HOSEA 9 - Edisana ñwed Abasi Ibom

Ubiomikpe ye Ufen Ɔnɔ Nditɔ Israel ke Ntak Idiɔk Ido Mmɔ

¹ O ISRAEL, kudat esit ukaha nte mme idut: koro afo ɔmɔkpɔŋ Abasi fo anam use: afo amama utip ke kpukpru ɔtɔ ubek-ibokpot.

² Ɔtɔ ubek-ibokpot ye ɔtɔ unuak-wine idibɔkke mmɔ, obufa wine eyenyuŋ anana ke esit.

³ Mmɔ ididuŋke ke isɔŋ Jehovah; edi Ephraim eyefiak ke Egypt, enyuŋ eta mbubiam ŋkpɔ ke Assyria.

⁴ Mmɔ idiŋwaŋake wine inɔ Jehovah, mme uwa mmɔ idinyuŋ inemke enye esit: eyetie nte uyo mme atua-eyet ye mmɔ, kpukpru owo eke etade enye eyedehe: koro uyo mmɔ enyenede mmɔ ke idem mmɔ: enye ididukke ke ufɔk Jehovah.

⁵ Mbufo edinam nso ke usen esop, ye ke usen ederi Jehovah?

⁶ Koro, sese, mmɔ eyedaŋa ebak nsobo: Egypt eyetaŋ mmɔ obon, Memphis eyebuk mmɔ ke isɔŋ: ama edi ŋkpɔ silver emi mmɔ emade, nettle eyeda mmɔ, ŋkukim eyedu ke mme tent mmɔ.

⁷ Mme usen ufen emedi, mme usen usiene emedi; Israel eyefiɔk: prophet edi owo ndisime, owo spirit adama idat, kabaŋa akamba idiɔk ido fo ye akwa usua.

⁸ Ephraim odori enyin ye Abasi mi: prophet edi afia ata-ikɔt ke kpukpru usuŋ esie, ye usua ke ufɔk Abasi esie.

⁹ Mmɔ emebiara ekaha kpa nte ke ini Gibeah: Enye eyeti idiɔk ido mmɔ, eyenɔ mmɔ ufen mme ukwaŋ-ŋkpɔ mmɔ.

¹⁰ Ŋkokut Israel nte mfri vine ke ikɔt; ŋkese mme ete mbufo nte akpa mfri, eto fig ke eritɔŋɔ esie: edi mmɔ eka ke ɔtɔ Baal-poer, enyuŋ edianare idem mmɔ enɔ ŋkpɔ but oro: enyuŋ ekabare edi mbubiam ŋkpɔ nte se mmɔ emade.

¹¹ Ama edi Ephraim, ubɔŋ mmɔ eyefe adaha nte inuen, uman iduhe aba, idibi inyuŋ iduhe, inyuŋ iyomoke aba.

¹² Mmɔ ema ekpebɔk nditɔ mmɔ, ŋkpɔbɔ mmɔ nditɔ tutu baba owo kiet isuhɔke: koro osuk ɔdɔdiɔk ɔnɔ mmɔ ke ini ŋkabarede ŋkpɔŋ mmɔ.

¹³ Mmokut nte etɔde Ephraim nte Tyre ke edifɔn ebiet: ndien Ephraim ɔmɔŋ oyom ndisioŋo nditɔ esie nnɔ ekewot.

¹⁴ O Jehovah, nɔ mmɔ se afo edinɔde; nɔ mmɔ idibi eke ɔbuŋɔde ye eba eke esatde.

¹⁵ Ofuri idiɔk ido mmɔ edu do ke Gilgal: koro do ke ŋkasua mmɔ: nyebin mmɔ ke ufɔk mi mfep, mbaŋa mme idiɔk ŋkpɔ emi mmɔ ekenamde: ndimaŋa aba mmɔ: kpukpru mbɔŋ mmɔ esɔŋ ibuot.

¹⁶ Emeyibi Ephraim: oruŋ mmɔ amasat, mmɔ idiŋwumke mfri: okposuk edi nte mmɔ ekemande idem nditɔ, nyewot edima mfri idibi mmɔ.

¹⁷ Abasi mi eyeduɔk mmɔ: koro mmɔ mikopke uyo esie: ndien mmɔ eyedi mbon eke eyode ke otu mme idut.