ISAIAH 20 - Edisana ñwed Abasi Ibom

Idiɔŋɔ Prophet Asaŋade Iferi

¹ KE isua oro Tartan edide ke Ashdod, ke ini Sargon edidem Assyria ɔdɔŋde enye utom enye onyuŋ aŋwana ekɔŋ ye Ashdod, onyuŋ ada enye;

² ke ini oro Jehovah ɔdɔhɔ esin ke ubɔk Isaiah eyen Amoz, ete, Ka katat ɔfɔŋ-ikpo ke isin fo fep, nyuŋ sio ikpa-ukot fo ke ukot fo fep. Ndien enye anam ntre, asaŋa iferi ye ukot ikpikpu.

³ Ndien Jehovah ɔdɔhɔ, ete, Kpa nte owo emi Isaiah asaŋade iferi ye ukot ikpikpu ke isua ita, ke ŋkpɔ idiɔŋɔ ye ndyɔ abaŋa Egypt ye Ethiopia;

⁴ kpasuk ntre ke edidem Assyria edida mbuot ekɔŋ ke Egypt, ye mbon ntaŋ-mfep ke Ethiopia, nditɔwɔŋ ye ŋkani iren, ɔnyɔŋ iferi ye ukot ikpikpu, ifuhi onyuŋ ɔfuhɔre mmɔ anam Egypt ŋkpɔ but.

⁵ Ndien ndik ye but eyenam mmɔ ebaŋa Ethiopia iberedem mmɔ, ye Egypt ubɔŋ mmɔ.

⁶ Ndien owo eke oduŋde ke edem inyaŋ emi eyedɔhɔ ke usen oro, ete, Sese, ntem ke iberedem nnyin etie, emi nnyin ifehede itiene enye, iyom ubɔhɔ man enyaŋa nnyin efep ke iso edidem Assyria: ndien nnyin idinam didie ibɔhɔ?