GENESIS 49 - Edisana ñwed Abasi Ibom

Mme Ikɔ Nnɔitem Emi Jacob Ɔkɔnɔde Nditɔ Esie

¹ EKEM Jacob okot nditɔ esie, ete, Mbufo ebono, ndien nyemen se idiwɔrɔde mbufo

² ke ini iso, ntiŋ nnɔ mbufo. Nditɔ Jacob, mbufo ebono, enyuŋ ekop; enyuŋ ekpaŋ utɔŋ enɔ Israel ete mbufo.

³ Reuben! afo edi akpan mi, odudu mi, ye eritɔŋɔ nsɔŋ-idem mi akpan uforo, ye akpan nsɔŋ:

⁴ Ofofut nte mmɔŋ, uduforoke; koro afo ɔkɔdɔkde ke bed usɔ; ke ini oro afo asabade enye. Enye ɔkɔdɔk ke mbri mi!

⁵ Simeon ye Levi edi nditɔ-ete kiet: ŋkpɔ afai edi ofut mmɔ.

⁶ Kuduk ke odu mmɔ ukpɔŋ mi! kudiana ke esop mmɔ, ubɔŋ mi! koro ke iyaresit mmɔ ke ekewot owo, ndien ke nsɔŋ-ibuot mmɔ ke

⁷ ekpok enaŋ akpan osip. Esuŋi iyaresit mmɔ, koro edide ɔkpɔsɔŋ; ye ifuresit mmɔ, koro edide afai; nyebahare mmɔ ke Jacob, nnyuŋ nsuan mmɔ nsin ke Israel.

⁸ Afo Judah! nditɔ-usɔ eyetoro fi; ubɔk fo eyedu ke itɔŋ mme andisua fi; nditɔ-usɔ eyenuhɔ enɔ

⁹ fi. Judah edi abak eyen lion; eyen mi! afo ɔmɔdɔk ɔkpɔŋ se akawaide; enye ɔnuhɔ, ɔkubɔ nte lion, ye uman lion; anie edibumere enye?

¹⁰ Mmɔnyɔ idikpɔŋke Judah, eto ɔbɔŋ idinyuŋ ikpɔŋke ŋkpatian-ukot esie, tutu Shiloh edi; mme idut eyenyuŋ ekop enɔ

¹¹ enye. Ke eyiri ass esie ke vine, ye eyen ass esie ke eti vine; ke eyet edisine-ŋkpɔ esie ke wine, ye ɔfɔŋ-idem esie ke iyip etuek vine.

¹² Enyin esie eyeyibe ke wine, ndien edet eyefia ke mmɔŋ-eba.

¹³ Zebulun eyeduŋ ke mben inyaŋ; enye eyenyuŋ odu ke itie ubom; adaŋa esie eyenyuŋ osim ke Zidon.

¹⁴ Issachar edi ɔkpɔsɔŋ ass, ke ana

¹⁵ ke nna ufene; Ndien okut nduɔk-odudu ete ke ɔfɔn, ye isɔŋ oro ete ke enem; ndien enye onuk afara esie ndibiom, onyuŋ akabare edi otomo-utomo.

¹⁶ Dan eyekpe ikpe ɔnɔ ikɔt esie,

¹⁷ nte oruk Israel kiet. Dan eyedi urukikɔt ke mben usuŋ, ibɔm ke mben usuŋ, eke odomde horse nditiŋ-ikpat, ndien owo eke odorode

¹⁸ enye ɔduɔ ke edem. Mmebet erinyaŋa fo, O Jehovah.

¹⁹ Gad, udim owo eyefik enye: edi enye eyefik ekpere-edem mmɔ.

²⁰ Ikpɔŋ unam, uyo esie, oto Asher, ndien enye eyenɔ edinem udia edidem.

²¹ Naphtali edi okoyo eke esanade eyak, emi ɔnɔde ikɔ uyai.

²² Joseph edi eyen eti uduot eto, eyen eti uduot eto ke ibuot idim;

²³ ŋkɔk esie ebiɔk ibibene. Mbon utiga eyat enye, enyuŋ etiga enye,

²⁴ enyuŋ esua enye: Edi utiga esie etie ke odudu, ubɔk esie onyuŋ ɔsɔbɔ, oto ke ubɔk Ɔkpɔsɔŋ Abasi Jacob, oto do, Ekpeme-erɔŋ,

²⁵ Itiat Israel. Oto Abasi usɔ, emi edinyaŋade fi; oto El Shaddai, emi edidiɔŋde fi, nti ŋkpɔ heaven ke enyɔŋ, nti ŋkpɔ ntuŋɔ emi anade ke idak, nti ŋkpɔ eba ye idibi.

²⁶ Nti ŋkpɔ usɔ ke ekan nti ŋkpɔ mme ete mi, tutu adaŋa ŋkani obot: edidoro Joseph ke ibuot, ye ke etiŋ-ibuot enye emi enyenede ubɔŋ akan nditɔ-ete esie.

²⁷ Benjamin eyewai nte wolf: ke usenubɔk ke ata se omumde, ndien ke okoneyo ke abahare mbume.

²⁸ Kpukpru mme mmɔ emi edi esien Israel duopeba: emi onyuŋ edi se ete mmɔ etiŋde ɔnɔ mmɔ, onyuŋ ɔdiɔŋ mmɔ; kpukpru owo nte eridiɔŋ mmɔ edide ke enye

²⁹ ɔdiɔŋ mmɔ. Ndien enye eteme mmɔ, onyuŋ ɔdɔhɔ mmɔ, ete, Ami nyebono ye oruk mi: mbufo ebuk mi edian ye mme ete mi, ke aba-itiat emi odude ke iŋwaŋ

³⁰ Ephron eyen Heth; ke aba emi odude ke iŋwaŋ Machpelah, emi odude ke iso Mamre, ke isɔŋ Canaan, emi Abraham ekedepde ye isɔŋ oro, ye Ephron, eyen Heth, man enyene udi.

³¹ Mmɔ ema ebuk Abraham do ye Sarah ŋwan esie; ema ebuk Isaac ye Rebekah ŋwan esie do; ami ŋko mma mbuk

³² Leah do. Mmɔ ekedep isɔŋ oro ye aba emi odude ke esit, ye nditɔ Heth.

³³ Ekem, Jacob etre nditeme nditɔ esie, ndien ataŋ ukot esie onim ke bed, ndien akpa, onyuŋ obono ye oruk esie.