GENESIS 42 - Edisana ñwed Abasi Ibom

Ndap Oro Edidem Egypt Akadabade Ɔwɔrɔ Osu

¹ EKEM, Jacob okop ete ke ibokpot odu ke Egypt, ndien Jacob ɔdɔhɔ nditɔ-iren esie ete, Mbufo enam didie ese kiet eken?

² Enye onyuŋ ɔdɔhɔ ete, Sese, mmokop nte ibokpot odu ke Egypt: mbufo esuhɔre eka do, enyuŋ edep do enɔ nnyin; man nnyin idu uwem, ikukpa.

³ Ndien nditɔ-ete Joseph duop esuhɔre eka ndidep ibokpot ke

⁴ Egypt. Edi Jacob iyakke Benjamin, eyen-eka Joseph, asaŋa ye nditɔ-ete esie: koro enye ɔdɔhɔde ete, Mbak idiɔk-ŋkpɔ edinam enye.

⁵ Ndien nditɔ Israel edi ndidep ibokpot ke otu mmɔ emi edide: koro akaŋ odude ke isɔŋ Canaan.

⁶ Joseph onyuŋ edi andikara isɔŋ oro, edi enye anyam ibokpot ɔnɔ kpukpru mbio-obio; ndien nditɔ ete Joseph edi edinuhɔ enɔ enye, ekubi iso mmɔ ke isɔŋ.

⁷ Ndien Joseph okut nditɔ-ete esie, onyuŋ ɔdiɔŋɔ mmɔ, edi onim idem nte idiɔŋɔke mmɔ, onyuŋ ɔsɔŋɔ uyo ɔdɔhɔ ye mmɔ; enye onyuŋ obup mmɔ ete, Mbufo eto mmɔŋ? Ndien mmɔ ete, Ito ke idut Canaan idi udia ndidep.

⁸ Joseph onyuŋ ɔdiɔŋɔ nditɔ-ete esie, edi mmɔ idiɔŋɔke enye.

⁹ Ndien Joseph eti ndap oro enye akadabade abaŋa mmɔ, onyuŋ ɔdɔhɔ mmɔ ete, Mbufo edi mbon uyep; emedi ndise nte isɔŋ etiede iferi.

¹⁰ Ndien mmɔ ete enye, Idige ntre ɔbɔŋ mi; edi ifin fo edi udia ndidep.

¹¹ Nnyin kpukpru idi nditɔ owo kiet; nnyin idi mbon akpanikɔ, ifin fo idige mbon uyep.

¹² Ndien enye ɔdɔhɔ mmɔ, ete Idige ntre, mbufo edi ndise nte isɔŋ etiede iferi.

¹³ Ndien mmɔ edɔhɔ ete, Ifin fo edi nditɔ-ete duopeba: nnyin idi nditɔ owo kiet ke isɔŋ Canaan; ndien, sese, ekperedem eyen odu ye ete nnyin mfin emi, kiet inyuŋ iduhe.

¹⁴ Ndien Joseph ɔdɔhɔ mmɔ ete, Edi kpa ŋkpɔ emi ke ndɔhɔ mbufo, nte, Mbufo edi mbon uyep.

¹⁵ Eyeda emi edomo mbufo: ma uwem Pharaoh mbufo ididahake mi, ke ekperedem eyen-ete mbufo midige mi.

¹⁶ Edɔŋ owo mbufo kiet akada eyen-ete mbufo edi, ndien, eyekɔbi mbufo, eye-nyuŋ edomo ikɔ mbufo, mme akpanikɔ odu mbufo ke esit: midige ntre, ma uwem Pharaoh, ke akpan ke mbufo edi mbon uyep.

¹⁷ Ndien enye omum mmɔ kpukpru esin ke ufɔk ukpeme ke usen ita.

¹⁸ Ekem, ke ɔyɔhɔ usen ita, Joseph ɔdɔhɔ mmɔ ete, Mbufo enam ŋkpɔ emi edu uwem; ami mfefehe Abasi.

¹⁹ Edieke mbufo edide mbon akpanikɔ, eyak ekɔbi eyen-ete mbufo kiet ke ufɔk ukpeme mbufo: ndien mbufo eka ekeda ibokpot esɔk mme ufɔk mbufo emi etiede biɔŋ;

²⁰ ndien eda ekperedem eyen-ete mbufo edisɔk mi; ndien ediwut ete, ke ikɔ mbufo edi akpanikɔ, mbufo idinyuŋ ikpaŋake. Ndien mmɔ enam ntre.

²¹ Ndien mmɔ edɔhɔ kiet ye eken, ete, Nnyin ikedue eti-eti ke ikɔ eyen-ete nnyin, koro, ikokutde ndutuhɔ ukpɔŋ esie, ke ini enye ekpede nnyin ubɔk, ndien nnyin ikopke; oro esin nnanenyin emi etiene nnyin.

²² Ndien Reuben ɔbɔrɔ mmɔ, ete, Nte ŋkɔdɔhɔke mbufo, nte, Ekunam idiɔk ye eyen oro, ndien mbufo ikopke? mmɔdo, sese, ke eyeyom iyip esie.

²³ Mmɔ inyuŋ ifiɔkke ete ke Joseph ke okop; koro esem-usem odude mmɔ ke ufɔt.

²⁴ Ndien enye ɔwɔŋɔre ɔkpɔŋ mmɔ akatua eyet; onyuŋ afiak etiene mmɔ, ndien ɔdɔhɔ ikɔ ye mmɔ, onyuŋ ɔbɔ mmɔ Simeon, ɔkɔbi ke iso mmɔ.

²⁵ Ndien Joseph ɔdɔhɔ ete, Esin ibokpot ke ekpat mmɔ eyɔhɔ, enyuŋ eda silver kpukpru owo esin ke ekpat mmɔ, enyuŋ enɔ mmɔ udia usuŋ: ntem ke enye anam ye mmɔ.

²⁶ Ekem, mmɔ emen ibokpot edori ke edem ass mmɔ, ndien enyɔŋɔ ekpɔŋ ebiet oro.

²⁷ Ndien owo kiet atat ekpat esiemɔ, ete inɔ ass imɔ udia ke ebiet emi edaŋde, ndien okut silver esiemɔ; ndien sese, odu ke inua ekpat esie.

²⁸ Ndien enye ɔdɔhɔ nditɔ-ete esie ete, Ema enɔ silver mi; sese, enye odu ke ekpat mi ŋko: ndien esit ɔduɔ mmɔ, mmɔ enyuŋ efehe ndik, edɔhɔ kiet eken ete, Nsidi emi Abasi anamde ye nnyin?

²⁹ Ekem, mmɔ esim Jacob ete mmɔ ke isɔŋ Canaan, ndien mmɔ emen se ikotibede ye mmɔ etiŋ enɔ enye, ete,

³⁰ Ke ɔbɔŋ owo isɔŋ oro ɔkɔsɔŋ uyo ɔdɔhɔ ye nnyin, onyuŋ ese nnyin ke mme eyep isɔŋ.

³¹ Ndien nnyin idɔhɔ enye ite, Nnyin idi mbon akpanikɔ; idige mbon uyep:

³² nnyin owo duopeba idi nditɔ ete nnyin; kiet iduhe, ekperedem onyuŋ odu ye ete nnyin mfin emi ke isɔŋ Canaan.

³³ Ndien owo oro, ɔbɔŋ isɔŋ, ɔdɔhɔ nnyin, ete, Nyeda emi mfiɔk mme mbufo edi mbon akpanikɔ; ekpɔŋ eyen-ete mbufo kiet mi ye ami, ndien eda udia eka ekesɔk mme ufɔk mbufo emi etiede biɔŋ;

³⁴ enyuŋ eda ekpri eyen-ete mbufo edisɔk mi: ndien nyefiɔk nte mbufo idige mbon uyep, edi mbufo edi mbon akpanikɔ: nyeyak eyen-ete mbufo nnɔ mbufo, ndien mbufo eyenyam urua ke isɔŋ emi.

³⁵ Edikem ke ini mmɔ eŋwaŋade ibokpot ke ekpat mmɔ, sese, ekwo silver kpukpru owo edu ke ekpat mmɔ; ndien mmɔ ye ete mmɔ ekut ekwo silver mmɔ, ndien efehe ndik.

³⁶ Ndien Jacob ete mmɔ ɔdɔhɔ mmɔ ete, Mbufo emebɔ mi nditɔ mi: Joseph iduhe, Simeon inyuŋ iduhe, mbufo ke edinyuŋ eda Benjamin efep: kpukpru ŋkpɔ emi enam mi.

³⁷ Ndien Reuben ɔdɔhɔ ete esie, ete, Wot nditɔ mi mbiba ke mmandaha enye nsɔk fi: sin enye ke ubɔk mi, ndien ami nyeda enye mfiak nsɔk fi.

³⁸ Ndien enye ɔdɔhɔ ete, Eyen mi idisuhɔkede ika ye mbufo; koro eyen-eka esie ama akpa, enye onyuŋ ɔsuhɔ ikpɔŋ: idiɔk-ŋkpɔ ama onyuŋ etiene enye ke usuŋ emi mbufo edisaŋade ke esit, eyenam iwat mi osuhɔre ke udi ke mfuhɔ.