HOSEA 8 - Edisana ñwed Abasi Ibom

Abasi Asua Ɔnɔ Nditɔ Israel ke Mme esen Abasi Emi Mmɔ Ekekponode

¹ SIN ukorowo ke inua fo. (Duɔ) ufɔk Jehovah nte ntrukpom: koro mmɔ ebiatde ediomi mi, enyuŋ eduede mbet mi.

² Mmɔ eyeseme ekot mi, ete, O Abasi mi, nnyin Israel imɔfiɔk fi.

³ Israel afiari eti ŋkpɔ ɔduɔk: usua eyebine enye.

⁴ Mmɔ enim owo ke ndidem, edi itoho mi: enim owo ke mbɔŋ, ndien ami mfiɔkke: mmɔ eda silver mmɔ ye gold mmɔ enam mbiet ŋkpɔ enɔ idem mmɔ, man esibe mmɔ efep.

⁵ Samaria, Enye afiari eyen enaŋ fo ɔduɔk; iyaresit mi asak ye mmɔ: adaŋa didie ke mmɔ midikemeke ndisana?

⁶ Koro emi ŋko otode ke Israel: mbon-usɔ ekenam enye; ndien enye idige Abasi: koro eyenenaŋ Samaria eyekabare edi nsuhɔ-nsuhɔ.

⁷ Koro mmɔ eketɔde ofum ke isɔŋ, ndien mmɔ eyedɔk oyobio: etak iduhe ke esit: mbuŋwum esie idinamke ndom-uyo; ama anam, isen owo eyemen enye esin ke idibi.

⁸ Ememen Israel esin ke idibi: ke emi mmɔ eyedu ke otu mme idut nte mkpoduoho ufɔk eke baba inemesit miduhe ke esit.

⁹ Koro mmɔ edɔkde eka Assyria nte ikpɔŋ ass ke idem esie: Ephraim emenɔ utip mme akpara.

¹⁰ Ndien ŋko koro mmɔ enɔde mme idut utip, nyebon mmɔ ndo-ndo emi: ndien osuk esisit mbiomo edidem mbɔŋ eyeyat mmɔ.

¹¹ Koro Ephraim anamde ediwak itie-uwa unam-idiɔk, mmɔ eyekabare edi itie-uwa unam idiɔk esie.

¹² Ŋkewet ikpɔ ŋkpɔ ibet mi nnɔ enye: mmɔ ese mmɔ ke ŋkpɔ idut.

¹³ Mmɔ ewa unam ke uwa emi enɔde mi, enyuŋ eta enye; mmɔ inemke Jehovah esit; ke emi ke enye editi idiɔk ido mmɔ, edinyuŋ ɔnɔ mmɔ ufen mme ukwaŋ-ŋkpɔ mmɔ: mmɔ eyefiak ke Egypt.

¹⁴ Israel omonyuŋ efre Andibot enye, omonyuŋ ɔbɔp temple; Judah omonyuŋ ɔbɔp ediwak obio ibibene: edi ami nyekim ikaŋ ke mme obio mmɔ, ndien enye eyeta ufɔk mbɔŋ mmɔ.