HOSEA 10 - Edisana ñwed Abasi Ibom

Idiɔk Ido Nditɔ Israel Ada Mmɔ Esin ke Ufin

¹ ISRAEL edi vine eke asiahade, enye oŋwum mfri ɔnɔ idem esie: adaŋa nte mfri esie awakde, itie-uwa esie enyuŋ ewak; adaŋa nte ɔfɔnde ye isɔŋ mmɔ, mmɔ enam edifɔn mbiet ŋkpɔ.

² Ebahare esit mmɔ; mmɔ eyesio isop idahemi: enye eyewuri itie-uwa mmɔ, eyebiat mbiet-ŋkpɔ mmɔ.

³ Koro ke emi ke mmɔ edidɔhɔ, ete, Nnyin inyeneke edidem, koro nnyin mibakke Jehovah: enye ama edi edidem, enye eyenam nnyin nso ŋkpɔ?

⁴ Mmɔ ke etiŋ ikɔ-ikɔ; ke etomo nsu, ke ediomi ediomi: ndien ufen asiaha ikɔŋ nte poppy ke ibombom iŋwaŋ.

⁵ Mme andiduŋ Samaria efehe ndik ebaŋa nditɔ-enaŋ Beth-aven: koro ikɔt esie eyetua ebaŋa enye, mme oku eyenyuŋ efut ebaŋa enye, ebaŋa ubɔŋ esie, koro enye adahade ɔkpɔŋ enye.

⁶ Mmɔ eyenyuŋ eda enye eka Assyria, esɔk edidem Jareb ke enɔ: Ephraim eyeda esuene, but eyenyuŋ anam Israel abaŋa item esiemɔ.

⁷ Samaria omonyuŋ atak, kpa edidem esie, nte mbio ke enyɔŋ mmɔŋ.

⁸ Ŋkokoŋo ebiet Aven, kpa idiɔk-ŋkpɔ Israel emesobo: mbarekpe, ye mbara ŋkukwɔinɔ eyekɔri ke mme itie-uwa mmɔ; ndien mmɔ eyedɔhɔ ikpɔ obot, ete, Mbufo efuk nnyin, enyuŋ edɔhɔ ŋkpri ebot, ete, Mbufo eduɔŋɔ nnyin ke idem.

⁹ O Israel, afo emedue toto ke ini Gibeah: mmɔ esuk ededa do: ekɔŋ oro ekeŋwanade ke Gibeah ye nditɔ mme ukwaŋ-ŋkpɔ ikesimke mmɔ.

¹⁰ Odu mi ke esit nditunɔ mmɔ; ndien mme idut eyebono ke ɔtɔ mmɔ ke ini ebɔpde mmɔ ebaŋa idiɔk-ŋkpɔ mmɔ mbiba.

¹¹ Ndien Ephraim edi eyen enaŋ emi mmɔ ekpepde, emi amade ndidigi (ibokpot): edi ami mmɔŋ ndi ndidoro ke ediye itɔŋ esie: nyenam (ɔkpɔnɔ) odoro Ephraim: Judah eyefuŋ isɔŋ, Jacob eyenyuŋ anuak ebok ntan esie.

¹² Mbufo ewari mkpasip ke idem mbufo ke nti ido, ndien mbufo eyekpeŋe nte ekemde ke ima (Abasi); mbufo ediɔŋ adaŋdaŋ ke idem mbufo: ndien ekem ke ini eke ekpeyomde Jehovah, tutu enye edikpep mbufo eti ido.

¹³ Mbufo emefuŋ idiɔk-ŋkpɔ, emekpi ukwaŋ-ŋkpɔ; emedia mfri nsu: koro afo ɔbuɔtde idem fo ke usuŋ fo, ke ediwak mbon-uko fo.

¹⁴ Ndien ndutime otibe ke otu mbio-obio fo, eyenyuŋ esobo kpukpru mkpɔsɔŋ ebiet fo, kpa nte Shalman okosobode Beth-arbel ke usen ekɔŋ: ekesuok eka ekɔrɔ ye nditɔ esie.

¹⁵ Ntem ke Beth-el edinam mbufo, oto ke ata akwa idiɔk ido mbufo: eyo esiere, eyesibe edidem Israel efep.