HOSEA 13 - Edisana ñwed Abasi Ibom

Abasi Ɔnɔ Nditɔ Israel ye Ephraim Akpatre Ubiomikpe

¹ KE adaŋemi Ephraim ɔdɔhɔde, ndik mmɔdo: enye oforo ke Israel: ndien ke adaŋemi enye eduede isop ke ikɔ Baal, enye akpa.

² Ndien ke emi mmɔ edediɔŋ enam idiɔk; enyuŋ etara silver mmɔ enam mbiet ke idem mmɔ, adaŋa nte efiɔkde, kpa ibɔk; mbon-usɔ enam mmɔ kpukpru: mmɔ edɔhɔ ebaŋa mmɔ, ete, Yak owo eke ewade uwa etim nditɔ-enaŋ inua.

³ Mmɔdo mmɔ ebietde ntuhube usenubɔk, ye mbara emi abakde adaha, ebiet mbio ibokpot eke asuanade ke ɔtɔ ubek-ibokpot efep, enyuŋ ebiet nsuŋikaŋ eke otode ke window ɔwɔrɔ.

⁴ Ndien edi ami ŋkedi Jehovah Abasi fo toto ke isɔŋ Egypt; kufiɔk ndien Abasi ke mibɔhɔke ami: koro baba andinyaŋa kiet miduhe ikɔrɔ ye ami.

⁵ Ami ŋkɔfiɔk fi ke wilderness; ke isɔŋ nsat-itɔŋ.

⁶ Adaŋa nte ebɔkde mmɔ, mmɔ eyuhɔ; ndien emenere esit mmɔ ke enyɔŋ; oro esin mmɔ efre mi.

⁷ Ndien ami ŋkabare mbiet lion ye mmɔ: nnyuŋ ntie ŋkpeme mmɔ ke usuŋ nte nawori-ekpe:

⁸ Ami nsim mmɔ nte bear eke ebɔde enye nditɔ, nnyuŋ nwai se ifuhɔde mmɔ ke oti; nnyuŋ nta mmɔ do nte uman lion: unam ikɔt asiak mmɔ mbak-mbak.

⁹ O Israel, afo omosobo idem fo: koro afo asuade mi andinyaŋa fi.

¹⁰ Enye edidem fo ndien, man enye anyaŋa fi ke kpukpru mme obio fo? enye ŋko mme ebierikpe fo emi afo ɔkɔdɔhɔde abaŋa, ete,

¹¹ Nɔ mi edidem ye mbɔŋ? Ŋkɔnɔ fi edidem ke iyaresit mi, nnyuŋ mbɔ enye mfep ke ifuresit mi.

¹² Emebɔp idiɔk ido Ephraim enim; isop esie omonyuŋ odibe ana.

¹³ Ubiak aŋwan uman omotuk enye: enye edi eyen eke ananade ibuot; koro ekemde ke ini, idibigike: nditɔ ke eyom ndiwɔrɔ.

¹⁴ Nyefak mmɔ nsio ke ubɔk udi; nyenyaŋa mmɔ nsio ke mkpa: nyedi idiɔk udɔŋɔ fo, O mkpa; nyedi nsobo fo, O udi: erikabare esit eyedibe mi ke enyin.

¹⁵ Koro enye ɔtɔtde ke otu nditɔ-ete esie, ofum ikɔrabak, ofum Jehovah eke otode ke wilderness ɔdɔk, eyedi, ndien idim mmɔŋ esie eyesat; obube mmɔŋ esie eyenyuŋ osomo: enye eyebume ebiet eke enimde kpukpru ŋkpɔ uto.

¹⁶ Samaria eyesio isop; koro enye ɔsɔŋde ibuot ye Abasi esie: mmɔ eyeduɔŋɔ ke ofut. Eyesuok abak-inua mmɔ mbai-mbai, enyuŋ esiak iban mmɔ eke eyomode idibi.