HOSEA 11 - Edisana ñwed Abasi Ibom

Abasi Osuk Amama Nditɔ Nsɔŋ-ibuot

¹ KE adaŋoro Israel edide eyenɔwɔŋ, ami mma enye, nnyuŋ ŋkot eyen mi, nte enye oto ke Egypt edi.

² Mmɔ ekot mmɔ, ntem ke mmɔ edaha ekpɔŋ mmɔ: mmɔ ewa uwa enɔ Baal, enyuŋ efɔp ŋkpɔ enɔ ndisɔi mbiet.

³ Ndien edi ami ŋkekpep Ephraim ndisaŋa, mmum mmɔ ke ubɔk mmɔ ŋkama; edi mmɔ ifiɔkke ite ke edi ami nnam itɔŋ uwem ɔsɔŋ mmɔ.

⁴ Nda mme oruk owo, kpa mme idut ima, ndudi mmɔ; ami nnyuŋ ntie ye mmɔ nte mmɔ eke edororede ɔkpɔnɔ ke mbaŋ mfep, nnyuŋ nnyan udia nnɔ enye adia.

⁵ Ndien enye idifiakke ke Egypt, edi Assyrian eyedi edidem esie, koro mmɔ minyimeke ndikabare.

⁶ Ndien eyefuŋ ofut ke mme obio mmɔ, ndien enye eyebiat eto-usuŋ mmɔ, onyuŋ ata mmɔ abaŋa uduak mmɔ.

⁷ Ndien ikɔt mi esuk ekɔbɔ ndifiak edem ŋkpɔŋ mi: ndien ekot mmɔ etiene Ata Edikoŋ, edi baba owo kiet itoroke enye.

⁸ O Ephraim, ndinam didie nda fi nnɔ? nnyuŋ mmen fi nyak O Israel? ndinam didie nda fi nnɔ nte Admah? nnyuŋ nnim fi nte Zeboim? Esit mi amakabare odoro mi; mbɔm etimere mi ini kiet.

⁹ Ndinamke ke ifiopesit mi, nditɔŋɔke ntak mbiat Ephraim: koro ami ndide Abasi, ndige owo; ndi Edisana (Abasi) ke otu mbufo: ndien ndidukke ke obio.

¹⁰ Mmɔ eyesaŋa etiene Jehovah: enye eyekuni nte lion: koro enye edikunide, ndien nditɔ eyeto ke edem usop-utin esɔp edi;

¹¹ mmɔ eyeto ke isɔŋ Egypt esɔp itɔk nte ntarusuŋ, eyenyuŋ eto ke isɔŋ Assyria nte ibiom; ndien ami nyeyak mmɔ eduŋ ke mme ufɔk mmɔ. Uyo Jehovah edi emi.

¹² Ephraim ada nsu akan mi okuk, ufɔk Israel onyuŋ ada abiaŋa akan mi okuk: Judah onyuŋ osuk asaŋa otime-otime ye Abasi, ye edisana mbon akpanikɔ ŋko.