GENESIS 2 - Edisana ñwed Abasi Ibom

¹ EKEM enam enyɔŋ ye isɔŋ, ye kpukpru udim mmɔ ema.

² Abasi onyuŋ anam utom esie emi enye akanamde, okure ke ɔyɔhɔ usen itiaba; ndien ke ɔyɔhɔ usen itiaba enye odop kpukpru utom esie emi enye akanamde.

³ Ndien Abasi ɔdiɔŋ ɔyɔhɔ usen itiaba, onyuŋ anam enye edi edisana; koro ke esit ke enye odop kpukpru utom esie emi Abasi okobotde okonyuŋ anamde.

Eritɔŋɔ Ubon Owo

⁴ Mme mmɔ emi edi emana enyɔŋ ye isɔŋ ke ebotde mmɔ, ke usen emi Jehovah Abasi anamde isɔn ye enyɔŋ.

⁵ Ndien eto obot ndomo kiet ikoduhe kaŋa ke isɔn, baba ikɔŋ isɔŋ ikonyuŋ itibeke kaŋa: koro Jehovah Abasi mikanamke edim edep kaŋa ke ererimbot, owo eke ofuŋde isɔŋ mika inyuŋ iduhe.

⁶ Ekem ntuhube oto ke isɔŋ ɔdɔk, ekebit ofuri iso obot.

⁷ Ndien Jehovah Abasi obot owo ke ntan-isɔŋ, onyuŋ ɔduɔk ibifik uwem esin ke odudu ibuo esie; ndien owo akabare edi ukpɔŋ eke odude uwem.

⁸ Jehovah Abasi onyuŋ ɔtɔ iŋwaŋ ke Eden ke edem usiaha-utin; onyuŋ emen owo emi enye okobotde onim do.

⁹ Jehovah Abasi onyuŋ anam isɔŋ otibe kpukpru eto eke enemde ndise enyuŋ efɔnde ndidia; ye eto uwem ŋko ke ufɔt iŋwaŋ, ye eto ifiɔk eti ye idiɔk.

¹⁰ Akpa onyuŋ oto ke Eden edibit iŋwaŋ; ndien ɔtɔŋɔ do enye abahare, akabare edi mbuot inaŋ.

¹¹ Enyiŋ kiet edi Pison: edi enye akan ofuri idut Havilah okuk, emi gold odude do;

¹² gold idut oro onyuŋ ɔfɔn: bdellium ye itiat onyx mmɔdo. Enyiŋ udiana akpa akpa onyuŋ edi Gihon: edi enye akan ofuri idut Kush okuk.

¹³ Enyiŋ ɔyɔhɔ akpa ita onyuŋ edi Hiddekel: edi enye asaŋa ke iso Assyria.

¹⁴ Ndien ɔyɔhɔ akpa inaŋ edi Euphrates.

¹⁵ Ekem Jehovah Abasi ada owo oro edinim ke iŋwaŋ Eden, ete ɔdiɔŋ enye onyuŋ ekpeme enye.

¹⁶ Jehovah Abasi onyuŋ owuk owo oro, ete, Dia kpukpru eto iŋwaŋ;

¹⁷ Edi ama edi eto ifiɔk, eti ye idiɔk, kudia ke esit: koro ke usen eke afo adiade ke esit afo eyekpa mkpa.

¹⁸ Ekem Jehovah Abasi ete, Ke ifɔnke owo ndidu ikpɔŋ; nyenam andinyaŋa ekem ye enye.

¹⁹ Ndien Jehovah Abasi obot kpukpru unam obot ke ikoneto, ye kpukpru inuen enyɔŋ: ndien ada mmɔ ɔsɔk Adam, ete ise nte Adam edikotde mmo: ndien kpukpru se Adam okotde unam eke edude uwem, oro edi enyiŋ mmɔ.

²⁰ Ntem ke Adam ada enyiŋ osio kpukpru ufene, ye inuen enyɔŋ, ye kpukpru unam obot: edi Adam ikwe andinyaŋa eke ekemde ye enye.

²¹ Ekem Jehovah Abasi anam ɔkpɔsɔŋ idap omum Adam, ndien enye ede: ndien osio ɔkpɔ-ŋkaŋ esie kiet, onyuŋ esiri obuk ke itie esie;

²² ndien Jehovah Abasi obot ɔkpɔ-ŋkaŋ emi enye okosiode Adam ke idem, anam ŋwan kiet, onyuŋ ada enye ɔsɔk Adam.

²³ Ndien Adam ɔdɔhɔ ete, Ke (ŋwan) emi ndien edi ɔkpɔ eke otode ke ɔkpɔ mi, ye obuk eke otode ke obuk mi: emi eyekere Ŋwan, koro edade emi ke idem Eren owo.

²⁴ Mmɔdo owo edikpɔŋde ete esie ye eka esie edinyuŋ adiana ye ŋwan esiemɔ; ndien mmɔ eyekabare obuk kiet.

²⁵ Mmɔ mbiba, eren oro ye ŋwan esie, enyuŋ edi iferi, edi inyeneke but.