ISAIAH 16 - Edisana ñwed Abasi Ibom

Nnanenyin Moab Emi Idorenyin Miduhe

¹ MBUFO eda eyen erɔŋ andinyene obio etɔŋɔ ke Sela tutu esim ke wilderness, enɔ esɔk ke obot adiaha Zion. Ndien ama ekem,

² kpa nte inuen eke oyode, ye nte efɔk inuen eke asuanade, ke ntre ke nditɔ-iban Moab editie ke ebiet ube Armon. (Ete Judah,)

³ “Da item di, biere ikɔ; nam mfut fo etie nte okoneyo ke ufɔt uwemeyo; dip mmɔ eke owo ebinde mmɔ efep, kuyarare mbon itɔk.

⁴ Yak nditɔ Moab emi ebinde mmɔ efep, eduŋ ye afo: di ebiet udibe eke mmɔ ekpebɔhɔde andibiat: koro andituk ɔmɔŋ odop, nnama ɔmɔŋ etre, eyesobo mbon akakan ke isɔŋ efep.

⁵ Ndien eyenim ebekpo ke ima: owo kiet eyenyuŋ ada akpanikɔ etie ke esit ke tent David, ebiere ikɔ, ebine edinen ikpe, onyuŋ awara ndinam se inende.” Nnyin ikokop iseri Moab; ke eseri iseri eti-eti:

⁶ ye ntaŋidem esie, ye iseŋ esie, ye ikpahesit esie: nsu esie edi ikpikpu.

⁷ Mmɔdo Moab eyetua abaŋa Moab, ofuri (obio) eyetua: mbufo eyeseme ŋwure Kir-hareseth; ke esuk enuaha.

⁸ Koro mme iŋwaŋ Heshbon eyemerede: ama edi vine Sibmah, mbɔŋ mme idut eyibi nti nsehe esie, mmɔ ekesim ke Jazer, ebiɔhɔ ke ikɔt: ubɔk esie esiaha, ebe esim inyaŋ.

⁹ Oro esin ndituade vine Sibmah ke ntua eyet Jazer. Heshbon ye Elealeh, nyebit mbufo ke mmɔŋ eyet mi: koro mkpo (ekɔŋ) ɔmɔduɔ ke mfri eto fo, ye ke ukpeŋe ibokpot fo.

¹⁰ Emenyuŋ esio idaresit ye mbre ke eti iŋwaŋ efep; ndien mmɔ idikwɔhɔ ikwɔ, idinyuŋ ifiorike, ke mme iŋwaŋ vine: andidigi ididigike aba wine ke itie udigi: ami nnam mkpo odop.

¹¹ Mmɔdo nsia mi oyomode nte harp abaŋa Moab, ŋkpɔ esit idibi mi oyomo abaŋa Kir-heres.

¹² Ndien ama ekem ke ini Moab owutde idem esie, onyuŋ anamde ŋkpɔ ɔkpɔt ke edikoŋ ebiet esie, ndien enye eyeduk ke edisana ebiet esie ndibɔŋ akam; edi idikwe ŋkpɔ.

¹³ Emi edi ikɔ oro Jehovah ɔkɔdɔhɔde ye Moab tutu ko.

¹⁴ Edi ke emi ke Jehovah ɔdɔhɔ ete, Ama ekem ke isua ita, nte isua anam-utom ke okuk, eyesin ubɔŋ Moab ke ndek, ye ofuri akwa otu owo esie; ndien se isuhɔde eyekpri eti-eti, idikponke.