GENESIS 16 - Edisana ñwed Abasi Ibom

Hagar Eyen Ufɔk Sarai Aman Ishmael

¹ NDIEN Sarai, ŋwan Abram, ika-imanke eyen inɔ enye: enye onyuŋ enyene ofin aŋwan kiet, eyen Egypt, ndien enyiŋ esie ekere Hagar.

² Ndien Sarai ɔdɔhɔ Abram ete, Sese mbɔk, Jehovah akpan mi ete ŋkuman; mbɔk, tiene ofin aŋwan mi, mme nyenyene nditɔ eke etode enye ke idem.

³ Ndien Abram okop uyo Sarai. Ndien ke Abram ama eketie ke isua duop ke isɔŋ Canaan, Sarai ŋwan Abram, ada Hagar, ŋwan Egypt, ofin aŋwan esiemɔ, ɔnɔ Abram

⁴ ebe esie ɔdɔ. Ekem enye etiene Hagar, ndien enye oyomo: ndien adaŋemi enye okutde ete imoyomo, enye ese eka esie ke mbio,

⁵ Ndien Sarai ɔdɔho Abram ete, Se ibiatde mi odoro fi: ami mma nda ofin aŋwan mi nnɔ fi ke ikpanesit, ndien ke ini enye okutde ete imoyomo, enye ese mi ke mbio. Jehovah ekpe ikpe ami ye afo.

⁶ Ndien Abram ɔdɔhɔ Sarai, ete, Sese ofin aŋwan fo odu fi ke ubɔk, nam ye enye nte afo amade. Ndien Sarai ofik enye, ndien enye efehe ɔkpɔn enye,

⁷ Ekem, angel Jehovah okut enye ke mben idim mmɔŋ ke desert, ke idim oro ke usuŋ Shur.

⁸ Ndien enye ete Hagar, ofin aŋwan Sarai, afo oto mmɔŋ? Onyuŋ aka mmɔŋ? Ndien enye ete, Mmɔŋ mfefehe mkpɔŋ Sarai eka mi.

⁹ Ndien angel Jehovah ɔdɔhɔ enye ete, Fiak, tiene uka, nyuŋ suk

¹⁰ idem fo ke ubɔk esie. Angel Jehovah onyuŋ ɔdɔhɔ enye ete, Nyenam ubon fo etɔt eti-eti, ndien mmɔ eyewak nte owo mikemeke ndibat mmɔ.

¹¹ Angel Jehovah onyuŋ ɔdɔhɔ ŋko-ŋko, ete, Sese afo omoyomo, eyenyuŋ aman eyen-eren, onyuŋ osio enye enyiŋ Ishmael: koro Jehovah omokop ukut fo.

¹² Ndien enye eyedi owo ikɔt; ubɔk esie eyedoro kpupkru owo, ubɔk kpukpru owo eyenyuŋ edoro enye: enye eyenyuŋ oduŋ ke iso kpukpru nditɔ ete esiemɔ.

¹³ Ndien enye okot enyiŋ Jehovah emi ɔdɔhɔde ye enye, ete, Afo edi Abasi erikut: koro enye ɔdɔhɔde ete. Nte nsuk ndu uwem ke mma ŋkokut?

¹⁴ Mmɔdo idim oro ekerede Idim uwem erikut: sese, enye odu ke ufɔt Kadesh ye Bered.

¹⁵ Ekem, Hagar aman eyen-eren ɔnɔ Abram: ndien Abram ada enyiŋ Ishmael osio eyen esie emi Hagar amande.

¹⁶ Abram onyuŋ edi isua anaŋ ye itiokiet kini Hagar amande Ishmael ɔnɔ Abram.