GENESIS 3 - Edisana ñwed Abasi Ibom

Eritɔŋɔ Idiɔk Ŋkpɔ

¹ NDIEN urukikɔt enyene ŋkari akan kpukpru unam obot emi Jehovah Abasi akanamde. Ekem enye ɔdɔhɔ ŋwan oro, ete, Nte Abasi ɔkɔdɔhɔ ete, Mbufo ekudia baba eto iŋwaŋ emi kiet?

² Ndien ŋwan ɔdɔhɔ urukikɔt, ete,

³ Nnyin idadia mfri eto iŋwaŋ: edi ama edi mfri eto emi odude ke ufɔt iŋwaŋ, Abasi ama ɔdɔhɔ ete, Mbufo ekudia ke esit, ekunyuŋ etuk enye, mbak edikpaŋa.

⁴ Ndien urukikɔt ɔdɔhɔ ŋwan ete, Mbufo idikpaha:

⁵ koro Abasi ɔmɔfiɔk ete, ke usen eke mbufo ediade ke esit, ndien enyin mbufo eyetara; mbufo eyenyuŋ etie nte Abasi, efiɔk eti ye idiɔk.

⁶ Ekem ŋwan okut nte eto oro ɔfɔnde ke udia, nte onyuŋ eyede ke enyin, nte eto onyuŋ enemde ndise, ndien enye ada mfri esie adia; onyuŋ ɔnɔ ebe esie ŋko, ndien enye adia.

⁷ Ndien enyin mmɔ mbiba etara, mmɔ enyuŋ efiɔk ete ke mmimɔ idi iferi; ndien mmɔ ekim ikɔŋ fig edian, enam mbɔbɔ ke idem mmɔ.

⁸ Ekem ndien mmɔ ekop uyom Jehovah Abasi nte enye asaŋade ke iŋwaŋ ke ofum uwemeyo; ndien owo oro ye ŋwan esie efehe iso Jehovah Abasi ekedibe ke otu eto iŋwaŋ.

⁹ Ndien Jehovah Abasi okot owo oro, ete enye, Afo odu mmɔŋ?

¹⁰ Ndien enye ɔdɔhɔ ete, ŋkokop uyom fo ke iŋwaŋ, ndien mfehe ndik, koro ami ndide iferi; ndien ŋkedibe.

¹¹ Ndien Enye ete, Anie akasian fi ete ke afo edi iferi? Nte afo ama adia eto emi ŋkowukde fi nte, Kudia ke esit?

¹² Ndien owo oro ɔdɔhɔ, ete, Ŋwan emi afo ɔkɔnɔde ete odu ye ami, enye ɔkɔnɔ mi mfri eto oro, ami nnyuŋ ndia.

¹³ Ndien Jehovah Abasi ete ŋwan, Nso ke afo akanam emi? Ndien ŋwan ete, Urukikɔt akabiaŋa mi, ndien ndia.

¹⁴ Ndien Jehovah Abasi ɔdɔhɔ urukikɔt, ete, Koro afo anamde emi, osuk ɔdiɔk ɔnɔ fi akan kpukpru ufene, ye kpukpru unam ikɔt: afo eyesaŋa ke idibi fo,

¹⁵ eyenyuŋ adia ntɔŋ ke ofuri ini uwem fo: nyenyuŋ nsin usua ke ufɔt fo ye ŋwan, ye ke ufɔt ubon fo ye ubon esie: enye eyenuak fi ibuot, afo eyenyuŋ anuak enye nditiŋ-ikpat.

¹⁶ Enye ɔdɔhɔ ŋwan ete, Nyenam ubiak uman fo awawak: ke ubiak ke afo ediman nditɔ; eyenyuŋ osuk idem ɔnɔ uberi ndien enye eyekan fi.

¹⁷ Ndien enye ɔdɔhɔ eren owo ete, Koro afo okopde uyo aŋwan fo, onyuŋ adiade mfri eto emi ŋkowukde fi, nte, Kudia ke esit: osuk ɔdiɔk ɔnɔ isɔŋ abaŋa fi; ke ukut ke afo edidia ke esit ke ofuri ini uwem fo:

¹⁸ enye eyenyuŋ otibe akpap ye mbara ŋkukwɔ-inɔ ɔnɔ fi; afo eyenyuŋ adia ikɔŋ iŋwaŋ ŋko.

¹⁹ Ke ibibiak iso fo ke afo edidia udia, tutu edifiak ke isɔŋ emi esiode fi ke esit: koro afo edide ntan, eyenyuŋ afiak ke ntan.

²⁰ Ndien Adam osio ŋwan esie enyiŋ Eve; koro enye edide eka kpukpru mme andidu uwem.

²¹ Ndien Jehovah Abasi anam edisine ŋkpɔ ke ikpa unam ɔnɔ Adam ye ŋwan esie, esine mmɔ ke idem.

²² Ndien Jehovah Abasi ɔdɔhɔ ete, Sese, owo amakabare edi nte nnyin kiet, ke erifiɔk eti ŋkpɔ ye idiɔk: mmɔdo, mbak enye edinyan ubɔk esie, onyuŋ ada eto uwem ŋko adia, ndien odu uwem ke nsinsi:

²³ ndien Jehovah Abasi ebin enye ke iŋwaŋ Eden efep, ete aka okofuŋ isɔŋ emi esiode enye ke esit.

²⁴ Ntem ke enye osio owo oro efep: ndien onim cherubim ye emineŋmineŋ ofut ikaŋ ke edem usiaha utin iŋwaŋ Eden, ete ekpeme usuŋ eto uwem.