HOSEA 5 - Edisana ñwed Abasi Ibom

Abasi Ɔnɔ Nditɔ Israel Ufen ke Mmɔ Edianarede Ekpɔŋ Enye

¹ MBUFO mme oku ekop ikɔ emi; ufɔk Israel, mbufo enyuŋ etiŋ enyin: ufɔk edidem, mbufo enyuŋ ekpaŋ utɔŋ: koro ikpe otipde mbufo, koro mbufo ekedide afia ke Mizpah, ye iyire emi ekɔbide ke Tabor.

² Mbon mkpɔŋ-usuŋ ewot owo ekaha, ndien ami nyedi ufen mmɔ kpukpru.

³ Ami mmɔfiɔk Ephraim, Israel inyuŋ idibeke mi: koro ke emi ke afo anam use, O Ephraim, Israel onyuŋ edehe ŋko.

⁴ Mmɔ inimke ido mmɔ man efiak etiene Abasi mmɔ: koro spirit use odude mmɔ ke idem, ndien mmɔ ifiɔkke Jehovah.

⁵ Ndien iseri Israel etiŋ abaŋa enye ke iso esie: Israel ye Ephraim ŋko eyeduɔŋɔ ke mme ukwaŋ-ŋkpɔ mmɔ; ndien Judah eyenyuŋ ɔduɔ ye mmɔ.

⁶ Ndien mmɔ eyeda ŋkpri ufene mmɔ ye enaŋ mmɔ eka ekeyom Jehovah, edi idikwe; enye omonyuŋ ɔkpɔŋ mmɔ.

⁷ Mmɔ emenam abiaŋa ye Jehovah: koro ebonde isen nditɔ: ke emi ɔfiɔŋ kiet eyedia mmɔ ye mme udeme mmɔ.

⁸ Mbufo efuri obukpoŋ ke Gibeah, efuri ukorowo ke Ramah: esio mkpo ke Beth-aven. “(Se usua) ke edem fo, O Benjamin.”

⁹ Ephraim eyedi nditaha ke usen ufen: mmasian mme esien Israel se miditreke ndidi.

¹⁰ Mbɔŋ Judah ebiet mmɔ eke eseherede adaŋa: nyeŋwaŋa mmɔ iyaresit mi ke idem nte mmɔŋ.

¹¹ Efik Ephraim, etuk enye ke ikpe, koro enye amade nditiene ewuhɔ (Jeroboam).

¹² Ndien ami mbiet uta-ŋkpɔ ye Ephraim, nnyuŋ mbiet ŋkarafaŋ ye ufɔk Judah.

¹³ Ndien Ephraim okut udɔŋɔ esie, Judah onyuŋ okut unan esie, ndien Ephraim aka ke Assyria, onyuŋ ɔdɔŋ owo utom ke ɔtɔ edidem Jareh (usua); edi enye ikekwe nte anamde udɔŋɔ okure mbufo, inyuŋ ikɔkke mbufo unan.

¹⁴ Koro ami ntiede nte lion ye Ephraim, ntie nte akparawa lion ye ufɔk Judah: ami kpa ami nyewai ndien nnyɔŋ; nyemen mfep, ndien baba owo kiet eke anyaŋade ididuhe.

¹⁵ Nyenyɔŋ ŋka ebiet mi tutu mmɔ eda ufen, enyuŋ eyom iso mi: ke ini ukut mmɔ, mmɔ eyebak eyom mi.