ISAIAH 21 - Edisana ñwed Abasi Ibom

Ŋkukut Abaŋade Nsobo Babylon ye Edom ye Arabia

¹ UYO Abasi emi abaŋa wilderness inyaŋ. Kpa nte oyobio otode ke usuk, kpa ntre ke enye oto ke wilderness, ke isɔŋ ndik, edi.

² Ke ewut mi ɔkpɔsɔŋ ŋkukut; andibume ke obume, andibiat ke abiat. Elam, dɔk: Media, kankuk. Mmanam ofuri eseme esie odop.

³ Oro esin ata ndik ɔyɔhɔ mi ke isin: ubiak omum mi, nte ubiak aŋwan uman: se ŋkopde anam idem esiŋede mi; se ŋkutde esin mi ndutime.

⁴ Esit etimere mi, mkpa-idem enyeŋe mi: enye amakabare okoneyo inemesit mi onim ke ŋkpɔ unyek-idem ɔnɔ mi.

⁵ Nim okpokoro, nim mbon ukpeme, dia, ŋwɔŋ. Mbɔŋ, mbufo edaha ke enyɔŋ eyet otuekɔŋ aran.

⁶ Koro ntem ke Ɔbɔŋ ɔdɔhɔ mi, ete, Ka konim owo ukpeme, yak enye obuk se okutde. Ndien enye ama okut mbon udoro,

⁷ mme odoro horse iba-iba, ye mme odoro ass, ye mme odoro camel, yak enye akpaŋ utɔŋ ata akamba eti-eti.

⁸ Ndien enye etie ke enyɔŋ tower ofiori nte lion, ete, “Obɔŋ, ami ndada kpukpru ini ke uwem-eyo, enyuŋ enim mi ke itie-ukpeme ke ofuri okoneyo: ndien sese, emi ke edi; mbon udoro, mme odoro horse iba-iba.”

⁹ Ndien enye ɔbɔrɔ ete, Babylon ɔmɔduɔ, ɔmɔduɔ; enye omonyuŋ anuak kpukpru edisɔi mbiet mme abasi esie adian ke isɔŋ.

¹⁰ O ikɔt mi emi edigide, O eyen itie udigi mi ŋko! mmasian mbufo se ŋkopde ye Jehovah mme udim, Abasi Israel.

¹¹ Uyo Abasi emi abaŋa Dumah. Owo etie ke Seir ofiori okot mi, ete, Andikpeme, edi ŋkanika ifaŋ ke okoneyo? Andikpeme, edi ŋkanika ifaŋ ke okoneyo?

¹² Andikpeme ɔdɔhɔ, ete, Usenubɔk ke edi, ye okoneyo ŋko: edieke mbufo eyomde ndibup, ebup: efiak edi.

¹³ Uyo Abasi emi abaŋa Arabia. Mbufo mbon isaŋ mme Dedanim, eyeduŋ ke okoneyo ke akai ke Arabia.

¹⁴ Mme andiduŋ isɔŋ Tema eda mmɔŋ ekesobo ye owo eke asatde itɔŋ, mmɔ eda uyo mmɔ ekesim owo itɔk.

¹⁵ Koro mmɔ efeŋede ke iso mme ofut, ke iso ofut afai, ye ke iso edinuhɔ utiga, ye ke iso ɔkpɔsɔŋ ekɔŋ.

¹⁶ Koro ntem ke Ɔbɔŋ ɔdɔhɔ mi, ete, Osuk kaŋa isua kiet, nte mme isua owo eke anamde utom ke utip esaŋade, ndien ofuri ubɔŋ Kedar eyekure.

¹⁷ Ndien ibat mme utiga emi esuhɔde, kpa eke mbon uko ke otu nditɔ Kedar, eyekabare edi esisit: koro uyo Jehovah Abasi Israel ɔdɔhɔde.