HAGGAI 2 - Edisana ñwed Abasi Ibom

Ubɔŋ Ekperede Ufɔk Abasi (Temple)

¹ KE ɔyɔhɔ ɔfiɔŋ itiaba, ke ɔyɔhɔ usen ɔfiɔŋ edip ye kiet, uyo Jehovah oto ke ubɔk Haggai prophet edi, ete,

² Dɔhɔ ndien Zerubbabel eyen Shealtiel ɔbɔŋ Judah, ye Joshua eyen Jehozadak, akwa oku, ye mbio-obio emi esuhɔde, ete.

³ Anie owo eke okokutde ufɔk emi ke akpa ubɔŋ esie, osuk ke otu mbufo? Ndien mbufo ese enye didie ke emi? Nte emi itiehe nte ikpikpu ye oko ke enyin mbufo?

⁴ Edi ke emi Jehovah ɔdɔhɔ ete, O Zerubbabel, sɔŋ esit; O Joshua eyen Jehozadak, akwa oku, sɔŋ esit ŋko; ofuri mbio-obio, mbufo enyuŋ esɔŋ esit ŋko-ŋko; ke edi uyo Jehovah; mbufo enyuŋ enam utom, koro ami ndude ye mbufo; ke edi uyo Jehovah mme udim:

⁵ emi edi uyo oro ŋkodiomide ye mbufo, ke ini oro mbufo eketode ke Egypt ewɔŋɔ, ndien spirit mi ke osuk ebigi ke ufɔt mbufo: mbufo ekufehe ndik.

⁶ Koro ntem ke Jehovah mme udim ɔdɔhɔ, ete, Osuk kaŋa ini kiet, enye edi esisit, ndien ami nyenyeŋe ikpa-enyɔŋ, ye isɔŋ, ye inyaŋ, ye obot;

⁷ nyenyuŋ nnyeŋe kpukpru mme idut, ndien se mme idut eyomde eyedi: ndien nyesin ubɔŋ ke ufɔk emi nyɔhɔ, Jehovah mme udim ɔdɔhɔ ntem.

⁸ Silver edi okimmɔ, gold onyuŋ edi okimmɔ, ke edi uyo Jehovah mme udim.

⁹ Jehovah mme udim ɔdɔhɔ, ete, Ubɔŋ ekperedem ufɔk eyekpon akan eke akpa: ndien ke ebiet emi ke ndinɔ emem, Jehovah mme udim ɔdɔhɔ.

¹⁰ Ke ɔyɔhɔ usen edip ye inaŋ ke ɔyɔhɔ ɔfiɔŋ usukkiet, ke udiana-akpa isua Darius, uyo Jehovah oto ke ubɔk Haggai prophet edi, ete,

¹¹ Ntem ke Jehovah mme udim ɔdɔhɔ, ete, Bup ndien mme oku ewuhɔ, ete,

¹² Edieke owo akamade edisana unam ke utɔŋ ɔfɔŋidem esie, ndien ada utɔŋ esie oro otuk uyo, mme udia eke etemde, mme wine, mme aran ekededi, nte enye eyedi edisana? ndien mme oku ebɔrɔ ete, Ih ih.

¹³ Ndien Haggai ɔdɔhɔ, ete, Edieke owo eke okpo owo asabarede enye, otuk ŋkpɔ emi ekededi, nte enye eyedehe?

¹⁴ Ndien mme oku ebɔrɔ ete, Emedehe. Ndien Haggai ɔbɔrɔ, ete, Jehovah ɔdɔhɔ ete, Mbio emi ye idut emi etie kpa ntre ke iso mi; kpa ntre ŋko ke kpukpru se ubɔk mmɔ enamde etie; ndien se mmɔ ewade do emedehe ŋko.

¹⁵ Mbufo ekere, ndien, mbɔk, etɔŋɔ ke mfin emi, ese ini emi ebemde iso, ke mika-idorike kaŋa itiat ke itiat ke temple Jehovah:

¹⁶ toto ke mme usen oro, owo aka ke ebok ebek edip, ndien duop edu do: aka ke ebiet-udigi-wine ndikoi abaŋ aba ye duop, ndien edip edu.

¹⁷ Ŋkada nda-eyo ye mfut ye edim-itiat mmia mbufo, kpa kpukpru se ubɔk mbufo enamde; edi mbufo isehe mi, ke edi uyo Jehovah.

¹⁸ Mbufo etim ekere, ndien, mbɔk etɔŋɔde ke mfin emi, ese ini iso, ɔtɔŋɔde ke ɔyɔhɔ usen edip ye inaŋ ke ɔyɔhɔ ɔfiɔŋ usukkiet, toto ke usen eke etɔŋɔde ndibɔp temple Jehovah, mbufo etim ekere.

¹⁹ Nte mkpasip odu kaŋa ke ebiet unim udia? Vine ŋko, ye eto fig, ye pomegranate, ye eto olive ika-iŋwumke kaŋa. Toto ke mfin emi nyediɔŋ mbufo.

²⁰ Ekem uyo Jehovah ɔtɔŋɔ ntak osim Haggai, ke ɔyɔhɔ ɔfiɔŋ oro edip ye inaŋ, ete,

²¹ Dɔhɔ Zerubbabel, ɔbɔŋ Judah, ete, Ami mmɔŋ nnyeŋe enyɔŋ ye isɔŋ;

²² ndien nyeyut ebekpo mme idut ŋkabare nnim; nyenyuŋ nsobo odudu mbɔŋ mme idut; nyenyuŋ nyut chariot ye mmɔ eke edorode ke esit ŋkabare nnim; ndien mme horse ye mmɔ eke edorode mmɔ eyesuhɔre, kpukpru owo ke ofut eyen ete mmɔ.

²³ Jehovah mme udim ɔdɔhɔ, ete, Ke usen oro nyeda fi Zerubbabel eyen Shealtiel, owo mi, Jehovah ke ɔdɔhɔ, nnyuŋ nnim fi seal: koro mmemek fi, ke edi uyo Jehovah mme udim.