ISAIAH 17 - Edisana ñwed Abasi Ibom

Abasi Eyemia Syria ye Israel Ufen

¹ UYO Abasi emi abaŋa Damascus. Sese, Damascus amakabare, idige aba obio, edi ibombom ŋwure.

² Mmɔ emekpɔŋ mme obio Aroer, mmɔ eyedi ke eke otu ufene, ndien mmɔ esuhɔre ena, ndien baba owo kiet idinamke mmɔ ndik.

³ Ndien ɔkpɔsɔŋ ebiet eyekure ke Ephraim, ubɔŋ eyenyuŋ etre ke Damascus, ye ke ubak Syria eke ɔsuhɔde: mmɔ eyebiet ubɔŋ nditɔ Israel. Emi edi uyo Jehovah mme udim.

⁴ Ndien ama ekem ke usen oro, ubɔŋ Jacob eyekabare ekpri, mfɔn-idem esie eyenyuŋ akabare edi ndiɔk-idem.

⁵ Ndien eyetie nte owo ukpeŋe obonde ibokpot, ndien ubɔk esie ekpeŋe mbuot; eyenyuŋ etie nte owo ataŋde mbuot ibokpot ke itihere Rephaim.

⁶ Ndien ndusuk eyesuhɔ ke esit, kpa nte ke etetde olive, olive ita mme iba ke nsom edikoŋ ŋkɔk, inaŋ mme ition ke ŋkɔk eti mfri eto; emi edi uyo Jehovah Abasi Israel.

⁷ Ke usen oro owo eyetiŋ enyin ke andinam enye, enyin esie eyenyuŋ ese Edisana Abasi Israel.

⁸ Ndien enye iditiŋke enyin ke mme itie-uwa emi ubɔk esie anamde, idinyuŋ isehe se nnuenubɔk esie ekenamde, mme eto-mkpe, ye mbiet utin.

⁹ Ke usen oro mkpɔsɔŋ obio esie oro ekekpɔŋde ebak nditɔ Israel, eyebiet se ekpɔŋde ke mfuhɔ ikɔt, ye ke edikoŋ ŋkɔk: ndien enye (obio) eyebiara.

¹⁰ Koro afo emefre Abasi erinyaŋa fo, ukonyuŋ utihi akwa itiat odudu fo, mmɔdo afo editɔde ndinem editɔ ŋkpɔ, edinyuŋ adade esen emine ɔtɔ ke esit:

¹¹ ke usen emi afo ɔtɔde ŋkpɔ, afo eyenam ɔkɔ akan enye okuk, ndien ke usen-ubɔk eyekut nte mkpasip otibede: edi ukpeŋe eyefehe ɔnyɔŋ ke usen udɔŋɔ ye eke idiɔk ndutuhɔ.

¹² Kop! uyom ediwak mme idut! ke eyomo nte uyom inyaŋ ibom. Mkpo ediwak owo ŋko! Ke ekpot nte akamba mmɔŋ okpotde.

¹³ Ata ediwak owo ekpot nte akamba mmɔŋ okpotde: edi Enye aduat mmɔ, ndien mmɔ efeŋe anyan usuŋ, enyuŋ ebine mmɔ nte mbio ibokpot ke enyɔŋ obot ke iso ofum, ye nte ŋwewere ŋkpɔ ke iso oyobio.

¹⁴ Ke ini mbubreyo; ndien, sese akpakop ndik; ke eyo mika-isiereke kaŋa, enye iduhe. Emi edi udeme mmɔ eke ebumede nnyin, ye afia mmɔ eke ewode ŋwo ye nnyin.