HAGGAI 1 - Edisana ñwed Abasi Ibom

Abasi Owuk Ikɔt Esie Ete Etɔŋɔ Ntak Ebɔp Temple

¹ KE udiana-akpa isua Darius edidem, ke ɔyɔhɔ ɔfiɔŋ itio-kiet, ke akpa usen ɔfiɔŋ, uyo Jehovah ke ubɔk Haggai prophet osim Zerubbabel eyen Shealtiel, ɔbɔŋ Judah, ye Joshua eyen Jehozadak akamba oku, ete,

² Ntem ke Jehovah mme udim ɔdɔhɔ, ete, Mbio-obio emi edɔhɔ ete, Ini ikemke, ini eke ekpebɔpde ufɔk Jehovah.

³ Ndien uyo Jeho-vah oto ke ubɔk Haggai prophet edi, ete,

⁴ Nte edi ini eke mbufo ekpeduŋde ke ufɔk mbufo eke ekɔŋde ke obukpɔk, ndien ufɔk emi abiara?

⁵ Jehovah mme udim ɔdɔhɔ kemi, ndien, ete, Mbufo etim ekere usuŋ mbufo.

⁶ Mbufo etetɔ ediwak ŋkpɔ ke isɔŋ, ndien ekut esisit; edia ŋkpɔ, edi ikemke: eŋwɔŋ, edi iyuhɔke; esine ŋkpɔ ke idem, edi ikopke ufiop; anam-utom ke utip onyuŋ esin utip ke ekpat eke otibede ndudu.

⁷ Ntem ke Jehovah mme udim ɔdɔhɔ, ete, Mbufo etim ekere usuŋ mbufo.

⁸ Mbufo edɔk ke obot eda eto edi, enyuŋ ebɔp ufɔk emi, ndien enye eyenem mi esit, nyenyuŋ nda ukpono, Jehovah ɔdɔhɔ.

⁹ Mbufo ke edori enyin ke uwak, ndien sese esisit; ndien ke ini mbufo edade enye edi ke ufɔk, ami mfuri ke esit. Ke abaŋa nso? Jehovah mme udim ɔdɔhɔ. Ke abaŋa ufɔk mi emi abiarade ntem; ndien mbufo kpukpru efeŋe eka ufɔk mbufo.

¹⁰ Mmɔdo edi mbufo esin ikpa-enyɔŋ etre mara, esin isɔŋ etre mbuŋwum esie.

¹¹ Ami nnyuŋ ŋkot nda-eyo, nte anam isɔŋ, ye ikpɔ obot, ye ibokpot, ye obufa wine, ye aran, ye se isɔŋ odukde, ye owo, ye ufene, ye ofuri utom ubɔk owo.

¹² Ndien Zerubbabel eyen Shealtiel, ye Joshua eyen Jehozadak, akamba oku, ye kpukpru owo eke esuhɔde, ekop uyo Jehovah Abasi mmɔ, ye ikɔ Haggai prophet, kpa nte Jehovah Abasi mmɔ ɔkɔdɔŋde enye utom, ndien kpukpru owo efehe ndik ke iso Jehovah.

¹³ Ndien Haggai isuŋutom Jehovah ada uyo Jehovah ɔdɔhɔ kpukpru owo, ete, Ami ndu ye mbufo, edi uyo Jehovah.

¹⁴ Ndien Jehovah edemere spirit Zerubbabel eyen Shealtiel, ɔbɔŋ Judah, ye spirit Joshua eyen Jehozadak, akamba oku, ye spirit kpukpru mmɔ eke esuhɔde; ndien mmɔ edi edinam utom ke ufɔk Jehovah mme udim, Abasi mmɔ,

¹⁵ ke ɔyɔhɔ usen edip ye inaŋ, ke ɔyɔhɔ ɔfiɔŋ itiokiet, ke udiana-akpa isua Darius edidem.