ISAIAH 15 - Edisana ñwed Abasi Ibom

Abasi Eyesobo Idut Moab

¹ UYO Abasi emi abaŋa Moab: koro Ar Moab amabiara, amatak, ke okoneyo kiet; koro Kir Moab amabiara, amatak, ke okoneyo kiet.

² Mmɔ edɔk ke Bayith, ye ke Dibon, ye mme edikoŋ obot, man etua eyet: Moab ke atua ke Nebo, ye ke Medeba: ibɔ odu ke kpukpru ibuot mmɔ, emekporo kpukpru ntaŋebek.

³ Mmɔ ebɔbɔ ɔfɔŋ-ikpo ke idem ke efak mmɔ: ofuri obio ke etua ke enyɔŋ ɔkɔm mmɔ, ye ke aŋwa mmɔ, ke esuhɔre etua eyet.

⁴ Heshbon onyuŋ eseme, ye Elealeh: ekop uyo mmɔ tutu esim ke Jahaz: oro esin mbon-ekɔŋ Moab efioride; ukpɔŋ oyomo mmɔ ke idem mmɔ.

⁵ Esit mi ke eseme abaŋa Moab; nditɔ esie emi ebɔhɔde emesim ke Zoar, ke Eglath-shelishiyah: koro edɔkde obot Luhith etua eyet; koro ke usuŋ Horonaim ke mmɔ emenere eseme nditaha.

⁶ Koro mmɔŋ Nimrim eyekabare edi ndobo: koro nnyanyaŋa amasat, mbiet omokure, awawa ikɔŋ iduhe aba.

⁷ Oro esin emen nsuhɔ ŋkpɔ eke owo ɔkɔde, ye inyene mmɔ, ebiom ekebe ebedeŋ mme willow.

⁸ Koro eseme mmɔ akanarede adaŋa Moab okuk; ntuaŋa esie omosim ke Eglaim, ntuaŋa esie omonyuŋ osim ke Beer-elim.

⁹ Koro iyip ɔyɔhɔde ke mmɔŋ Dimon: koro ndidade idiɔk-ŋkpɔ efen ŋkɔrɔ Dimon, nyeda lion ntiene nditɔ Moab emi ebɔhɔde, ye ubak isɔŋ emi ɔsuhɔde.