ISAIAH 18 - Edisana ñwed Abasi Ibom

Abasi Eyemia Ethiopia Ufen

¹ Oh, isɔŋ uyom mba emi odude mme akpa Ethiopia ke edem oko!

² emi ɔdɔŋde mme isuŋutom ke usuŋ inyaŋ, ye ke ubom ŋkukop ke iso mmɔŋ, ete, Mbufo mme isuŋ utom nsɔp-ukot, eka ke mbio emi ekoŋde idaha enyuŋ edɔnɔde idem, etiene obio emi enyenede ndik, toto nte ɔkɔtɔtɔŋɔ tutu osim emi; ata ɔkpɔsɔŋ idut emi edigide (mme idut efen), emi mme akpa mmɔŋ ebaharede isɔŋ mmɔ.

³ Mbufo kpukpru emi eduŋde ke ekondo, enyuŋ etiede ke isɔŋ, ke ini edimenerede banner ke enyɔŋ ikpɔ obot, mbufo ekut; ndien ke ini efuride ukorowo, mbufo ekop.

⁴ Koro ntem ke Jehovah ɔdɔhɔ mi, ete, Nyetie suŋ ke itie mi, nnyuŋ ntiŋ enyin, nte afia eyo esede ikɔŋ, ye nte obubit enyɔŋ ekeŋede mbara ke ufiop ini ukpeŋe.

⁵ Koro ke mika-ikemke ke ini ukpeŋe, ke ama asiak ikɔŋ ama, ikɔŋ oro ama onyuŋ akabare edi ŋkim-ŋkim mfri eke akade ke eridat enye eyekpi ŋkɔk esie ke ikwa, onyuŋ esep ubɔk esie osio efep.

⁶ Eyekpɔŋ mmɔ ɔtɔ kiet enɔ mme inuen obot, ye mme unam ikɔt: ndien mme inuen eyesɔrɔ ke esit ke nda-eyo, kpukpru mme unam ikɔt eyenyuŋ ena ke esit ke ukwɔ.

⁷ Ke ini oro mmɔ eyeda mbio emi ekoŋde idaha enyuŋ edɔnɔde idem, kpa obio emi enyenede ndik toto nte ɔkɔtɔtɔŋɔ, tutu osim mfin emi, ata ɔkpɔsɔŋ idut emi edigide (mme idut efen), emi mme akpa mmɔŋ ebaharede isɔŋ mmɔ, edi edisɔk Jehovah mme udim ke enɔ, ke ebiet enyiŋ Jehovah mme udim ke obot Zion.