HOSEA 6 - Edisana ñwed Abasi Ibom

Ikot Ɔnɔ Mme Owo Ndikabare Esit

¹ MBUFO edi, nnyin inyɔŋ itiene Jehovah: koro edi enye akawai, ndien enye eyekɔk nnyin: edi enye okoyibi, ndien enye eyebɔp nnyin.

² Ke usen iba ebede, enye eyenam nnyin iset: ke ɔyɔhɔ usen ita enye eyedemere nnyin, ndien nnyin iyedu uwem ke iso esie.

³ Ndien nnyin iyefiɔk, nnyin iyebine ikɔfiɔk Jehovah: enye iditreke ndiwɔrɔ nte usiere, eyenyuŋ osim nnyin nte edim, nte akpa ye ukperedem edim ebitde isɔŋ.

⁴ Ndinam nso ye afo, O Ephraim? O Judah, ndinam nso ye afo? Ŋkɔm ima (Abasi) mbufo ebiet ntuhube usenubɔk, ye mbara emi abakde adaha.

⁵ Oro esin ŋkada prophet ŋkpeŋe mmɔ, nnyuŋ ŋwot mmɔ ke ikɔ inua mi: ndien ikpe fo ɔwɔrɔ nte uŋwana.

⁶ Koro nyomde ima; nyom ifiɔk Abasi ŋkan edifɔp uwa.

⁷ Ndien mmɔ ebiet owo, ke ebiat ediomi: do ke mmɔ ekebiaŋa mi.

⁸ Gilead edi obio mme anam oburobut, awak nde-iyip.

⁹ Mme oku ŋko ebiet udim owo eke edibede ebet owo; mmɔ ewot owo ke usuŋ Shechem; ŋkɔm mmɔ enam ata oburobut ido.

¹⁰ Ke ufɔk Israel, ŋkut mkpɔ mkpa-idem: use Ephraim odu do: Israel emedehe.

¹¹ Ndien ŋko, O Judah, enye enim ini ukpeŋe ɔnɔ fi.