ISAIAH 11 - Edisana ñwed Abasi Ibom

Ukara Emem

¹ NDIEN nsehe kiet eyetibe ke etak eto Jesse, ŋkɔk eyenyuŋ asiaha ke oruŋ esie.

² Ndien spirit Jehovah eyedoro enye ke idem, spirit eti ibuot ye asian, spirit item ye odudu, spirit ifiɔk ye uteŋe Jehovah:

³ ndien uteŋe Jehovah eyenem enye esit: ndien enye idikpehe ikpe nte esede ke enyin, idinyuŋ ibiereke ikɔ nte okopde ke utɔŋ:

⁴ edi eyekpe ikpe mme ubuene esin ke edinen, onyuŋ ebiere ikɔ nte enende ɔnɔ suŋ-suŋ mbio isɔŋ: onyuŋ amia isɔŋ ke eto inua esie, onyuŋ owot mme idiɔk owo ke ibifik mkpɔk-inua esie.

⁵ Ndien edinen ido eyedi ubɔp-ŋkpɔ idem esie, akpanikɔ eyenyuŋ edi mbɔbɔ esie.

⁶ Ndien wolf eyeduŋ ye eyen erɔŋ, nawuri-ekpe eyenyuŋ ɔsuhɔre ana ye eyen-ebot: eyen-enaŋ, ye abak lion, ye enaŋ ubom, eyenyuŋ ena ɔtɔ kiet: ekpri eyen-ɔwɔŋ eyenyuŋ akama mmɔ.

⁷ Ndien uman enaŋ ye bear eyeta mbiet; nditɔ mmɔ eyesuhɔre ena ɔtɔ kiet: lion eyenyuŋ ata nnyanyaŋa nte enaŋ.

⁸ Ndien eyen-nsek eyebre mbre ke enyɔŋ odudu okun, eyen emi adahade ke eba eyenyuŋ ada ubɔk esie odori ke odudu ibɔm.

⁹ Mmɔ idinamke idiɔk, idinyuŋ ibiatke ŋkpɔ ke ofuri edisana obot mi: koro ifiɔk Jehovah eyeyɔhɔ ke ererimbot, kpa nte mmɔŋ ofukde inyaŋ.

¹⁰ Ndien ama ekem ke usen oro, mme idut eyetiene oruŋ Jesse emi adade nte banner mme idut: ndien itie nduɔk-odudu esie eyedi ubɔŋ.

¹¹ Ndien ama ekem ke usen oro, Ɔbɔŋ eyetɔŋɔ ntak esin ubɔk afak nsuhɔ ikɔt esie, emi Asshur, ye Egypt, ye Pathros, ye Cush, ye Elam, ye Shinar, ye Hamath, ye mme isuo inyaŋ esuhɔde.

¹² Ndien enye eyemenere banner ke enyɔŋ ɔnɔ mme idut, onyuŋ obon nditɔ Israel emi ekebinde efep, ndien nditɔ Jacob emi esuanade ke enye editaŋ ke edem isɔŋ mbinaŋ.

¹³ Ndien ufup Ephraim eyetre, eyenyuŋ esibe mme asua Judah efep; Ephraim idifibeke Judah ufup, Judah idinyuŋ ituhɔke Ephraim.

¹⁴ Ndien mmɔ eyeduɔ mme Philistine ke afara, ke edem usop-utin: eyedi ebume nditɔ edem usiaha-utin; Edom ye Moab eyedi se mmɔ edoride ubɔk mmɔ ke esit; nditɔ Ammon eyenyuŋ ekop uyo mmɔ.

¹⁵ Ndien Jehovah eyesobo edeme inyaŋ Egypt; onyuŋ ofuŋ ubɔk esie ke enyɔŋ Akpa ke edifiop ofum esie, onyuŋ ɔtɔ enye esin ke idim itiaba, ndien ayak owo esaŋa ebe ke ikpat ukot.

¹⁶ Ndien ɔkpɔ-usuŋ eyena ɔnɔ nsuhɔ ikɔt esie, eke Asshur edisuhɔde; kpa nte akanade ɔnɔ Israel ke usen oro enye otode ke Egypt ɔdɔk.