HOSEA 14 - Edisana ñwed Abasi Ibom

Hosea Ekpe Nditɔ Israel Ete Ekabare Esit

¹ O ISRAEL, fiak tiene Jehovah Abasi fo: koro afo ɔmɔduɔ ke idiɔk ido fo.

² Mbufo emen ikɔ mbufo efiak etiene Jehovah: edɔhɔ enye, ete, Men kpukpru idiɔk-ŋkpɔ fep, nyuŋ da eti: ndien nnyin iyenɔ fi uwa mkpɔk-inua nnyin.

³ Asshur idinyaŋake nnyin: nnyin ididoroke ke horse: idinyuŋ idɔhɔke aba ye se ubɔk nnyin ekenamde, ite, Abasi nnyin: koro afo atuade eyen eke ananade ete mbɔm.

⁴ Nyenam mfiak-edem mmɔ okure; nyeda ima-esit mma mmɔ; koro iyaresit mi amakabare ɔkpɔŋ mmɔ.

⁵ Nyenam ye Israel nte mbara: enye eyesiaha nte lily, onyuŋ omum oruŋ esie nte Lebanon.

⁶ Nsehe esie eyesiaha, uyai esie eyenyuŋ ebiet eke olive, ufuɔŋ esie eyenyuŋ ebiet eke Lebanon.

⁷ Mmɔ eke eduŋde ke idak mfut esie eyefiak edi; mmɔ eyefiari nte ibokpot, enyuŋ esiaha nte vine; etop esie eyebiet eke wine Lebanon.

⁸ “Ami Ephraim nsaŋa nso ŋko ye ibɔk?” “Ami nyere: nyenyuŋ ntiŋ enye enyin ke idem:” “Ami mbiet awawa cypress.” “Ekut nte mfri fo otode mi.”

⁹ Anie owo enyene ibuot, man enye otim ese ŋkpɔ emi? Anie owo edi ɔniɔŋ, man enye ɔfiɔk mmɔ? Koro mme usuŋ Jehovah enende; ndinen owo eyenyuŋ esaŋa mmɔ ke esit: ndien mmɔ eke eduede eyeduɔŋɔ ke esit.