HOSEA 12 - Edisana ñwed Abasi Ibom

Abasi Asua Ɔnɔ Ephraim ke Ido Ŋkari Esie ye Ufik Emi Enye Efikde Mme Owo

¹ EPHRAIM adia ofum, onyuŋ ebine ofum ikɔrabak: enye awak nsu ye ŋkanubɔk ofuri usen; mmɔ enyuŋ ediomi ediomi ye Assyria; owo enyuŋ eda aran esɔk ke Egypt.

² Jehovah omonyuŋ enyene utɔk ye Judah eyenyuŋ ɔnɔ Jacob ufen nte ekemde ye usuŋ esie: eyenyuŋ ɔnɔ enye usiene nte asaŋade ye ido esie.

³ Enye odu ke itie-eyen omum eyen-eka esie nditiŋ-ikpat, onyuŋ ada odudu esie aŋwana ye Abasi.

⁴ Enye aŋwana ye idem angel, onyuŋ ekeme ubɔk ye enye: atua eyet, onyuŋ ekpe enye ubɔk: enye okut enye ke Bethel; do ŋko ke enye ɔdɔhɔ ye nnyin:

⁵ idem Jehovah Abasi mme udim; Jehovah edi se edade eti enye.

⁶ Afo ndien fiak tiene Abasi fo: nim ima ye ikpe, nyuŋ dori enyin ye Abasi fo kpukpru ini.

⁷ Owo urua! nsu-nsu udomo ŋkpɔ edu enye ke ubɔk: enye amama owo ndituk.

⁸ Ndien Ephraim ɔdɔhɔ ete, Ŋkɔm mmoforo, mmɔkɔ inyene nnɔ idem mi: ke baba utom mi kiet mmɔ idikwe idiɔk ŋkpɔ ye ami eke edide ŋkpɔ isop.

⁹ Ndien ami ndi Jehovah Abasi fo ɔtɔŋɔde ke isɔŋ Egypt, nyetɔŋɔ ntak nnam fi oduŋ ke tent, kpa nte eke usen esop.

¹⁰ Mmoyuŋ ndɔhɔ mbaŋa mme prophet, ami ŋko nnɔ ediwak ŋkukut, nnyuŋ nda ubɔk mme prophet ŋke ŋke.

¹¹ Ŋkɔm Gilead anam oburobut: mmɔ edi ata mbon nsu: mmɔ ewa enaŋ ke Gilgal; mme itie-uwa mmɔ enyuŋ ebiet ibombom ke iŋwaŋ eke efuŋde.

¹² Jacob okonyuŋ efehe aka isɔŋ Syria, Israel onyuŋ anam utom ɔbɔ aŋwan, onyuŋ ekpeme ufene ɔbɔ aŋwan.

¹³ Jehovah onyuŋ ada ubɔk prophet kiet osio Israel ke Egypt ɔdɔk, enyuŋ eda prophet ekpeme enye.

¹⁴ Ephraim akayat enye esit idige ŋkpɔ: ndien Ɔbɔŋ esie eyeyak iyip esie ɔsɔp enye, onyuŋ osio usiene but esie ye enye.