GENESIS 45 - Edisana ñwed Abasi Ibom

Joseph Ayarade Idem Ɔnɔ Nditɔ Eka Esie

¹ NDIEN Joseph ikwe nte odopde ke iso kpukpru mmɔ emi edade ye enye: ndien enye ofiori, ete, Enam kpukpru owo ewɔŋɔ ekpɔŋ imɔ. Ndien baba owo kiet idaha ye enye, ke ini Joseph ayararede idem esie ɔnɔ nditɔ-ete esie.

² Ndien Joseph emen uyo atua eyet:

³ nditɔ Egypt enyuŋ ekop, ufɔk Pharaoh onyuŋ okop. Ndien Joseph ɔdɔhɔ nditɔ ete esie, ete, Ami ndi Joseph; nte ete mi ke odudu uwem osuk? Ndien nditɔ-ete esie ikwe nte ebɔrɔde enye: koro idem akpade mmɔ ke iso esie.

⁴ Ndien Joseph ɔdɔhɔ nditɔ-ete esie, ete, Mbufo esaŋa ekpere mi, mbɔk. Ndien mmɔ esaŋa ekpere. Ndien enye ete, Ami ndi Joseph, eyen-ete mbufo, emi mbufo ekenyamde enɔ ke Egypt.

⁵ Edi mbufo ekufuhɔ, ekunyuŋ eyat esit koro ekenyamde mi ken: koro edi Abasi ɔkɔdɔŋ mi ete mbem mbufo iso ndinim uwem.

⁶ Koro akaŋ ama odu ke isɔŋ ke isua iba emi: isua ition enyuŋ esuk eke utɔ ye ukpeŋe mididuhe.

⁷ Ndien Abasi ɔkɔdɔŋ mi ete mben mbufo iso, man nnim ubon mbufo ke isɔŋ, nnyuŋ nnyaŋa mbufo uwem ke akamba erinyaŋa.

⁸ Mmɔdo, idige mbufo edɔŋ mi ete ndi ken, edi Abasi; Enye ama onyuŋ onim mi ke ete ɔnɔ Pharaoh, ye ɔbɔŋ ofuri ufɔk esie, ye andikara ofuri isɔŋ Egypt.

⁹ Mbufo ewara edɔk etiene ete mi, enyuŋ edɔhɔ enye ete, Ntem ke eyen fo Joseph ɔdɔhɔ, ete, Abasi ama onim mi ke ɔbɔŋ ofuri Egypt: suhɔre tiene mi kubigi:

¹⁰ ndien afo eyeduŋ ke isɔŋ Goshen, eyenyuŋ ekpere mi, afo ye nditɔ fo, ye nditɔ nditɔ fo, ye otu erɔŋ fo, ye udim enaŋ fo, ye kpukpru se afo enyenede:

¹¹ nyenyuŋ mbɔk fi do: koro esukde kaŋa isua akaŋ ition; mbak afo edikabare obuene ye ufɔk fo, ye kpukpru se afo enyenede.

¹² Ndien, sese, enyin mbufo, ye enyin Benjamin eyeneka mi ekut, ete ke edi inua mi ɔdɔhɔ ye mbufo.

¹³ Mbufo enyuŋ emen kpukpru ubɔŋ mi ke Egypt, ye kpukpru se mbufo ekutde, etiŋ enɔ ete mi; enyuŋ ewara eda ete mi esuhɔre edi ken.

¹⁴ Ndien enye ɔkɔŋɔ Benjamin eyen-eka esie ke itɔŋ, atua eyet; Benjamin onyuŋ atua eyet ke itɔŋ esie ŋko.

¹⁵ Enye onyuŋ otim kpukpru nditɔ-ete esie inua, atua ke itɔŋ mmɔ; ndien nditɔ-ete esie eneme nneme ye enye.

¹⁶ Ekem, ekop etop oro ke ufɔk Pharaoh, ete, ke nditɔ-ete Joseph emedi: ndien enem Pharaoh ye ikɔt esie esit.

¹⁷ Ndien Pharaoh ete Joseph, dɔhɔ nditɔ usɔ, ete, Mbufo enam emi; edori mbiomo ke mme ass mbufo, enyɔŋɔ, eka isɔŋ Canaan;

¹⁸ enyuŋ eda ete mbufo ye mme ufɔk mbufo, editiene mi: ndien nyenɔ mbufo se ifɔnde ke isɔŋ Egypt, mbufo eyenyuŋ edia isek isɔŋ emi.

¹⁹ Mmeteme fi ndien; mbufo enam emi; eda ukpat-ŋkpɔ ke idem mbufo ke isɔŋ Egypt enɔ ŋkpri nditɔwɔŋ mbufo, ye iban mbufo, ndien emen ete mbufo ekama edi.

²⁰ Ndien ekukere ŋkpɔ nduŋufɔk mbufo, koro se ifɔnde ke ofuri isɔŋ Egypt edide eke mbufo.

²¹ Ndien nditɔ Israel enam ntre: Joseph onyuŋ ɔnɔ mmɔ ukpat-ŋkpɔ, ke uyo Pharaoh, onyuŋ ɔnɔ mmɔ udia usuŋ.

²² Enye ada edisine-ŋkpɔ ɔnɔ mmɔ kpukpru kiet kiet; edi ɔnɔ Benjamin silver ikie

²³ ita, ye edisine-ŋkpɔ ition. Onyuŋ ɔnɔ ŋkpɔ ntem ɔsɔk ete esie: ass duop eke ebiomde nti ŋkpɔ Egypt, ye uman ass duop eke ebiomde ibokpot ye uyo, ye udia usuŋ ete esie.

²⁴ Ndien enye ayak nditɔ-ete esie enyɔŋɔ: onyuŋ ɔdɔhɔ mmɔ ete mbufo ekutɔhɔ utɔk ke usuŋ.

²⁵ Ndien mmɔ edaha ke Egypt, edɔk ekesim ete mmɔ Jacob ke isɔŋ Canaan;

²⁶ enyuŋ edɔhɔ enye ete, Joseph ke osuk odu uwem kaŋa, enye onyuŋ edi andikara ofuri isɔŋ Egypt. Ndien ibikpai omum enye esit, koro enye minimke ikɔ mmɔ ke akpanikɔ.

²⁷ Ndien mmɔ emen kpukpru ikɔ oro Joseph ɔkɔdɔhɔde mmɔ, etiŋ enɔ enye: enye onyuŋ okut ukpat-ŋkpɔ oro Joseph ɔkɔdɔŋde ete edimen enye, ndien esit Jacob ete mmɔ edemere.

²⁸ Ndien Israel ete, Ekem; Joseph eyen mi ke osuk odu uwem: nyeka ŋkese enye, ndien ndikpa.