ISAIAH 2 - Edisana ñwed Abasi Ibom

Abasi Eyekara Eyenam Ofuri Idut Ofuri Ererimbot Enyene Emem ke Nsinsi

¹ IKƆ emi ke Isaiah eyen Amoz okokut abaŋa Judah ye Jerusalem.

² Ndien ama ekem ke utit eyo, obot ufɔk Jehovah eyewuhɔ ke enyɔŋ ikpɔ obot, onyuŋ okoŋ akan ŋkpri obot; ndien kpukpru mme idut eyebuŋɔ eduk ke esit.

³ Ndien ediwak obio eyeka ekedɔhɔ, ete, Mbufo edi, nnyin idɔk ke obot Jehovah, ke ufɔk Abasi Jacob; ndien enye eyekpep nnyin ido esiemɔ, nnyin iyenyuŋ isaŋa ke usuŋ esie: koro mme ewuhɔ eyeto ke Zion, uyo Jehovah eyenyuŋ oto ke Jerusalem.

⁴ Ndien enye eyekpe ikpe ke otu mme idut, onyuŋ ebiere ikɔ ɔnɔ ediwak obio: ndien mmɔ eyeda ofut mmɔ edom ŋkpɔ ufuŋ isɔŋ, eda eduat mmɔ edom ikwa udiɔŋ vine: idut idimenke ofut itiene idut, mmɔ idinyuŋ ikpepke aba ekɔŋ.

⁵ O ufɔk Jacob, mbufo edi, nnyin isaŋa ke uŋwana Jehovah.

⁶ Koro afo ɔmɔduɔk ikɔt fo, ufɔk Jacob, koro se itode ke edem usiaha-utin ɔyɔhɔde ke otu mmɔ, mmɔ enyuŋ ebre idiɔŋ, nte mme Philistine; enyuŋ esaŋa ŋkpɔ nte nditɔ mme idut.

⁷ Silver ye gold enyuŋ eyɔhɔ ke isɔŋ mmɔ, chariot mmɔ inyuŋ inyeneke utit.

⁸ Nsu-nsu abasi enyuŋ eyɔhɔ ke isɔŋ mmɔ: mmɔ etuak ibuot enɔ utom ubɔk mmɔ, enɔ se nnuen-ubɔk mmɔ enamde.

⁹ Ntre ke owo ɔsuhɔre, ɔbɔŋ onyuŋ ɔduɔ: kufen mmɔ, ndien.

¹⁰ Duk ke akwa itiat, nyuŋ dibe ke ntan, baŋa ndik Jehovah, ye ubom ubɔŋ esie.

¹¹ Mmenere-enyin owo ɔduɔ, ntaŋidem mbɔŋ onyuŋ ɔsuhɔre, ndien Jehovah ikpɔŋ-ikpɔŋ okoŋ ke usen oro.

¹² Koro Jehovah mme udim omonim usen abaŋa kpukpru se ikoŋde, inyuŋ idorode ke enyɔŋ, onyuŋ abaŋa kpukpru se imenerede ke enyɔŋ: ndien mmɔ eyesuhɔre:

¹³ onyuŋ abaŋa kpukpru mme cedar Lebanon, eke ekoŋde, enyuŋ emenerede ke enyɔŋ, onyuŋ abaŋa kpukpru ofriyo Bashan;

¹⁴ onyuŋ abaŋa kpukpru ŋkokoŋ obot, ye kpukpru obot eke emenerede ke enyɔŋ,

¹⁵ onyuŋ abaŋa kpukpru edikoŋ tower, ye kpukpru ɔkpɔsɔŋ ibibene,

¹⁶ onyuŋ abaŋa kpukpru ubom mbakara Tarshish, ye kpukpru ŋkpɔ-uto eke enemde owo esit.

¹⁷ Ndien mmenere owo eyesuhɔre, ntaŋ-idem mbɔŋ onyuŋ ɔduɔ: ndien Jehovah ikpɔŋ-ikpɔŋ okoŋ ke usen oro.

¹⁸ Ndien ibɔk kpukpru eyetak.

¹⁹ Ndien mmɔ eyeduk ke aba itiat, ye ke ndudu isɔŋ, ebaŋa ndik Jehovah, ye ubom ubɔŋ esie, ke ini enye adahade ke enyɔŋ ndidikhe isɔŋ.

²⁰ Ke usen oro owo eyeda ibɔk silver esie, ye ibɔk gold esie, eke ekenamde enɔ enye, ete okpono, ɔduɔk ɔnɔ oyit ye emiaŋ;

²¹ onyuŋ oduk ke aba itiat, ye ke nsiaha edikoŋ itiat, abaŋa ndik Jehovah, ye ubom ubɔŋ esie, ke ini enye adahade ke enyɔŋ ndidikhe isɔŋ.

²² Mbufo ekubuɔt aba idem ye owo, emi ibifik esie odude enye ke ibuo: koro ebat enye ke nso?