Mmɔdo emi osiode isop Jacob; emi onyuŋ edi ofuri mfri, ke emen idiɔk ido esie efep; ke enye onimde mme itiat itie-uwa nte itiat ndom eke enuakde mbai-mbai, mme eto-mkpe ye mbiet utin ididaha aba.

¹⁰ Koro obio ibibene edide ndobo, iduŋ eke ewɔrɔde enyuŋ ekpɔŋde nte wilderness: do ke eyen enaŋ edita mbiet, do ke enye edinyuŋ ɔsuhɔre ana, onyuŋ ata ŋkɔk esie ama.

¹¹ Ke ini ŋkɔk esie esatde, eyebuŋ mmɔ efep; iban eyedi, edibara ikaŋ ke esit: koro mmɔ midige mbon asian; oro esin Andinam mmɔ mituaha mmɔ mbɔm, esin Andibot mmɔ mifɔnke ido ye mmɔ.

¹² Ndien ama ekem ke usen oro, Jehovah eyetuak, ɔtɔŋɔde ke isɔŋ akpa tutu osim ke idim Egypt, ndien eyetaŋ mbufo kiet kiet ebon, O nditɔ Israel.

¹³ Ama onyuŋ ekem ke usen oro, eyefuri akwa ukorowo, ndien mmɔ eke esopde ke isɔŋ Assyria, ye mmɔ eke esuanade ke isɔŋ Egypt, eyedi edituak ibuot enɔ Jehovah ke edisana obot ke Jerusalem.