IKWƆ SOLOMON 4 - Edisana ñwed Abasi Ibom

Akparawa Etiŋ Ikɔ Otoro Uyai Aŋwan Ndɔ

¹ O! IMA mi, sese, afo emeye; sese, afo emeye; enyin fo edi ibiom ke esit ufuhɔ-iso fo: idet fo ebiet udim ebot eke enade ke ikpɔ obot Gilead.

² Edet fo ebiet udim erɔŋ eke efatde, eke etode ke ebiet uyere mmɔŋ; eke kpukpru mmɔ edide amaniba, baba kiet eke ananade eyen inyuŋ iduhe ke otu mmɔ.

³ Mkpɔk-inua fo ebiet ididuot ndidi, inua fo omonyuŋ eye: ɔkpɔ-iso fo ebiet ubak pomegranate ke esit ufuhɔ-iso fo.

⁴ Itɔŋ fo ebiet tower David, emi ekebɔpde ke eke unim-ŋkpɔ ekɔŋ; tɔsin otu-ekɔŋ ekɔŋɔ ke esit, kpukpru mmɔ edi otu-ekɔŋ mbon-uko.

⁵ Eba fo mbiba ebiet nditɔ edop iba, amaniba, eke etade ikɔŋ ke otu mme lily.

⁶ Nyeka ke akamba obot myrrh, ye ekpri obot frankincense, tutu eyo ɔsuhɔ, mme ukpɔŋ enyuŋ ewɔrɔ nnyan.

⁷ Ima mi afo emeye ama; ndo baba kiet iduhe fi ke idem.

⁸ Daha ke Lebanon tiene mi, O ŋwan mi, daha ke Lebanon tiene mi: da ke ibuot Amana se, da ke ibuot Senir ye eke Hermon, ke mme obube mme lion, ye ke obot mme nawori-ekpe.

⁹ Afo amada mi esit, O eyen-eka mi, ŋwan mi! afo amada mi esit ke enyin fo kiet, ke ŋkpɔkɔbi itɔŋ fo kiet.

¹⁰ Ima fo enem didie, O eyen-eka mi, ŋwan mi! ima fo ɔfɔn didie akan wine! utebe edifuɔŋ aran fo onyuŋ ɔfɔn didie akan kpukpru ufuɔŋkpɔ!

¹¹ O ŋwan mi, mkpɔk-inua fo etɔi aran-ɔkwɔk: aran-ɔkwɔk ye mmɔŋ-eba edu fi ke idak edeme: ufuɔŋ edisine-ŋkpɔ fo onyuŋ ebiet ufuɔŋ Lebanon.

¹² Eyen-eka mi, ŋwan mi, afo edi edisire iŋwaŋ, edisire enyin idim, obube mmɔŋ eke esinde seal.

¹³ Nsehe fo edi mbaha pomegranate, ye edinem mfri eto; ye mme cypress, ye mme nard;

¹⁴ nard ye saffron, calamus ye cinnamon, ye kpukpru oruk eto frankincense; ye myrrh, ye aloes, ye kpukpru ata akpan ufuɔŋkpɔ; ye idim ediye iŋwaŋ,

¹⁵ ye obube mmɔŋ uwem, ye idim mmɔŋ eke otode ke Lebanon.

¹⁶ Ofum edere, demere; ofum usuk, afo nyuŋ di: furi ke iŋwaŋ mi man ufuɔŋkpɔ esie ewɔŋɔ. Yak ima mi oduk ke iŋwaŋ esie edidia edinem mfri eto esie.