GENESIS 5 - Edisana ñwed Abasi Ibom

Mbuk Emi Abaŋade Ekpuk Ufɔk Adam

¹ EMI edi ŋwed emana owo. Ke usen oro Abasi obotde owo, Enye anam owo ke mbiet Abasi;

² Obot mmɔ eren ye ŋwan, onyuŋ ɔdiɔŋ mmɔ, onyuŋ osio mmɔ enyiŋ Adam, ke usen oro enye obotde mmɔ.

³ Ekem Adam odu uwem isua ikie ye edip ye duop, ndien obon eyen ke mbiet esiemɔ, etie nte idem esie; onyuŋ osio enye enyiŋ Seth.

⁴ Ndien ke Adam ama okobon Seth, enye odu uwem ke isua ikie itiaita; onyuŋ obon nditɔ-iren ye nditɔ-iban:

⁵ ndien ofuri ini uwem Adam emi enye odude, edi isua ikie usukkiet ye edip ye duop: ndien enye akpa.

⁶ Ndien Seth odu uwem ke isua ikie ye ition ndien obon

⁷ Enos: ndien Seth odu uwem ke ama okobon Enos, isua ikie itiaita ye itiaba, onyuŋ obon nditɔ iren ye nditɔ-iban:

⁸ ndien ofuri ini uwem Seth edi isua ikie usukkiet ye duopeba: ndien enye akpa.

⁹ Ndien Enos odu uwem ke isua anaŋ ye duop, ndien obon

¹⁰ Cainan: ndien Enos odu uwem, ke ama okobon Cainan, ke isua ikie itiaita ye efut, onyuŋ obon nditɔ-iren ye nditɔ-iban:

¹¹ ndien ofuri ini uwem Enos edi isua ikie usukkiet ye ition: ndien enye akpa.

¹² Ndien Cainan odu uwem ke isua ata ye duop, ndien obon

¹³ Mahalaleel: ndien Cainan odu uwem, ke ama okobon Mahalaleel, ke isua ikie itiaita ye aba, onyuŋ obon nditɔ iren ye nditɔ iban:

¹⁴ ndien ofuri ini uwem Cainan edi isua ikie usukkiet ye duop, ndien enye akpa.

¹⁵ Ndien Mahalaleel odu uwem ke isua ata ye ition, ndien obon

¹⁶ Jared: ndien Mahalaleel odu uwem, ke ama okobon Jared, ke isua ikie itiaita ye edip ye duop, onyuŋ obon nditɔ iren ye nditɔ iban:

¹⁷ ndien ofuri ini uwem Mahalaleel edi isua ikie itiaita ye anaŋ ye efut ndien enye akpa.

¹⁸ Ndien Jared odu uwem ke isua ikie ye ata ye iba, ndien obon Enoch:

¹⁹ ndien Jared odu uwem, ke ama okobon Enoch, ke isua ikie itiaita, onyuŋ obon nditɔ iren ye nditɔ-iban:

²⁰ ndien ofuri ini uwem Jared edi isua ikie usukkiet ye ata ye iba: ndien enye akpa.

²¹ Ndien Enoch odu uwem ke isua ata ye ition, ndien obon

²² Methuselah: Enoch onyuŋ asaŋa ye Abasi, ke enye ama okobon Methuselah, ke isua ikie ita, onyuŋ obon nditɔ-iren ye nditɔ-iban:

²³ ndien ofuri ini uwem Enoch edi isua ikie ita ye ata ye ition:

²⁴ Enoch onyuŋ asaŋa ye Abasi: ndien iduhe; koro Abasi akadade enye ɔnyɔŋ.

²⁵ Ndien Methuselah odu uwem ke isua ikie ye anaŋ ye itiaba,

²⁶ ndien obon Lamech; ndien Methuselah odu uwem ke ama okobon Lamech, ke isua ikie itiaba ye anaŋ ye iba, onyuŋ obon

²⁷ nditɔ-iren ye nditɔ-iban: ndien ofuri ini uwem Methuselah edi isua ikie usukkiet ye ata ye usukkiet ndien enye akpa.

²⁸ Ndien Lamech odu uwem ke isua ikie ye anaŋ ye iba, ndien

²⁹ obon eyen eren: onyuŋ osio enye enyiŋ Noah, ete, Emi eyedɔŋ nnyin esit ke utom nnyin ye ukut ubɔk nnyin ke isɔŋ emi Jehovah anamde ete ɔdiɔk.

³⁰ Ndien Lamech odu uwem, ke ama okobon Noah, ke isua ikie ition ye anaŋ ye efut, onyuŋ obon nditɔ

³¹ iren ye nditɔ-iban: ndien ofuri ini uwen Lamech edi isua ikie itiaba ye ata ye efureba: ndien enye akpa.

³² Ndien Noah osim isua ikie ition: Noah onyuŋ obon Shem, ye Ham, ye Japhet.