GENESIS 4 - Edisana ñwed Abasi Ibom

Akpa Ekpuk Ufɔk Cain ye Abel

¹ EKEM Adam ɔfiɔk Eve ŋwan esie; ndien enye oyomo, onyuŋ aman Cain, ndien ɔdɔhɔ ete, Mmenyene eyen eren emi otode Jehovah.

² Enye onyuŋ aman Abel eyen-eka esie ŋko-ŋko. Ndien Abel edi ekpemerɔŋ, edi Cain edi ofuŋ-isɔŋ.

Cain ye Abel

³ Ekem ke utit isua, Cain ada mbuŋwum-iŋwaŋ edisɔk Jehovah ke uwa.

⁴ Abel onyuŋ ada akpa nditɔ ŋkpri ufene esiemɔ ye ikpɔŋ mmɔ ɔnɔ.

⁵ Ndien Jehovah ese Abel ke iso, ye uwa esie: edi isehe Cain, ye uwa esie. Ndien Cain ofut esit eti eti, iso onyuŋ ɔkpuhɔre enye.

⁶ Ndien Jehovah ɔdɔhɔ Cain ete, Ke didie ke afo ofut esit? Ke didie ke iso onyuŋ ɔkpuhɔre fi?

⁷ Afo akpanam eti ŋkpɔ, nte (iso) ikpeneŋekede fi? Edi munamke eti ŋkpɔ, idiɔk ŋkpɔ ke ana ke enyin usuŋ. Enye eyenyuŋ osuk idem ɔnɔ fi, ndien afo eyekan enye.

⁸ Ndien Cain ɔdɔhɔ ikɔ ye Abel, eyen-eka esie: edikem, ke mmɔ edude ke iŋwaŋ, Cain adaha ke enyɔŋ anam ikɔ ye Abel eyen-eka esie, onyuŋ owot enye.

⁹ Ndien Jehovah ɔdɔhɔ Cain ete, Enye Abel eyen-uka? Ndien enye ɔdɔhɔ ete, Mfiɔkke: ndi ami ndi andikpeme eyen-eka mi?

¹⁰ Ndien Enye ete, Afo akanam nso? uyo iyip eyen-uka ke isɔŋ ke eseseme ɔnɔ mi.

¹¹ Ke emi idiɔk oto ke isɔŋ emi akatatde inua esie ɔbɔ fi iyip eyen-uka ke ubɔk, etiene fi.

¹² Ke ini afo ofuŋde isɔŋ, enye idinɔŋɔ aba fi odudu esie; afo eyedi nyoŋ ye andiyo ke isɔŋ.

¹³ Ndien Cain ɔdɔhɔ Jehovah ete, Ufen mi okpon akan mi ndibiom.

¹⁴ Sese afo ke ebin mi ke idut emi efep mfin emi; nyenyuŋ ndibe fi ke iso; nnyuŋ ndi nyoŋ ye andiyo ke isɔŋ; ndien ama ekem, kpukpru owo eke ekutde mi eyewot mi.

¹⁵ Ndien Jehovah ɔdɔhɔ enye ete, Mmɔdo, owo ekededi ama owot Cain, eyesio usiene enɔ enye utim ikatiaba. Ndien Jehovah onim Cain idiɔŋɔ, mbak owo ekededi eke edikutde enye ediwot enye.

¹⁶ Ndien Cain ɔwɔrɔ ɔkpɔŋ iso Jehovah, aka okoduŋ ke isɔŋ Nod, ke edem Eden emi utin asiahade.

¹⁷ Ndien Cain ɔfiɔk ŋwan esie; enye onyuŋ oyomo, ndien aman Enoch: ndien enye ɔbɔp obio, onyuŋ ada enyiŋ Enoch eyen esie osio obio oro.

¹⁸ Ndien Irad amana ɔnɔ Enoch: ndien Irad obon Mehujael: Mehujael onyuŋ obon Methusael: Methusael onyuŋ obon Lamech.

¹⁹ Ekem Lamech ɔdɔ iban iba: enyiŋ kiet ekere Adah, enyiŋ eken onyuŋ ekere Zillah.

²⁰ Ndien Adah aman Jabal: enye ekedi ete mmɔ eke eduŋde ke tent, ye eke mbon ufene.

²¹ Enyiŋ eyen-eka esie ŋko ekere Jubal: enye edi ete kpukpru mmɔ eke ebrede harp ye ndido.

²² Zillah onyuŋ aman Tubal-Cain ŋko, andidom kpukpru ŋkpɔ okpoho ye ukwak: ndien eyen-eka Tubal-Cain aŋwan edi Naamah.

²³ Ndien Lamech ɔdɔhɔ iban esie, ete, Adah ye Zillah! mbufo ekop uyo mi; iban Lamech ekpaŋ utɔŋ ke ikɔ mi: koro mma ŋwot owo mbaŋa unan mi, kpa akparawa mbaŋa mfiomo mi:

²⁴ ke eyesio usiene enɔ Cain utim ikatiaba, enyuŋ esio enɔ Lamech ikaata ye efureba.

²⁵ Ekem Adam ɔtɔŋɔ ntak ɔfiɔk ŋwan esiemɔ; ndien enye aman eyen-eren onyuŋ osio enye enyiŋ Seth, ete: Koro Abasi ama ɔnɔ mi eyen eŋwen ke ibuot Abel, koro Cain owotde enye.

²⁶ Ndien eyen-eren onyuŋ amana ɔnɔ Seth ŋko; ndien enye osio enye enyiŋ Enos. Ke ini oro etɔŋɔ ndikot Jehovah ke enyiŋ Esie.