HABAKKUK 3 - Edisana ñwed Abasi Ibom

Ebeŋe ye Ŋkpeubɔk Habakkuk

¹ ŊKPE-UBƆK Habakkuk prophet, asaŋa ye Shigionoth.

² O Jehovah, mmokop mbuk fo; ndik anam mi: O Jehovah, demere enye utom fo ke ufɔt mme isua, nam efiɔk enye ke ufɔt mme isua; ke ini iyaresit, ti mbɔm.

³ Abasi okoto ke Teman, Edisana Abasi okoto ke obot Paran. [Selah.] Ubɔŋ esie okofuk ikpa-enyɔŋ, itoro esie okonyuŋ ɔyɔhɔ ke isɔŋ.

⁴ Ndien uyama esie ebiet eyo; nduk otibe enye ke ubɔk: ndien do ke odudu esie odibe.

⁵ Idiɔk udɔŋɔ asaŋa enye ke iso; edisak ikaŋ onyuŋ ɔwɔrɔ enye ke ukot.

⁶ Enye atuak ada, onyuŋ enyeŋe isɔŋ: ese, onyuŋ anam mme idut enyek idem; ndien ŋkani obot esuana mbak-mbak; nsinsi ŋkpri obot esuhɔre: nsinsi usuŋ edi esie.

⁷ Ŋkokut mme tent Cushan ke itie-ukut: mme ikpehe isɔŋ Midian enyek.

⁸ Nte Jehovah ofiop esit ye mme akpa mmɔŋ? Nte iyaresit fo omosim mme akpa mmɔŋ? Nte ifuresit fo anam inyaŋ ibom, koro afo odorode ke mme horse fo ye ke mme chariot erinyaŋa fo?

⁹ Utiga fo ɔfuhɔre iferi, mme esien eŋwɔŋɔ ke ikɔ. [Selah.] Afo ada akpa mmɔŋ asiak isɔŋ.

¹⁰ Ikpɔ obot ekut fi, emiaŋa; akwa edim mmɔŋ asaŋa ebe: inyaŋ ibom osioro uyo esie, emenere ubɔk esie ke enyɔŋ.

¹¹ Uŋwana idaŋ fo nte eduɔde, uyama eduat fo nte emineŋde, esin utin ye ɔfiɔŋ etuak eda ke iduŋ mmɔ.

¹² Ke ifuresit ke afo edigi isɔŋ, ke iyaresit ke afo anuak mme idut.

¹³ Afo ɔkɔwɔrɔ ndinyaŋa ikɔt fo, ndinyaŋa mme mmɔ emi afo eyetde aran; afo akasuan ibuot emi otode ke ufɔk idiɔk owo; ke ayarare isɔŋ ibibene tutu osim itɔŋ owo. [Selah].

¹⁴ Afo ada eduat mbɔŋ obio iŋwaŋ mmɔ okim enye ke ibuot: mmɔ ebumere nte oyobio, ete isuan mi; etie nte erita mme ubuene ke ndibe adatde mmɔ esit.

¹⁵ Afo akada mme horse fo asaŋa ke inyaŋ, ke odut akamba mmɔŋ.

¹⁶ Ŋkop, ndien nsia oyomo mi; uyom esin mkpɔk-inua mi enyek: mme ɔkpɔ mi etɔŋɔ ndiyap; nyek idem ke itie mi: koro nyetie suŋ mbet ini ukut, ini eke mmɔ emi edidide ekɔŋ ye nnyin edidɔkde edi.

¹⁷ Koro eto fig midiseheke, baba mfri midinyuŋ iduhe ke mme vine: mbuŋwum olive eyenyuŋ okpu, iŋwaŋ idi-nyuŋ idukke udia; ŋkpri ufene eyetre ke ebiet ufene, baba enaŋ kiet idinyuŋ iduhe ke ufɔk enaŋ.

¹⁸ Ndien ami nyedara Jehovah, nyebre mbaŋa Abasi erinyaŋa mi.

¹⁹ Jehovah Ɔbɔŋ edi odudu mi, enye eyenam ukot mi ebiet eke edop, onyuŋ anam mi nsaŋa ke edikoŋ ebiet mi. Eke etubom mme ebre ndido mi.