GENESIS 17 - Edisana ñwed Abasi Ibom

Idiɔŋɔ Ediomi Emi Abasi Akanamde ye Abram

¹ NDIEN adaŋa emi Abram osimde isua anaŋ ye efurenaŋ, Jehovah owut Abram idem esie, ete enye, Ami ndi Abasi Ibom, saŋa ke iso mi, nyuŋ fɔn ma.

² Nyenyuŋ nnim ediomi mi ke ufɔt mi ye afo, nnyuŋ nnam fi awak eti-eti.

³ Ndien Abram ɔduɔ ke isɔŋ okibi iso esie: ndien

⁴ Abasi ɔdɔhɔ enye ete, Ami, sese, ediomi mi odu ye afo, afo eyenyuŋ edi ete ediwak mme idut.

⁵ Enyiŋ fo idinyuŋ ikereke aba Abram, edi enyiŋ fo edikere Abraham: koro nnimde fi ke ete ediwak idut.

⁶ Nyenyuŋ nnam fi ɔtɔt eti-eti nnyuŋ nnam fi akabare edi idut, ndidem eyenyuŋ eto fi ke idem.

⁷ Nyenyuŋ nnam ediomi mi ɔsɔŋɔ ada ye afo, ye ubon fo eke editienede fi ke emana mmɔ, ke nsinsi ediomi, nte ndi Abasi fo, ye eke ubon fo eke editienede fi.

⁸ Nyenyuŋ nda isɔŋ emi afo edide esen owo ke esit, kpa ofuri isɔŋ Canaan nnɔ fi, ye ubon fo eke editienede fi, ke nsinsi udeme; ndien ami nyedi Abasi mmɔ.

⁹ Abasi onyuŋ ɔdɔhɔ Abraham ete, Afo eyenyuŋ ekpeme ediomi mi, afo ye ubon fo eke editienede fi, ke emana mmɔ.

¹⁰ Emi edi ediomi mi eke mbufo edikpemede, ke ufɔt mi ye mbufo, ye ubon fo eke editienede fi: nim kpukpru iren-owo ke otu mbufo mbobi.

¹¹ Mbufo enyuŋ esibe edut mbufo efep; ndien emi eyedi idiɔŋɔ ediomi ke ufɔt mi ye mbufo.

¹² Yak eyen usen itiaita ke otu mbufo ana mbobi, kpukpru iren owo ke emana mbufo; eke amanade ke ufɔk, eke enyuŋ edepde ke inyene, ye kpukpru isen owo eke midige oruk mbufo.

¹³ Owo eke amanade ke ufɔk fo, ye eke edepde ke inyene fo, ekutre ndina mbobi: ndien ediomi mi eyedu mbufo ke obukidem nte nsinsi ediomi.

¹⁴ Ndien ama edi owo edut emi misibeke enye edut ifep, yak esibe ukpɔŋ oro efep ke oruk esie; enye abiat ediomi mi.

¹⁵ Ndien Abasi ɔdɔhɔ Abraham, ete, Ama edi Sarai ŋwan fo, kukot aba enyiŋ esie ete, Sarai, koro Sarah edide enyiŋ esie.

¹⁶ Nyenyuŋ ndiɔŋ enye, nnyuŋ nnɔ fi eyen eke otode enye ke idem ŋko; nnyuŋ ndiɔŋ enye, ndien enye eyekabare edi eka idut; ndidem idut eyeto enye ke idem.

¹⁷ Ndien Abraham ɔduɔ ke isɔŋ okubi iso esie, onyuŋ asak imam, ndien ɔdɔhɔ ke esit esie, ete, Nte eyen edimana ɔnɔ owo isua ikie? Nte Sarah, emi edide isua anaŋ ye duop, eyenyuŋ aman eyen?

¹⁸ Ndien Abraham ɔdɔhɔ Abasi, ete, Ishmael akpakam odu uwem

¹⁹ ke iso fo. Ndien Abasi ɔdɔhɔ ete, Sarah ŋwan fo iditreke ndiman eyen nnɔ fi, afo eyenyuŋ osio enye enyiŋ Isaac. Ami nyenyuŋ nnam ediomi mi ada ye enye ye ubon esie ŋko eke editienede enye edem, nte nsinsi ediomi.

²⁰ Mmonyuŋ ŋkop nnɔ fi ke ikɔ Ishmael: sese mmɔŋ ndiɔŋ enye, nnyuŋ nnam enye ɔtɔt, nnyuŋ nnam enye awak eti-eti, enye eyebon mbɔŋ duopeba, nyenyuŋ nnam enye edi akamba idut.

²¹ Nyenyuŋ nnam ediomi mi ada ye Isaac, emi Sarah edimande ɔnɔ fi, ke adaŋa emi isua ebem eke edide.

²² Ekem, Enye etre ndidɔhɔ ye enye, ndien Abasi ɔdɔk ɔkpɔŋ Abraham.

²³ Ndien Abraham ada Ishmael eyen esie, ye kpukpru nditɔ ufɔk esie ye kpukpru owo emi enye ekedepde ke inyene, kpukpru iren owo ke otu nditɔ ufɔk Abraham, onim mmɔ mbobi ke kpasuk usen oro Abasi ɔdɔhɔde ye enye.

²⁴ Abraham onyuŋ edi isua anaŋ ye efurenaŋ,

²⁵ ke ini enye anade mbobi. Ishmael eyen esie onyuŋ edi isua duopeta ke ini enye anade mbobi.

²⁶ Ke kpasuk usen oro, Abraham ye Ishmael eyen esie ena mbobi;

²⁷ kpukpru owo ufɔk esie, emi emanade ke ufɔk, emi enye okonyuŋ edepde ke inyene ye eyen esen owo, enyuŋ ena mbobi ŋko.