HOSEA 1 - Edisana ñwed Abasi Ibom

Hosea ye Ŋwan ye Nditɔ Esie

¹ UYO Jehovah emi okosim Hosea eyen Beeri, ke eyo Uzziah, Jotham, Ahaz, ye Hezekiah, Ndidem Judah, ye ke eyo Jeroboam eyen Joash edidem Israel.

² Eritɔŋɔ ikɔ emi ke Jehovah akada Hosea etiŋ. Ndien Jehovah ɔdɔhɔ Hosea, ete, Ka kada ŋwan efibe ye nditɔ efibe ke idem fo: koro isɔŋ emi esinde ata efibe onyuŋ ɔkpɔŋde Jehovah.

³ Ndien enye aka akada Gomer eyen Diblaim aŋwan: ndien enye oyomo, onyuŋ aman eyen-eren ɔnɔ enye.

⁴ Ndien Jehovah ɔdɔhɔ enye, ete, Sio enye enyiŋ Jezreel (Abasi eyewari): koro osuk esisit, ndien nda iyip Jezreel ndori ufɔk Jehu, nnyuŋ nnam ubɔŋ ufɔk Israel etre.

⁵ Ndien ama ekem ke usen oro, nyebuŋ utiga Israel ke itihere Jezreel.

⁶ Ndien enye ɔtɔŋɔ ntak oyomo, onyuŋ aman eyen-aŋwan. Ndien Abasi ɔdɔhɔ enye, Sio enye enyiŋ Lo-ruhamah (Ituaha enye mbɔm): koro mmendituaha aba ufɔk Israel mbɔm: koro mmenditreke ndimen mmɔ mfep.

⁷ Edi nyetua ufɔk Judah mbɔm, nyenyuŋ nda Jehovah Abasi mmɔ nnyaŋa mmɔ, edi ndidaha utiga, ye ofut, ye ekɔŋ, ye horse, ye mbon horse nnyaŋa mmɔ.

⁸ Ekem enye (eka) anam Lo-ruhamah adaha ke eba; ndien oyomo onyuŋ aman eyen-eren.

⁹ Ndien enye (Abasi) ɔdɔhɔ, ete, Sio enye enyiŋ, ete, Lo-ammi (idige ikɔt mi): koro mbufo midige ikɔt mi, ami ndinyuŋ ndige eke mbufo.

¹⁰ Edi ibat nditɔ Israel eyetie nte ntan-inyaŋ emi owo mikemeke ndidomo, minyuŋ ikemeke ndibat: ndien ama ekem ke ebiet emi ekedɔhɔde mmɔ, ete, Lo-ammi (mbufo idige ikɔt mi) ke eyɔdɔhɔ mmɔ, ete, Nditɔ Abasi uwem.

¹¹ Ndien nditɔ Judah ye nditɔ Israel eyesop idem ɔtɔ kiet, enyuŋ enim etubom kiet ke idem mmɔ, ndien eto ke isɔŋ edɔk: koro usen Jezreel eyekpon.