GENESIS 46 - Edisana ñwed Abasi Ibom

Jacob ye Ekpuk Ufɔk Esie

¹ NDIEN Israel ada kpukpru se enye enyenede, adaha aka ke Beer-sheba, akawa uwa ɔnɔ Abasi Isaac ete esie.

² Ndien Abasi ɔdɔhɔ Israel ke ŋkukut ke okoneyo, ete, Jacob, Jacob.

³ Ndien enye ete, Se, ami mi. Ndien enye ete, Ami ndi Abasi, Abasi usɔ, kufehe ndisuhɔre ŋka ke Egypt; koro nyenam fi edi akamba obio do.

⁴ Ami nyesaŋa ye afo nsuhɔre ŋka Egypt; ndien ami ŋko nditreke ndida fi ndɔk: Joseph eyenyuŋ okibi fi enyin.

⁵ Ndien Jacob adaha ke Beer-sheba: nditɔ Israel enyuŋ ebiom Jacob ete mmɔ, ye ŋkpri nditɔ-ɔwɔŋ mmɔ, ye iban mmɔ ke ukpat-ŋkpɔ oro Pharaoh ɔkɔnɔde ete edibiom enye.

⁶ Mmɔ enyuŋ eda ufene mmɔ, ye inyene mmɔ, emi mmɔ ekekɔde ke isɔŋ Canaan ndien edi ke Egypt, Jacob ye kpukpru ubon esie ŋko.

⁷ Enye ada nditɔ esie, ye nditɔ nditɔ esie ŋko, ye nditɔ-iban esie, ye nditɔ-iban nditɔ esie, ye kpukpru ubon esie ŋko edi ke Egypt.

⁸ Ndien mme mmɔ emi edi enyiŋ nditɔ Israel, emi edide ke Egypt, Jacob ye nditɔ-iren esie; Reuben akpan Jacob.

⁹ Ye nditɔ Reuben; Hanoch, ye Pallu, ye Hezron, ye Carmi.

¹⁰ Ye nditɔ Simeon; Jemuel, ye Jamin, ye Ohad, ye Jachin, ye Zohar, ye Shaul eyen eyen-aŋwan a-Canaan.

¹¹ Ye nditɔ Levi; Gershon, ye Kohath, ye Merari.

¹² Ye nditɔ Judah; Er, ye Onan, ye Shelah, ye Pherez, ye Zerah: edi Er ye Onan ekekpaŋa ke isɔŋ Canaan. Nditɔ Perez enyuŋ edi Hezron ye Hamul.

¹³ Ye nditɔ Issachar; Tola, ye Puvah, ye Iob, ye Shimron.

¹⁴ Ye nditɔ Zebulum; Sered, ye Elon, ye Jahleel.

¹⁵ Mme mmɔ emi edi nditɔ emi Leah amande ɔnɔ Jacob ke Peddan-aram, ye Dinah adiaha esie: kpukpru ukpɔŋ nditɔ-iren esie ye nditɔ-iban esie edi edip ye duopeta.

¹⁶ Ye nditɔ Gad; Ziphion, Haggi, ye Shuni, ye Ezbon, ye Eri, ye Arodi, ye Areli.

¹⁷ Ye nditɔ Asher; Imnah, ye Ishvah, ye Ishvi, ye Beriah, ye Serah eyen-eka mmɔ aŋwan: ndien nditɔ Beriah: Heber, ye Malchiel.

¹⁸ Mme mmɔ emi edi nditɔ Zilpah, emi Laban ɔkɔnɔde Leah adiaha esie: enye onyuŋ aman mme mmɔ emi ɔnɔ Jacob, ukpɔŋ efurekiet.

¹⁹ Nditɔ Rachel ŋwan Jacob; Joseph, ye Benjamin.

²⁰ Ndien Manasseh ye Ephraim emana enɔ Joseph ke isɔŋ Egypt, mmɔ emi ke Asenath, eyen Poti-pherah oku On aman ɔnɔ enye.

²¹ Ye nditɔ Benjamin; Bela ye Becher, ye Ashbel, ye Gera, ye Naaman, ye Ehi, ye Rosh, ye Muppim, ye Huppim, ye Ard.

²² Mme mmɔ emi edi nditɔ Rachel, emi emanade enɔ Jacob, kpukpru ukpɔŋ edi duopenaŋ.

²³ Ye nditɔ Dan; Hushim.

²⁴ Ye nditɔ Naphtali; Jahzeel, ye Guni, ye Jezer, ye Shillem.

²⁵ Mme mmɔ emi edi nditɔ Bilhah, emi Laban ɔkɔnɔde Rachel eyen esie: ndien enye aman mmɔ ɔnɔ Jacob; kpukpru ukpɔŋ edi itiaba.

²⁶ Kpukpru ukpɔŋ emi etienede Jacob edi ke Egypt, emi enye obonde, isinke iban nditɔ Jacob, kpukpru ukpɔŋ edi ata ye itiokiet.

²⁷ Ndien nditɔ Joseph emi emanade enɔ enye ke Egypt, edi ukpɔŋ iba: kpukpru ukpɔŋ ufɔk Jacob, emi edide ke Egypt, edi ata ye duop.

²⁸ Ndien Jacob ɔdɔŋ Judah, ete, ebem imɔ iso etiene Joseph, ediwut imɔ Goshen; ndien mmɔ

²⁹ edi ke isɔŋ Goshen. Ndien Joseph otim chariot esie, onyuŋ ɔdɔk okosobo ye Israel ete esie ke Goshen, ndien owut enye idem; onyuŋ ɔkɔŋɔ enye ke itɔŋ, atua

³⁰ eyet ke itɔŋ esie anyan ini. Ndien Israel ɔdɔhɔ Joseph, ete, Yak ŋkpa ke emi, sia mma ŋkakam ŋkut iso fo, koro afo odude uwem kaŋa.

³¹ Ndien Joseph ɔdɔhɔ nditɔ-ete esie, ye ufɔk ete eise, ete, Nyedɔk ŋketiŋ nnɔ Pharaoh, nyenyuŋ ndɔhɔ enye nte, Ke nditɔ-ete mi, ye ufɔk ete mi, emi ekedude ke isɔŋ Canaan, emedi etiene mi;

³² ndien mmɔ edi mme ɔbɔk-ufene, koro edide mbon-ufene; mmɔ emenyuŋ eda ŋkpri ye ikpɔ ufene mmɔ, ye kpukpru se mmɔ enyenede edi.

³³ Ama ekem, ke adaŋaemi Pharaoh edikotde mbufo edi, edinyuŋ obupde ete, Nsidi utom mbufo?

³⁴ Ndien mbufo edidɔhɔ ete, Nnyin ikɔt fo idi mbon-ufene ɔtɔŋɔde ke ini uyen nnyin tutu osim emi, ye nnyin, ye mme ete nnyin, kpaŋ mbufo ekpetie ke isɔŋ Goshen; koro nditɔ Egypt esuade kpukpru mme ɔbɔk-ufene.