GENESIS 6 - Edisana ñwed Abasi Ibom

Mme Owo Etɔt ke Iso Isɔŋ

¹ EDIKEM, ke owo etɔŋɔde ndiwak ke iso isɔŋ, nditɔ-iban

² enyuŋ emanade enɔ mmɔ, ndien nditɔ-iren Abasi ekut ndito-iban owo nte eyede, ndien mmɔ eda iban kpukpru eke mmɔ emekde edɔ.

³ Ndien Jehovah ɔdɔhɔ, ete, Spirit mi idiŋwanake ye owo ke nsinsi, ke eridue emi mmɔ eduede mmɔ edi obuk, edi usen mmɔ eyedi isua ikie ye edip.

⁴ Ata ikpɔ owo ekedu ke isɔŋ ke ini oro; ndien ke nditɔ iren Abasi ema eketiene nditɔ-iban owo ŋko, mmɔ enyuŋ emande nditɔ enɔ mmɔ, mmɔ edi ata mkpɔsɔŋ owo uko, emi edude ke eyo oko, mbon etop.

Ekikere Esit Owo Edi Idiɔk Kpukpru Ini.

⁵ Ekem Jehovah okut idiɔk-ŋkpɔ owo nte okponde ke isɔŋ, kpukpru ŋkpɔ ke ekikere esit esie enyuŋ esuk edi idiɔk kpukpru ini.

⁶ Ndien Jehovah atua ŋkpɔfiɔk koro enye akanamde owo ke isɔŋ, esit onyuŋ ayat enye.

⁷ Ndien Jehovah ɔdɔhɔ ete, Nyesɔhi owo emi mbotde ke iso isɔŋ mfep; ntɔŋɔ ye owo nsim ufene, ye ɔnyɔni, ye inuen enyɔŋ: koro mmatua ŋkpɔfiɔk koro ŋkanamde mmɔ.

⁸ Edi Noah okut mfɔn ke iso Jehovah.

⁹ Emi edi mbuk emana Noah: Noah enen oyuŋ ɔfɔn ama ke eyo esie,

¹⁰ Noah asaŋa ye Abasi. Noah onyuŋ obon nditɔ-iren ita,

¹¹ Shem, ye Ham, ye Japhet. Ndien ererimbot etie oburobut ke iso Abasi, afai onyuŋ ɔyɔhɔ ke ererimbot.

¹² Ndien Abasi ese ererimbot, ndien, sese, ababiara: koro kpukpru owo ekebiatde usuŋ mmɔ ke isɔŋ.

¹³ Ndien Abasi ɔdɔhɔ Noah, ete, Utit kpukpru obuk owo emedi ke iso mi, koro oto mmɔ afai ɔyɔhɔ ke isɔŋ; ndien, sese, ami mmɔŋ nsobo mmɔ ye isɔŋ.

¹⁴ Da eto gopher nam ubom nɔ idem fo: nam ŋkpri ufɔk ke ubom oro, nyuŋ yet enye itai ke esit ye ke edem.

¹⁵ Nam enye ntem; uniɔŋ ubom ibio-idomo-okuk ikie ita, ubom esie ibio-idomo-okuk aba ye duop, idaha esie ibio-idomo-okuk edip ye duop.

¹⁶ Nam uŋwana nɔ ubom oro, nyuŋ nam enye etre ɔkpɔŋ enyɔŋ ibio-idomo-okuk kiet; nyuŋ da usuŋ sin ubom ke ŋkaŋ; nam deck ke isɔŋ, ye ke ufɔt ye ke enyɔŋ.

¹⁷ Ndien, sese, ami mmɔn nnam ukwɔ mmɔn edi ke isɔŋ, edisobo kpukpru obuk owo emi ibifik uwem odude mmɔ ke esit, ke idak enyɔŋ efep; kpukpru se idude ke isɔŋ eyekpa.

¹⁸ Nyenyuŋ nnam ediomi mi ye afo ɔsɔŋɔ ada, ndien afo ediduk ke ubom oro, afo, ye nditɔ-iren fo ye ŋwan fo, ye iban nditɔ-iren fo ŋko.

¹⁹ Ke kpukpru se idude uwem ke kpukpru obukidem, afo edinyuŋ ada iba iba ke kpukpru oduk ke ubom, kpaŋ okponim mmɔ ke uwem ye afo; mmɔ edidi nyara ye uman.

²⁰ Ke inuen ke oruk mmɔ, ye ke ufene ke oruk mmɔ, ye ke kpukpru se inyɔnide ke isɔŋ ke oruk mmɔ, iba iba ke kpukpru editiene fi, kpaŋ okponim mmɔ uwem.

²¹ Afo nyuŋ da kpukpru udia eke ediade bon ke idem fo; ndien eyedi udia fo ye eke mmɔ oro.

²² Ndien Noah anam kpukpru se Abasi eketemede enye, ntem ke enye anam.