HOSEA 7 - Edisana ñwed Abasi Ibom

Idiɔk Ido ye Nsɔŋ-ibuot Nditɔ Israel

¹ KE adaŋemi ndade ikɔt mi emi mmɔ eketaŋde efep, nnyɔŋ ndi; ke ini nnamde idiɔk okure Israel, ndien eyeyarare idiɔk ido Ephraim ye mme ukwaŋ-ŋkpɔ Samaria: koro mmɔ enamde abiaŋa; inɔ onyuŋ oduk edi, udim owo ewo ke mme efak.

² Ndien mmɔ ikereke ke esit mmɔ ite ke ami nteti kpukpru mme idiɔk ido mmɔ: ke emi ido mmɔ emekan mmɔ ekuk; mmɔ ena mi ke iso.

³ Mmɔ edat edidem esit ke idiɔk ido mmɔ, enyuŋ edat mbɔŋ esit ke nsu mmɔ.

⁴ Kpukpru mmɔ edi mbon efibe, ebiet usaŋ-uyo eke anam-uyo abarade. Enye etre ndidemere ikaŋ, toto ke ini emi enye obuende ebok, tutu ebok ofut.

⁵ Ke usen edidem nnyin mbɔŋ esin enye ɔdɔŋɔ ke ufiop wine: enye etiene mbon nsahi anyan ubɔk esie.

⁶ Koro mmɔ eda esit mmɔ emi ebietde usaŋ-uyo edi ke ŋkari mmɔ: anam-uyo mmɔ ede idap ofuri okoneyo; ke usenubɔk enye asak nte edemikaŋ.

⁷ Kpukpru mmɔ efiop nte usaŋ-uyo, enyuŋ edia mme ebierikpe mmɔ; kpukpru ndidem mmɔ emeduɔŋɔ ke isɔŋ: baba owo kiet ke otu mmɔ isemeke ikot mi.

⁸ Ephraim amabuana ŋkpɔ ye mme idut; Ephraim edi ubak uyo eke mikabakede enye.

⁹ Isen owo edia odudu esie; ndien enye ifiɔkke: iwat omotibe enye ke ibuot ŋko, ndien enye ifiɔkke.

¹⁰ Iseri Israel onyuŋ etiŋ abaŋa enye ke iso esie: ndien mmɔ ifiakke itiene Jehovah Abasi mmɔ, ofuri ŋkpɔ emi inyuŋ isinke mmɔ eyom enye.

¹¹ Ndien Ephraim akabare ebiet ɔkɔi ibiom eke ananade ibuot: mmɔ efiori ekot Egypt, enyuŋ eka Assyria.

¹² Ke adaŋemi mmɔ ekade, nyetat iyire mi nduɔk mmɔ ke idem; nyesuhɔre mmɔ nte inuen enyɔŋ; nyetunɔ mmɔ kpa nte mbon-esop mmɔ ekopde.

¹³ Ɔdɔdiɔk ɔnɔ mmɔ, koro mmɔ efeŋede ekpɔŋ mi: nsobo ɔsɔp mmɔ, koro mmɔ enamde idiɔk ye ami: edi ami ŋkonyuŋ mfak mmɔ, ndien mmɔ esu nsu ebaŋa mi.

¹⁴ Ndien mmɔ isemeke inɔ mi ke esit mmɔ, edi ena ke bed mmɔ etuaŋa: esop idem ebaŋa ibokpot ye obufa wine, ekabare enam ikɔ ye ami.

¹⁵ Ndien ami nnɔ mmɔ ufen, nsɔŋ mmɔ ubɔk, ndien mmɔ ekere idiɔk ebaŋa mi.

¹⁶ Mmɔ ifiakke itiene Ata Edikoŋ: mmɔ ebiet emik-utiga: mbɔŋ mmɔ eyeduɔŋɔ ke ofut ebaŋa emiom edeme mmɔ: emi edidi se edidade esak mmɔ ke isɔŋ Egypt.