ISAIAH 23 - Edisana ñwed Abasi Ibom

Etop Emi Abaŋade Ŋwure Idut Tyre ye Zidon

¹ UYO Abasi emi abaŋa Tyre. Mbufo ubom mbakara Tarshish etuaŋa: koro enye abiarade, ufɔk iduhe, eriduk iduhe: etie ke isɔŋ Kittim eyarare emi enɔ mmɔ.

² Mbufo mme andiduŋ mben inyaŋ, edop uyo; mbon-urua Zidon ewat ke inyaŋ ebe eda ŋkpɔ ediyɔhɔ fi.

³ Ndien mkpasip Shihor odu akamba mmɔŋ, ukpeŋe akpa mmɔŋ oduk enye ke ubɔk; ndien enye edi ebiet urua mme idut.

⁴ Yak but anam fi, O Zidon: koro inyaŋ, kpa ɔkpɔsɔŋ obio inyaŋ ɔdɔhɔde, ete, Uman itukke mi, nnyuŋ mmanke eyen, nnyuŋ mbɔkke mkparawa, nnyuŋ ŋkɔhɔ nditɔ-iban.

⁵ Etop Tyre abiak mmɔ, kpa nte etop Egypt.

⁶ Mbufo ebe eka Tarshish; mbufo mme andiduŋ mben inyaŋ etuaŋa.

⁷ Nte emi edi obio mbre mbufo? ukai esie edi toto ke ata eset; ukot esie eyeda enye aka okuduŋ anyan ebiet.

⁸ Anie amaduak emi abaŋa Tyre, andinɔ anyanya, emi amasin esie edide mbɔŋ, mbon-urua esie edi ikpɔ owo ererimbot?

⁹ Jehovah mme udim aduak emi, man enye abiat iseri ofuri ubɔŋ, onyuŋ ɔsuhɔre kpukpru mbon ukpono ererimbot.

¹⁰ Saŋa ke isɔŋ fo be, nte akpa mmɔŋ, O adiaha Tarshish! ubɔp-ŋkpɔ iduhe aba.

¹¹ Enye ekemenere ubɔk esie ke enyɔŋ inyaŋ, enyeŋe mme idut: Jehovah ama ɔnɔ uyo abaŋa Canaan, ete ebiat mkpɔsɔŋ obio esie.

¹² Enye onyuŋ ɔdɔhɔ ete, Afo udubreke aba mbre, afo eyen-aŋwan emi etukde, adiaha Zidon: daha ke enyɔŋ, be ka ke Kittim; edi do ŋko afo ududuɔkke odudu.

¹³ Se isɔŋ mme Chaldee; obio emi ikoduhe: Assyria ɔtɔŋɔ ndibɔp enye nnɔ mbon ikɔt; mmɔ eneŋere mme tower mmɔ ewuk: ewuri ikpɔ ufɔk esie; owo onim enye ke ŋkpɔ nditaha.

¹⁴ Mbufo ubom Tarshish, etuaŋa: koro ɔkpɔsɔŋ obio mbufo omosobo.

¹⁵ Ndien ama ekem ke usen oro, eyefre Tyre ke isua ata ye duop, ekem ke eyo edidem kiet: ndien ke utit isua ata ye duop, ŋkpɔ eyetibe ɔnɔ Tyre nte ikwɔ akpara;

¹⁶ “Men harp, kanare obio, afo akpara emi owo efrede; tim tuak uruk, kwɔ ediwak ikwɔ, man eti fi.”

¹⁷ Ndien ama ekem ke utit isua ata ye duop, Jehovah eyeka ekese Tyre, ndien enye eyefiak ke utip esiemɔ, onyuŋ anam ido akpara ke kpukpru mme idut ke ererimbot ke iso isɔŋ.

¹⁸ Ndien utip esie ye udori esie eyekabare edi edisana ŋkpɔ Jehovah: mmɔ idinimke enye, idinyuŋ ibonke enye: koro udori esie eyekabare edi se mmɔ eke eduŋde ke iso Jehovah edade edia eyuhɔ, enyuŋ esine ata eti edisine-ŋkpɔ.